ଅହମଦାବାଦରେ ଜାଲ୍ ରକ୍ତଚାପ ଔଷଧ କାରବାର କରି ୩ ଗିରଫ

ଅହମଦାବାଦ: ଗୁଜରାଟର ଅହମଦାବାଦ କ୍ରାଇମ୍ ବ୍ରାଞ୍ଚ ଏବଂ ଖାଉଟି ଓ ଔଷଧ ନିୟନ୍ତ୍ରଣ ବିଭାଗର ମିଳିତ ଚଢ଼ାଉରେ ଏକ ବଡ଼ ଜାଲ୍ ଔଷଧ କାରବାରର ପର୍ଦ୍ଦାଫାଶ ହୋଇଛି। ସହରରେ ବିକ୍ରି ହେଉଥିବା ପ୍ରାୟ ୧୨୦୦ ଷ୍ଟ୍ରିପ୍ ଜାଲ୍ ରକ୍ତଚାପ ଔଷଧ ଜବତ କରାଯିବା ସହ ଜଣେ ମେଡିକାଲ ଷ୍ଟୋର୍ ମାଲିକଙ୍କ ସମେତ ତିନି ଜଣଙ୍କୁ ଗିରଫ କରାଯାଇଛି। ଏହି ଘଟଣାରେ ସେହି ମେଡିକାଲ ସହ ଜଡ଼ିତ ଦର୍ଶିଲ ସଂଘଭି ଏବଂ ଉତ୍ତର ପ୍ରଦେଶ ଲକ୍ଷ୍ନୌର ଦେବେନ୍ଦ୍ର ଯାଦବ ଓ ଉମଙ୍ଗ ରସ୍ତୋଗୀଙ୍କୁ ଗିରଫ କରାଯାଇଛି। ୧୮ ପ୍ରତିଶତ କମିଶନ ପାଇବା ଆଶାରେ ଦର୍ଶିଲ ଏହା ଜାଲ୍ ଜାଣି ମଧ୍ୟ ବିକ୍ରି କରୁଥିଲେ। ତଦନ୍ତରୁ ଜଣାପଡ଼ିଛି ଯେ, ଗତ ୪ ମାସ ମଧ୍ୟରେ ଅହମଦାବାଦର ପ୍ରାୟ ୧,୫୦୦ ଷ୍ଟ୍ରିପ୍ (ପ୍ରାୟ ୧୫,୦୦୦ ଜାଲ୍ ଟାବଲେଟ୍) ରୋଗୀଙ୍କୁ ବିକ୍ରି ସରିଛି। ପ୍ରତି ଷ୍ଟ୍ରିପକୁ ୧୧୨.୯୦ ଟଙ୍କାରେ ବିକ୍ରି କରାଯାଉଥିଲା। ଅହମଦାବାଦର ସାଟେଲାଇଟ୍ ଅଞ୍ଚଳରେ ଥିବା ଏକ ଔଷଧ ଦୋକାନରୁ ଏହି ଜାଲ୍ ଔଷଧ ବିକ୍ରି ନେଇ ଅଭିଯୋଗ ଆସିବା ପରେ ତଦନ୍ତ ଆରମ୍ଭ ହୋଇଥିଲା। ତଦନ୍ତକାରୀ ଦଳ ଜାଣିବାକୁ ପାଇଥିଲେ ଯେ ମେଡିକାଲ ଫାର୍ମାସି ମାଧ୍ୟମରେ ସହରର ୧୧ଟି ମେଡିକାଲ ଷ୍ଟୋରକୁ ଏହି ଔଷଧ ଯୋଗାଯାଇଥିଲା। ଏହି ଜାଲ୍ ଔଷଧ ପ୍ରଥମେ ଉତ୍ତରାଖଣ୍ଡରୁ ଲକ୍ଷ୍ନୌ ଅଣାଯାଇଥିଲା। ସେଠାରୁ ୩,୬୦୦ ଷ୍ଟ୍ରିପ୍ ମଧ୍ୟରୁ ୨,୭୦୦ ଅହମଦାବାଦ ଏବଂ ୯୦୦ ମାଇସୁର ପଠାଯାଇଥିଲା। ଗୁଜରାଟର ଅହମଦାବାଦ ବ୍ୟତୀତ ସୁରଟ, ଭାବନଗର, ନାଦିଆଦ ଏବଂ ଭୁଜରେ ମଧ୍ୟ ଏହାକୁ ବିକ୍ରି କରାଯାଇଛି। ଅଭିଯୁକ୍ତମାନଙ୍କୁ ୭ ଦିନିଆ ପୋଲିସ ରିମାଣ୍ଡରେ ପଠାଇଛନ୍ତି। ବର୍ତ୍ତମାନ କ୍ରାଇମ୍ ବ୍ରାଞ୍ଚର ୪ଟି ଟିମ୍ ବିଭିନ୍ନ ରାଜ୍ୟରେ ଚଢ଼ାଉ ଜାରି ରଖିଛନ୍ତି ଏବଂ ଏହି ଜାଲ୍ ଔଷଧ କେଉଁଠି ତିଆରି ହେଉଥିଲା ସେ ନେଇ ଖୋଳତାଡ଼ କରୁଛନ୍ତି।