ୟୁକ୍ରେନ୍ ଉପରେ ରୁଷର ପୁଣି ଆକ୍ରମଣ:୪ ଜଣଙ୍କ ମୃତ୍ୟୁ
ମସ୍କୋ: ରୁଷ ସେନା ୟୁକ୍ରେନର ଅନେକ ପ୍ରମୁଖ ସହରକୁ ଟାର୍ଗେଟ କରି ୧୮ ବାଲିଷ୍ଟିକ୍ କ୍ଷେପଣାସ୍ତ୍ର ଏବଂ ୨୯୩ ଡ୍ରୋନ୍ ସହିତ ଏପର୍ଯ୍ୟନ୍ତର ସବୁଠାରୁ ବଡ଼ ଆକ୍ରମଣ କରିଛି। ଏହି ଆକ୍ରମଣ ରାଜଧାନୀ କିଭ୍ ଏବଂ ଖାରକିଭ୍ ସମେତ ଅନେକ ଅଞ୍ଚଳରେ ବ୍ୟାପକ ଧ୍ୱଂସ ଘଟାଇଛି। ଅକ୍ରମଣରେ ୪ ଜଣଙ୍କର ଜୀବନ ଯାଇଛି। ଏଥିରେ ୟୁକ୍ରେନର ଶକ୍ତି ବ୍ୟବସ୍ଥା ଏବଂ ଆବାସିକ କୋଠାକୁ ଟାର୍ଗେଟ କରାଯାଇଛି।
ଆକ୍ରମଣରେ ରୁଷ ସେନା ବ୍ୟାପକ ଭାବରେ ଇସ୍କନ୍ଦର-ଏମ୍ ବାଲିଷ୍ଟିକ୍ କ୍ଷେପଣାସ୍ତ୍ର ଏବଂ ଶାହେଦ୍ ଡ୍ରୋନ୍ ବ୍ୟବହାର କରିଥିଲା। ରାଜଧାନୀ କିଭ୍ର ସାମରିକ ପ୍ରଶାସନ ରିପୋର୍ଟ କରିଛି ଯେ, ମାତ୍ର ଗୋଟିଏ ଘଣ୍ଟା ମଧ୍ୟରେ ସହର ଉପରେ କ୍ଷେପଣାସ୍ତ୍ର ମାଡ଼ କରାଯାଇଥିଲା। ଯାହା ଫଳରେ ଲୋକଙ୍କ ମଧ୍ୟରେ ଆତଙ୍କ ସୃଷ୍ଟି ହୋଇଥିଲା। ୟୁକ୍ରେନୀୟ ବାୟୁସେନା ପକ୍ଷରୁ ୨୪୦ ଡ୍ରୋନ୍ ଏବଂ ୭ କ୍ଷେପଣାସ୍ତ୍ରକୁ ଖସାଇ ଦିଆଯାଇଥିଲା। ତେବେ ଅବଶିଷ୍ଟ ଡ୍ରୋନ୍ ଓ କ୍ଷେପଣାସ୍ତ୍ର ଲକ୍ଷ୍ୟଭେଦ କରିବାରେ ସଫଳ ହୋଇଥିଲେ।
ଏହି ଆକ୍ରମଣରେ ସହର ଉପକଣ୍ଠରେ ଥିବା ଏକ ପୋଷ୍ଟାଲ୍ ଟର୍ମିନାଲ ଉପରେ ହୋଇଥିବା ଆକ୍ରମଣରେ ଚାରି ଜଣ କର୍ମଚାରୀଙ୍କ ମୃତ୍ୟୁ ଘଟିଛି। ଅନ୍ୟ ଛଅ ଜଣ ଗୁରୁତର ଆହତ ହୋଇଛନ୍ତି ଓ ଟର୍ମିନାଲ କୋଠା ସମ୍ପୂର୍ଣ୍ଣ ଧ୍ୱଂସ ହୋଇଯାଇଛି। ଉଦ୍ଧାରକାରୀ ଦଳଗୁଡ଼ିକ ଭଗ୍ନାବଶେଷ ତଳେ ଫସି ରହିଥିବା ଲୋକଙ୍କୁ ଉଦ୍ଧାର କରିବା ପାଇଁ ରାତିସାରା ଅଭିଯାନ ଚଳାଇ ପ୍ରାୟ ୩୦ ଜଣଙ୍କୁ ବାହାର କରାଯାଇଛି। ଏହାବାଦ୍ ଏକ ତାପଜ ବିଦ୍ୟୁତ୍ କେନ୍ଦ୍ର ଗୁରୁତର ଭାବରେ କ୍ଷତିଗ୍ରସ୍ତ ହୋଇଛି । ବିଦ୍ୟୁତ୍ ଭିତ୍ତିଭୂମିକୁ ଟାର୍ଗେଟ କରାଯିବା ପରେ କିଭ୍ ଏବଂ ଏହାର ଆଖପାଖରେ ଜରୁରୀକାଳୀନ ବିଦ୍ୟୁତ୍ କାଟ୍ ଲାଗୁ କରାଯାଇଛି। ଅତ୍ୟଧିକ ଥଣ୍ଡା ଏବଂ ଶୂନରୁ କମ୍ ତାପମାତ୍ରା ସହିତ ବିଦ୍ୟୁତ୍ ବିଭ୍ରାଟ ଲକ୍ଷ ଲକ୍ଷ ପରିବାରକୁ ଗରମ ନକରି ଛାଡ଼ି ଦେଇଛି।
