୧୫ରେ ଶପଥ ନେବେ ବିହାରର ନୂଆ ମୁଖ୍ୟମନ୍ତ୍ରୀ

ପାଟନା:  ବିହାର ମୁଖ୍ୟମନ୍ତ୍ରୀ ନୀତିଶ କୁମାର ଆସନ୍ତାକାଲି ତଥା ଏପ୍ରିଲ ୧୦ ତାରିଖରେ ରାଜ୍ୟସଭାକୁ ଯାଉଥିବାରୁ ଆସନ୍ତା ସପ୍ତାହରେ ବିହାରକୁ ଏକ ନୂଆ ମୁଖ୍ୟମନ୍ତ୍ରୀ ମିଳିବା ଏକପ୍ରକାର ସୁନିଶ୍ଚିତ ହୋଇଯାଇଛି। ଶୁକ୍ରବାର ଶପଥ ଗ୍ରହଣ ପରେ ନୀତିଶ ପାଟନା ଫେରିବେ ଏବଂ ୧୩ ତାରିଖରେ କ୍ୟାବିନେଟ୍ ବୈଠକ ପରେ ୧୪ ତାରିଖରେ ନିଜ ପଦରୁ ଇସ୍ତଫା ଦେଇପାରନ୍ତି। ସମ୍ଭାବନା ରହିଛି ଯେ, ଆସନ୍ତା ୧୫ ତାରିଖରେ ପାଟନାର ଗାନ୍ଧୀ ମଇଦାନରେ ନୂଆ ମୁଖ୍ୟମନ୍ତ୍ରୀଙ୍କ ଶପଥ ଗ୍ରହଣ ଉତ୍ସବ ଅନୁଷ୍ଠିତ ହେବ। ତେବେ ଏହି ନୂଆ ସରକାରରେ ନୀତିଶଙ୍କ ପୁଅ ନିଶାନ୍ତ କୁମାରଙ୍କୁ ଉପ-ମୁଖ୍ୟମନ୍ତ୍ରୀ ପଦ ମିଳିବା ନେଇ ଚର୍ଚ୍ଚା ଜୋର ଧରିଛି। ରାଜ୍ୟ ବିଧାନସଭାରେ ସବୁଠାରୁ ବଡ଼ ଦଳ ଭାବେ ବିଜେପି ଏବେ ସରକାରର ନେତୃତ୍ୱ ନେବାକୁ ପ୍ରସ୍ତୁତ ହେଉଛି। ମୁଖ୍ୟମନ୍ତ୍ରୀ ଦୌଡ଼ରେ ଉପ-ମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀ ଓ ବିଜୟ କୁମାର ସିହ୍ନାଙ୍କ ନାମ ସବୁଠାରୁ ଆଗରେ ରହିଛି। ଏଥିସହ କେନ୍ଦ୍ର ମନ୍ତ୍ରୀ ନିତ୍ୟାନନ୍ଦ ରାୟ, ସଞ୍ଜୀବ ଚୌରାସିଆ, ନୀତିଶ ମିଶ୍ର, ଦିଲ୍ଲୀପ ଜୈସୱାଲ ଓ ବରିଷ୍ଠ ନେତା ରାମକୃପାଳ ଯାଦବଙ୍କ ନାମକୁ ନେଇ ମଧ୍ୟ ଦଳ ଭିତରେ ମାନସମନ୍ଥନ ଜାରି ରହିଛି। ୧୪ ତାରିଖରେ ଏନଡିଏ ବିଧାୟକ ଦଳ ବୈଠକରେ ନୂଆ ନେତାଙ୍କ ନାମ ଉପରେ ଚୂଡ଼ାନ୍ତ ମୋହର ବାଜିବ।