ପାକିସ୍ତାନର ସ୍ୱର୍ଣ୍ଣପଦକ ବିଜୟିନୀଙ୍କ ମୃତ୍ୟୁକୁ ନେଇ ତଦନ୍ତ; ଅଭିଯୁକ୍ତ ଗିରଫ, ଘଟଣାରେ ପ୍ରଧାନମନ୍ତ୍ରୀଙ୍କ ହସ୍ତକ୍ଷେପ
ଇସଲାମାବାଦ: ଆମେରିକାର ପ୍ରସିଦ୍ଧ ହାର୍ଭାର୍ଡ ବିଶ୍ୱବିଦ୍ୟାଳୟରେ ଉଚ୍ଚଶିକ୍ଷା ଗ୍ରହଣ କରି ବୈଜ୍ଞାନିକ ହେବାର ସ୍ୱପ୍ନ ଦେଖିଥିଲେ ପାକିସ୍ତାନର ପଦାର୍ଥ ବିଜ୍ଞାନ ସ୍ନାତକ ତଥା ସ୍ୱର୍ଣ୍ଣପଦକ ବିଜୟିନୀ ଲାଇବା ଇଜାଜ। କିନ୍ତୁ ବିଦେଶରେ ପାଠପଢ଼ା, ଛାତ୍ରବୃତ୍ତି ଓ ଆମେରିକାର ଭିସା କରାଇଦେବାର ପ୍ରତିଶ୍ରୁତି ଦେଇ ହୋଇଥିବା ଅଭିଯୋଗଭିତ୍ତିକ ଠକେଇ ତାଙ୍କ ପରିବାରକୁ ଗଭୀର ଆର୍ଥିକ ଓ ମାନସିକ ସଙ୍କଟକୁ ଠେଲି ଦେଇଥିଲା। ଏହି ଘଟଣାରେ ପାକିସ୍ତାନର ଫେଡେରାଲ ଇନଭେଷ୍ଟିଗେସନ୍ ଏଜେନ୍ସି (ଏଫ୍ଆଇଏ) ତଦନ୍ତ ଆରମ୍ଭ କରିଛି। ଅଭିଯୁକ୍ତ ମହମ୍ମଦ ନୋମାନଙ୍କୁ ଗିରଫ କରାଯାଇଥିବାବେଳେ ଅନ୍ୟ ସମ୍ପୃକ୍ତ ବ୍ୟକ୍ତିଙ୍କ ଭୂମିକା ମଧ୍ୟ ଯାଞ୍ଚ କରାଯାଉଛି। ଅକ୍ଟୋବର ୯ ତାରିଖରେ ଇସଲାମାବାଦର ଜି-୧୦ ଅଞ୍ଚଳରେ ଲାଇବାଙ୍କ ମୃତଦେହ ମିଳିଥିଲା। ତାଙ୍କ ମୃତ୍ୟୁର ପରିସ୍ଥିତି ଏବଂ ଅଭିଯୋଗ ହୋଇଥିବା ଆର୍ଥିକ ଠକେଇ ମଧ୍ୟରେ ସମ୍ପର୍କ ରହିଛି କି ନାହିଁ, ତାହା ତଦନ୍ତ କରାଯାଉଛି।
ପାକିସ୍ତାନର ପଞ୍ଜାବ ପ୍ରଦେଶର ସରଗୋଧା ଅଞ୍ଚଳର ବାସିନ୍ଦା ଲାଇବା ଇସଲାମାବାଦସ୍ଥିତ ଇଣ୍ଟରନ୍ୟାସନାଲ ଇସଲାମିକ୍ ୟୁନିଭର୍ସିଟିରୁ ପଦାର୍ଥ ବିଜ୍ଞାନରେ ସ୍ନାତକ ହାସଲ କରିଥିଲେ। ସେ ଏହି ବିଷୟରେ ସ୍ୱର୍ଣ୍ଣପଦକ ମଧ୍ୟ ପାଇଥିଲେ। ତାଙ୍କ ପରିବାରର ଅଭିଯୋଗ ଅନୁଯାୟୀ, ଆମେରିକାରେ ନାମଲେଖା, ଛାତ୍ରବୃତ୍ତି ଓ ଭିସା କରାଇଦେବାକୁ କହି ଜଣେ କନ୍ସଲଟାଣ୍ଟ ପରିବାରଠାରୁ ପ୍ରାୟ ୯୩ ଲକ୍ଷ ପାକିସ୍ତାନୀ ଟଙ୍କା ନେଇଥିଲେ। ଏଥିପାଇଁ ପରିବାର ପକ୍ଷରୁ ଜମି ବିକ୍ରି କରାଯିବା ସହ ମାଆଙ୍କ ଗହଣା ବନ୍ଧକ ରଖାଯାଇଥିଲା।
ତଦନ୍ତକାରୀ ସଂସ୍ଥାର ଅଭିଯୋଗ ଅନୁଯାୟୀ, ଲାଇବା ଓ ତାଙ୍କ ପରିବାରକୁ ନକଲି ବିଶ୍ୱବିଦ୍ୟାଳୟ ନାମଲେଖା ପତ୍ର, ଛାତ୍ରବୃତ୍ତି ଅନୁମୋଦନପତ୍ର ଏବଂ ଫି’ ଜମା ରସିଦ ଦିଆଯାଇଥିଲା। ଆମେରିକାର ଭିସା ପ୍ରକ୍ରିୟା ସମୟରେ ଦସ୍ତାବିଜ୍ଗୁଡ଼ିକର ସତ୍ୟତା ନେଇ ସନ୍ଦେହ ସୃଷ୍ଟି ହେବା ପରେ ଠକେଇର ଅଭିଯୋଗ ସାମ୍ନାକୁ ଆସିଥିଲା। ମୋଟ ଅର୍ଥରୁ ପ୍ରାୟ ୨୯ ଲକ୍ଷ ଟଙ୍କା ବ୍ୟାଙ୍କ ମାଧ୍ୟମରେ ଦିଆଯାଇଥିବାବେଳେ ଅବଶିଷ୍ଟ ଅର୍ଥ ନଗଦ ଆକାରରେ ପ୍ରଦାନ କରାଯାଇଥିବା ରିପୋର୍ଟରେ ଉଲ୍ଲେଖ ରହିଛି।
ଘଟଣାକୁ ଗୁରୁତ୍ୱର ସହ ନେଇ ପାକିସ୍ତାନର ପ୍ରଧାନମନ୍ତ୍ରୀ ଶେହବାଜ ସରିଫ ଇସଲାମାବାଦ ପୁଲିସର ମୁଖ୍ୟ ଓ ମୁଖ୍ୟ କମିଶନରଙ୍କୁ ଅଭିଯୁକ୍ତଙ୍କ ବିରୋଧରେ ତ୍ୱରିତ ପଦକ୍ଷେପ ନେବାକୁ ନିର୍ଦ୍ଦେଶ ଦେଇଛନ୍ତି। ଗୃହମନ୍ତ୍ରୀ ମୋହସିନ ନକଭି ମଧ୍ୟ ମୃତ ଯୁବତୀଙ୍କ ପରିବାରକୁ ଭେଟି ନ୍ୟାୟ ପ୍ରଦାନ ପାଇଁ ପଦକ୍ଷେପ ନେବାର ଆଶ୍ୱାସନା ଦେଇଛନ୍ତି। ଏହି ଘଟଣା ବିଦେଶରେ ପାଠପଢ଼ିବାକୁ ଇଚ୍ଛୁକ ଛାତ୍ରଛାତ୍ରୀଙ୍କୁ ଠକେଇରୁ ସୁରକ୍ଷା ଦେବା ଏବଂ ଶିକ୍ଷା ପରାମର୍ଶଦାତା ସଂସ୍ଥାଗୁଡ଼ିକର କାର୍ଯ୍ୟପ୍ରଣାଳୀ ଉପରେ ଯାଞ୍ଚର ଆବଶ୍ୟକତାକୁ ପୁଣିଥରେ ସାମ୍ନାକୁ ଆଣିଛି। ତଦନ୍ତରେ ଦୋଷୀ ସାବ୍ୟସ୍ତ ହେଉଥିବା ବ୍ୟକ୍ତିଙ୍କ ବିରୋଧରେ ଆଇନ ଅନୁଯାୟୀ ପଦକ୍ଷେପ ନିଆଯିବ ବୋଲି କର୍ତ୍ତୃପକ୍ଷ କହିଛନ୍ତି।
Tags:
