ହର୍ମୁଜ୍ କେବେ ବି ଯୁଦ୍ଧ ପୂର୍ବ ସ୍ଥିତିକୁ ଫେରିବ ନାହିଁ: ଇରାନ

ତେହେରାନ: ହର୍ମୁଜ୍ ପ୍ରଣାଳୀ ଦେଇ ଜାହାଜ ପରିବହନ ଆଉ କେବେ ବି ଯୁଦ୍ଧ ପୂର୍ବରୁ ଥିବା ସ୍ଥିତିରେ ହେବନାହିଁ । ତେହେରାନ ଏହି ଗୁରୁତ୍ୱପୂର୍ଣ୍ଣ ଜଳପଥକୁ ନିଜ ସର୍ତ୍ତରେ ପରିଚାଳନା କରିବ। ଇରାନର ମୁଖ୍ୟ ଆଲୋଚକ ଏବଂ ଇରାନ ସଂସଦର ବାଚସ୍ପତି ମହମ୍ମଦ ବାକର ଗାଲିବାଫ ସ୍ୱିଜରଲ୍ୟାଣ୍ଡରୁ ଆଲୋଚନାରୁ ସ୍ବଦେଶ ଫେରିବା ସମୟରେ ଏହି ବିବୃତି ଦେଇଛନ୍ତି। ଗାଲିବାଫ କହିଛନ୍ତି ଯେ, ହର୍ମୁଜ୍ ପ୍ରଣାଳୀ ଆଉ କେବେ ବି ଯୁଦ୍ଧ ପୂର୍ବର ସ୍ଥିତିକୁ ଫେରିବ ନାହିଁ। ଯୁଦ୍ଧ ଆରମ୍ଭ ହେବା ସମୟରେ ମୁଁ ସ୍ପଷ୍ଟ ଭାବରେ ଏଭଳି କହିଥିଲି। ସାମରିକ କାର୍ଯ୍ୟାନୁଷ୍ଠାନ ବଦଳରେ କୂଟନୀତି ମାଧ୍ୟମରେ ଆମେରିକାର ଅବରୋଧ ଉଠାଯାଇଥିବା ନେଇ ଗାଲିବାଫ୍ ଇରାନୀ ଆଲୋଚନାକାରୀଙ୍କୁ ପ୍ରଶଂସା କରିଛନ୍ତି। ଯଦି ମୁଁ ଏହା ସାମରିକ ଭାବରେ କରିବାକୁ ଚାହୁଁଥିଲି, ତେବେ ନିଶ୍ଚିତ ଭାବରେ ଯୁଦ୍ଧ ହେଲେ କ୍ଷତି ହେବ। ତେବେ ରାତାରାତି ଅବରୋଧ ହଟିଯାଇଥିଲା। ୱାସିଂଟନ ପ୍ରତି ତାଙ୍କର ଅବିଶ୍ୱାସକୁ ଦୋହରାଇ ସେ କହିଥିଲେ ଯେ, ଇରାନ କେବେ ଆମେରିକୀୟମାନଙ୍କୁ ବିଶ୍ୱାସ କରିନାହିଁ ଏବଂ କେବେମଧ୍ୟ କରିବ ନାହିଁ। ଇରାନ ଆମେରିକା ସହିତ ଭବିଷ୍ୟତରେ ଯେକୌଣସି କାରବାରରେ ସତର୍କତା ଅବଲମ୍ବନ କରିବ। ଗାଲିବାଫ ଏହା ମଧ୍ୟ କହିଛନ୍ତି ଯେ, ଇରାନ ଏହି ଗୁରୁତ୍ୱପୂର୍ଣ୍ଣ ସମୁଦ୍ର ମାର୍ଗ ପାଇଁ ଏକ ଟେଲିଫୋନ୍ ହଟଲାଇନ୍ ପ୍ରତିଷ୍ଠା କରିବାକୁ ରାଜି ହୋଇଛି ଯାହାଦ୍ୱାରା ଆମେରିକା ଏବଂ ଅନ୍ୟାନ୍ୟ ଦେଶଗୁଡ଼ିକ ସହିତ ଏହି ମାର୍ଗ ଦେଇ ଯାଉଥିବା ଜାହାଜ ସଂକ୍ରାନ୍ତରେ କୌଣସି ଭୁଲ ବୁଝାମଣାକୁ ରୋକିବ ଏବଂ ସମାଧାନ କରାଯାଇପାରିବ।