ରାଜସ୍ଥାନ ହାଇକୋର୍ଟ ମୁଖ୍ୟ ବିଚାରପତିଙ୍କୁ ପଦରୁ ହଟାଇବାକୁ ସିଜେଆଇଙ୍କୁ ଚିଠି ଲେଖିଲେ ସୁପ୍ରିମକୋର୍ଟ ବିଚାରପତି

ନୂଆଦିଲ୍ଲୀ: ସୁପ୍ରିମକୋର୍ଟର ବିଚାରପତି ଜଷ୍ଟିସ୍ ସନ୍ଦୀପ ମେହେଟା ଭାରତର ପ୍ରଧାନ ବିଚାରପତି (ସିଜେଆଇ) ଜଷ୍ଟିସ ସୂର୍ଯ୍ୟକାନ୍ତଙ୍କୁ ଚିଠି ଲେଖି ରାଜସ୍ଥାନ ହାଇକୋର୍ଟର ମୁଖ୍ୟ ଭାବରେ ତୁରନ୍ତ ଅନ୍ୟ ରାଜ୍ୟର ଜଣେ ମୁଖ୍ୟ ବିଚାରପତିଙ୍କୁ ନିଯୁକ୍ତି ଦେବାକୁ ଅନୁରୋଧ କରିଛନ୍ତି। ସେ ଅଭିଯୋଗ କରିଛନ୍ତି ଯେ, ରାଜସ୍ଥାନ ହାଇକୋର୍ଟର କାର୍ଯ୍ୟକାରୀ ମୁଖ୍ୟ ବିଚାରପତି ଜଷ୍ଟିସ୍‌ ସଞ୍ଜୀବ ପ୍ରକାଶ ଶର୍ମା ତାଙ୍କ ପ୍ରଶାସନିକ କ୍ଷମତାର ଅପବ୍ୟବହାର କରୁଛନ୍ତି ଓ ଧନୀ ମକଦ୍ଦମାକାରୀଙ୍କୁ ସପକ୍ଷରେ ଆଣିବା ପାଇଁ ମାମଲା ତାଲିକାରେ ହେରଫେର୍‌ କରୁଛନ୍ତି। ଜଷ୍ଟିସ ଶର୍ମା ଆସନ୍ତା ମାସ ଅବସର ନେବେ। ଅଗଷ୍ଟ ମାସ ୨, ୧୦ ଓ ୧୭ ତାରିଖରେ ଲେଖାଯାଇଥିବା ତିନୋଟି ଚିଠିରେ ଜଷ୍ଟିସ୍ ମେହେଟା ଅଭିଯୋଗ ଆଣିଛନ୍ତି ଯେ, ଜଷ୍ଟିସ୍ ଶର୍ମା ତାଙ୍କ କ୍ଷମତାର ଅପବ୍ୟବହାର କରି ପକ୍ଷପାତିତା କରୁଛନ୍ତି। ଅଗ‌ଷ୍ଟ ୨ ତାରିଖରେ ଜଷ୍ଟିସ୍ ମେହେଟା ଚିଠି ଲେଖି ଅଭିଯୋଗ କରିଛନ୍ତି ଯେ, ରାଜସ୍ଥାନ ଗସ୍ତ ସମୟରେ ହାଇକୋର୍ଟଙ୍କ ଅନେକ ବିଚାରପତି ତାଙ୍କୁ ଭେଟିଥିଲେ ଓ ଜ‌ଷ୍ଟିସ ଏସ୍‌ ପି ଶର୍ମାଙ୍କ ବ୍ୟବହାରକୁ ନେଇ ଅସନ୍ତୋଷ ପ୍ରକାଶ କରିଥିଲେ। ଚିଠି ଅନୁଯାୟୀ, ଶର୍ମା କଥିତ ଭାବେ ନିଜ ସହକର୍ମୀ ଅନ୍ୟ ବିଚାରପତିଙ୍କୁ କାର୍ଯ୍ୟାନୁଷ୍ଠାନ ଓ ବଦଳିର ଧମକ ଦେଉଛନ୍ତି। ଏପରିକି ଏଥିପାଇଁ ସିଜେଆଇ ସହିତ ତାଙ୍କର ଘନିଷ୍ଠତାର ଦ୍ବାହି ମଧ୍ୟ ଦେଉଛନ୍ତି। ଜଷ୍ଟିସ୍ ମେହେଟା ତାଙ୍କ ଅଗଷ୍ଟ ୨ ଚିଠିରେ କହିଛନ୍ତି ଯେ, ସେ ପୂର୍ବରୁ ଏପରି ଅନେକ ଉଦାହରଣ ମୁଖ୍ୟ ବିଚାରପତିଙ୍କ ଦୃଷ୍ଟିକୁ ଆଣିଥିଲେ, ଯେଉଁଥିରେ ଅନ୍ୟ ଖଣ୍ଡପୀଠରେ ତାଲିକାଭୁକ୍ତ ମାମଲାଗୁଡ଼ିକ ମଧ୍ୟ ସାମିଲ ଥିଲା ଯାହାକୁ ହଠାତ୍ ପ୍ରତ୍ୟାହାର କରି ଜଷ୍ଟିସ୍ ଶର୍ମାଙ୍କ କୋର୍ଟକୁ କୌଣସି ଯଥାର୍ଥ କାରଣ ବିନା ସ୍ଥାନାନ୍ତର କରାଯାଇଥିଲା। ସେ କହିଛନ୍ତି ଯେ, ସିଜେଆଇ ପ୍ରଥମେ ତାଙ୍କୁ ଏପରି ମାମଲାର ଏକ ତାଲିକା ପ୍ରଦାନ କରିବାକୁ କହିଥିଲେ କିନ୍ତୁ ପରେ କହିଥିଲେ ଯେ, ଅଭିଯୋଗଗୁଡ଼ିକୁ ଲିଖିତ ଭାବରେ ରଖିବାର କୌଣସି ଆବଶ୍ୟକତା ନାହିଁ ଓ ଉପଯୁକ୍ତ କାର୍ଯ୍ୟାନୁଷ୍ଠାନ ନିଆଯିବ ବୋଲି ତାଙ୍କୁ ଆଶ୍ୱାସନା ଦେଇଥିଲେ। ତଥାପି ଆଜି ପର୍ଯ୍ୟନ୍ତ ତାଙ୍କ ରାଜ୍ୟର ହାଇକୋର୍ଟରେ ଅନ୍ୟ ଏକ ରାଜ୍ୟର ମୁଖ୍ୟ ବିଚାରପତିଙ୍କୁ ନିଯୁକ୍ତି ଦେବା ପାଇଁ କରାଯାଇଥିବା ଅନୁରୋଧର କୌଣସି ସକାରାତ୍ମକ ଉତ୍ତର ମିଳିନାହିଁ ବୋଲି ଜଷ୍ଟିସ୍ ମେହେଟା ଲେଖିଛନ୍ତି।