ପଞ୍ଜାବ ସୀମାରେ ଦୁଇ ପୁଲିସ କର୍ମୀଙ୍କ ରହସ୍ୟଜନକ ମୃତ୍ୟୁ

ଗୁରଦାସପୁର, ୨୨/୨: ପଞ୍ଜାବର ଗୁରଦାସପୁର ଜିଲ୍ଲା ଅନ୍ତର୍ଗତ ଭାରତ-ପାକିସ୍ତାନ ଅନ୍ତର୍ଜାତୀୟ ସୀମା ନିକଟସ୍ଥ ଅଡିୟାନ ଗ୍ରାମରେ ରବିବାର ଦୁଇଜଣ ପୁଲିସ କର୍ମଚାରୀଙ୍କ ଗୁଳିବିଦ୍ଧ ମୃତଦେହ ମିଳିଛି। ମୃତକଙ୍କୁ ସହକାରୀ ସବ୍-ଇନ୍ସପେକ୍ଟର ଗୁରନାମ ସିଂହ ଏବଂ ହୋମଗାର୍ଡ ଅଶୋକ କୁମାର ବୋଲି ଚିହ୍ନଟ କରାଯାଇଛି।  ଏହି ଘଟଣାଟି ସୀମାର ସୁରକ୍ଷା ପାଇଁ ନିୟୋଜିତ ଏକ ପୋଷ୍ଟ୍‌ରେ ଘଟିଛି। ଘଟଣାର ପ୍ରକୃତ କାରଣକୁ ନେଇ ବର୍ତ୍ତମାନ ପର୍ଯ୍ୟନ୍ତ କୌଣସି ସ୍ପଷ୍ଟ ଚିତ୍ର ସାମ୍ନାକୁ ଆସିନାହିଁ ଏବଂ ପୁଲିସ ବିଭାଗ ପକ୍ଷରୁ ମଧ୍ୟ ଗୁଳିମାଡ଼ର କାରଣ ସ୍ପଷ୍ଟ କରାଯାଇନାହିଁ। ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, କୌଣସି ବ୍ୟକ୍ତିଗତ କିମ୍ବା ବୃତ୍ତିଗତ କାରଣକୁ ନେଇ ଉଭୟ କର୍ମଚାରୀଙ୍କ ମଧ୍ୟରେ ପ୍ରବଳ ଯୁକ୍ତିତର୍କ ହୋଇଥିଲା। ଏହାପରେ ସେମାନେ ନିଜ ନିଜ ସର୍ଭିସ୍ ରାଇଫଲ୍‌ରୁ ପରସ୍ପର ଉପରକୁ ଗୁଳି ଚଳାଇଥିବା ସନ୍ଦେହ କରାଯାଉଛି । ତେବେ ସୀମାବର୍ତ୍ତୀ ଅଞ୍ଚଳ ହୋଇଥିବାରୁ ଅନ୍ୟ ଏକ ଦିଗ ଉପରେ ମଧ୍ୟ ସନ୍ଦେହ ପ୍ରକାଶ ପାଉଛି। କୁହାଯାଉଛି ଯେ, କୌଣସି ସନ୍ଦିଗ୍ଧ ଅନୁପ୍ରବେଶକାରୀ କିମ୍ବା ଚୋରା ଚାଲାଣକାରୀଙ୍କୁ ଚ୍ୟାଲେଞ୍ଜ କରିବା ସମୟରେ ଏହି ଗୁଳିକାଣ୍ଡ ଘଟିଥାଇପାରେ। ଘଟଣାର ସମ୍ବେଦନଶୀଳତାକୁ ଦୃଷ୍ଟିରେ ରଖି ବରିଷ୍ଠ ପୁଲିସ ଅଧିକାରୀ ଏବଂ ଫୋରେନ୍ସିକ୍ ଟିମ୍ ଘଟଣାସ୍ଥଳରେ ପହଞ୍ଚି ନମୁନା ସଂଗ୍ରହ କରିବା ସହ ତଦନ୍ତ ଜାରି ରଖିଛନ୍ତି।