ନିର୍ବାଚନ ପୂର୍ବରୁ ମାଗଣା ସଂସ୍କୃତି ନେଇ ରାଜ୍ୟମାନଙ୍କ ଉପରେ ବର୍ଷିଲେ ସୁପ୍ରିମକୋର୍ଟ

ନୂଆଦିଲ୍ଲୀ : ବିଦ୍ୟୁତ ସବସିଡି ସମ୍ପର୍କିତ ଏକ ମାମଲାର ଶୁଣାଣି ସମୟରେ ଭାରତର ସୁପ୍ରିମକୋର୍ଟ ରାଜ୍ୟଗୁଡ଼ିକୁ ‘ଦାୟିତ୍ୱହୀନ’ ମାଗଣା ଉପହାର ଘୋଷଣା କରିବା ନେଇ ତୀବ୍ର ସମାଲୋଚନା କରିଛନ୍ତି । ମାଗଣା ଉପହାର ସାଧାରଣ ଆର୍ଥିକ ସ୍ଥିତିକୁ ଚାପ ପକାଇଥାଏ। ଏପରି ନିଷ୍ପତ୍ତିର ସମୟ ଏବଂ ଆର୍ଥିକ ଯୁକ୍ତି ଉପରେ କୋର୍ଟ ପ୍ରଶ୍ନ ଉଠାଇଛନ୍ତି। କୋର୍ଟ ସ୍ୱତନ୍ତ୍ର ଭାବରେ ତାମିଲନାଡୁ ସରକାରଙ୍କୁ ପଚାରିଥିଲେ ଯେ କାହିଁକି ଶେଷ ମୁହୂର୍ତ୍ତରେ ଏକ ମାଗଣା ବିଦ୍ୟୁତ୍ ଯୋଜନା ଘୋଷଣା କରାଯାଇଥିଲା, ଯାହା ଫଳରେ ବିଦ୍ୟୁତ୍ ବଣ୍ଟନ କମ୍ପାନି ଗୁଡ଼ିକ  ଶୁଳ୍କ ଏବଂ ବଜେଟ୍ ହିସାବକୁ ସଜାଡ଼ିବାକୁ ବାଧ୍ୟ ହୋଇଥିଲେ। ଅନେକ ରାଜ୍ୟ ପୂର୍ବରୁ ରାଜସ୍ୱ ନିଅଣ୍ଟ ସହିତ ଗତି କରୁଛନ୍ତି ବୋଲି ଲକ୍ଷ୍ୟ କରି ଖଣ୍ଡପୀଠ ପ୍ରଶ୍ନ ଉଠାଇଛନ୍ତି ଯେ ପୂର୍ବ ଆର୍ଥିକ ଯୋଜନା ବିନା ସରକାରମାନେ କିପରି ବଡ଼ ସବସିଡି ପ୍ରତିଶ୍ରୁତି ପ୍ରଦାନ କରିପାରିବେ। ଖଣ୍ଡପୀଠ ଚେତାବନୀ ଦେଇଛନ୍ତି ଯେ ଅନିୟନ୍ତ୍ରିତ ଦାନ ଦେଶର ଆର୍ଥିକ ବିକାଶକୁ ବାଧା ଦେଇପାରେ। ସୁପ୍ରିମକୋର୍ଟ କହିଛନ୍ତି  ଅନେକ ରାଜ୍ୟରେ ଏମିତି ଘଟଣା ଘଟୁଛି। ସାମ୍ପ୍ରତିକ ନିର୍ବାଚନ ପୂର୍ବରୁ ହଠାତ୍ କଲ୍ୟାଣକାରୀ ଯୋଜନା ଘୋଷଣା କରାଯାଉଛି।  ଯଦି ସିଧାସଳଖ ନଗଦ ସ୍ଥାନାନ୍ତର ଯୋଜନା ଘୋଷଣା କରାଯାଏ, ତେବେ ଲୋକମାନେ ଆଉ କାମ କରିବେ କି ବୋଲି କୋର୍ଟ ପ୍ରଶ୍ନ କରିଛନ୍ତି।  ଯଦି ସରକାର ମାଗଣା ଟଙ୍କା, ବିଦ୍ୟୁତ୍ ଏବଂ ଅନ୍ୟାନ୍ୟ ସୁବିଧା ଯୋଗାଇବା ଜାରି ରଖନ୍ତି, ତେବେ ଶେଷରେ ଏହାର ଖର୍ଚ୍ଚ କିଏ ବହନ କରିବ ବୋଲି କୋର୍ଟ ପ୍ରଶ୍ନ କରିଛନ୍ତି। ପ୍ରଧାନ ବିଚାରପତି  ସୂର୍ଯ୍ୟକାନ୍ତ, ବିଚାରପତି ଜୟମାଲ୍ୟ ବାଗଚୀ ଏବଂ ବିଚାରପତି ବିପୁଲ ପାଞ୍ଚୋଲିଙ୍କୁ ନେଇ ଗଠିତ ଖଣ୍ଡପୀଠ ତାମିଲନାଡୁ ପାୱାର ଡିଷ୍ଟ୍ରିବ୍ୟୁସନ୍ କମ୍ପାନି ଲିମିଟେଡ୍ ଦ୍ୱାରା ବିଦ୍ୟୁତ ସଂଶୋଧନ ନିୟମ, ୨୦୨୪ ର ନିୟମ ୨୩କୁ ଚ୍ୟାଲେଞ୍ଜ କରି ଦାୟର କରାଯାଇଥିବା ଏକ ରିଟ୍ ପିଟିସନର ଶୁଣାଣି କରି ଏହି ମନ୍ତବ୍ୟ ଦେଇଛନ୍ତି।