ତୈଳ ସଙ୍କଟ ଯୋଗୁଁ କେନିଆରେ ଭୟଙ୍କର ଗୃହଯୁଦ୍ଧ ପରିସ୍ଥିତି, ୪ ମୃତ

ନାଇରୋବି: ଆମେରିକା ଓ ଇରାନ ମଧ୍ୟରେ ଚାଲିଥିବା ସାମରିକ ସଂଘର୍ଷର କୁପ୍ରଭାବ ଏବେ ଆଫ୍ରିକାରେ ପହଞ୍ଚିଛି। ଇରାନ ଦ୍ୱାରା ପ୍ରମୁଖ ଜଳପଥ ହର୍ମୁଜ୍ ପ୍ରଣାଳୀ ବନ୍ଦ କରାଯିବା ଫଳରେ ବିଶ୍ୱ ତୈଳ ଯୋଗାଣ ବାଧାପ୍ରାପ୍ତ ହୋଇଛି, ଯାହା କେନିଆରେ ଏକ ଚରମ ଇନ୍ଧନ ସଙ୍କଟ ସୃଷ୍ଟି କରିଛି। ସରକାରଙ୍କ ପକ୍ଷରୁ ଡିଜେଲ ଦରରେ ୨୩.୫ ପ୍ରତିଶତ ବୃଦ୍ଧି ଘୋଷଣା କରାଯିବା ପରେ ରାଜଧାନୀ ନାଇରୋବି ସମେତ ବିଭିନ୍ନ ପ୍ରମୁଖ ସହରରେ ବ୍ୟାପକ ହିଂସାତ୍ମକ ଆନ୍ଦୋଳନ ମୁଣ୍ଡ ଟେକିଛି। ଉତ୍ତ୍ୟକ୍ତ ବିକ୍ଷୋଭକାରୀମାନେ ରାସ୍ତା ଅବରୋଧ କରି ଯାନବାହନରେ ନିଆଁ ଲଗାଇବା ସହ ସାଧାରଣ ପରିବହନ ବ୍ୟବସ୍ଥାକୁ ସମ୍ପୂର୍ଣ୍ଣ ଅଚଳ କରିଦେଇଛନ୍ତି। ଏହି ରକ୍ତାକ୍ତ ସଂଘର୍ଷରେ ୪ ଜଣ ନାଗରିକଙ୍କ ମୃତ୍ୟୁ ଘଟିଥିବା ବେଳେ ୩୦ରୁ ଅଧିକ ଲୋକ ଆହତ ହୋଇଛନ୍ତି ବୋଲି ଗୃହମନ୍ତ୍ରୀ କିପଚୁମ୍ବା ମୁରକୋମେନ୍ ସୂଚନା ଦେଇଛନ୍ତି। ସୁରକ୍ଷା ଦୃଷ୍ଟିରୁ ସମସ୍ତ ସ୍କୁଲ-କଲେଜ ଓ ବ୍ୟବସାୟିକ ପ୍ରତିଷ୍ଠାନ ବନ୍ଦ ରଖାଯାଇଛି। ଯୁଦ୍ଧ ଆରମ୍ଭ ହେବା ପରଠାରୁ କେନିଆରେ ପେଟ୍ରୋଲ ମୂଲ୍ୟ ୨୦ ପ୍ରତିଶତ ଏବଂ ଡିଜେଲ ମୂଲ୍ୟ ପ୍ରାୟ ୪୫.୮ ପ୍ରତିଶତ ବୃଦ୍ଧି ପାଇଛି, ଯାହା ବୃଦ୍ଧି ପାଉଥିବା ମୁଦ୍ରାସ୍ଫୀତି ସହ କେନିଆ ସରକାରଙ୍କ ଉପରେ ପ୍ରବଳ ଚାପ ସୃଷ୍ଟି କରିଛି। ଜନସାଧାରଣଙ୍କୁ ଆଶ୍ୱସ୍ତି ଦେବା ପାଇଁ ସରକାର ୩୮.୫ ମିଲିୟନ୍ ଡଲାରର ସହାୟତା ରାଶି ଖର୍ଚ୍ଚ କରିବା ସହ ଇନ୍ଧନ ଗୁଣବତ୍ତା ମାନକକୁ ମଧ୍ୟ ଅସ୍ଥାୟୀ ଭାବେ ସ୍ଥଗିତ ରଖିଛନ୍ତି। ଯଦିଓ କେନିଆ ପୂର୍ବ ଆଫ୍ରିକାର ସବୁଠାରୁ ଦ୍ରୁତ ଅଭିବୃଦ୍ଧିଶୀଳ ଅର୍ଥନୀତି ମଧ୍ୟରୁ ଗୋଟିଏ, ମାତ୍ର ଏହି ଅପ୍ରତ୍ୟାଶିତ ସଙ୍କଟ ଯୋଗୁଁ ଦେଶର ୫୦ ନିୟୁତ ଜନସଂଖ୍ୟା ମଧ୍ୟରୁ ଦାରିଦ୍ର୍ୟ ସୀମାରେଖା ତଳେ ଥିବା ପ୍ରାୟ ଏକ ତୃତୀୟାଂଶ ନାଗରିକଙ୍କ ଜୀବନଯାତ୍ରା ସମ୍ପୂର୍ଣ୍ଣ ବିପନ୍ନ ହୋଇପଡ଼ିଛି।