ଯଦି ଆପଣଙ୍କୁ କିଛି ସମୟ ପାଇଁ ଟ୍ରାଫିକରେ ପାସ୍ କରିବାକୁ ପଡ଼ିବ, ତେବେ ଆପଣ ସେହି ସମୟରେ ବହୁତ ଅସହଜ ଅନୁଭବ କରିବା ଆରମ୍ଭ କରନ୍ତି । ଟ୍ରାଫିକରେ ଅଟକି ରହିବାକୁ କେହି ବି ପସନ୍ଦ କରନ୍ତି ନାହିଁ, କିନ୍ତୁ କେବେ ଆପଣ ଏପରି ଏକ ସ୍ଥାନ ବିଷୟରେ ଜାଣିଛନ୍ତି ଯେଉଁଠାରେ ଗତ ୭୫ ବର୍ଷ ଧରି ଏକ ବଡ଼ ଟ୍ରାଫିକ ଜାମ ରହିଛି । ଆପଣ ଏହାକୁ ପଢି ଆଶ୍ଚର୍ଯ୍ୟ ହୋଇଥିବେ, କିନ୍ତୁ ଏହା ସମ୍ପୂର୍ଣ୍ଣ ସତ୍ୟ ।
ଦକ୍ଷିଣ ବେଲଜିୟମର ଘନ ଜଙ୍ଗଲରେ ଗତ ୭୫ ବର୍ଷ ଧରି ଭୀଷଣ ଜାମ ଲାଗିରହିଛି । ବାସ୍ତବରେ ବେଲଜିୟମର ଚାଟିଲନ କାର୍ କବରଖାନାରେ କାରଗୁଡ଼ିକ ପାର୍କ କରାଯାଇଛି । କୁହାଯାଏ ଯେ ଦ୍ୱିତୀୟ ବିଶ୍ୱଯୁଦ୍ଧ ସମୟରୁ ହିଁ ଏହି କାର୍ ସବୁ ଛିଡ଼ା ହୋଇଛି । ତେବେ ଏହାକୁ ନେଇ ଅନେକପ୍ରକାର କାହାଣୀ ରହିଆସିଛି । ହେଲେ ବର୍ତ୍ତମାନ ଏହା ଆଖପାଖର ଲୋକଙ୍କ ପାଇଁ ଭୂତପ୍ରେତର ସ୍ଥାନ ପାଲଟିଛି ।
ଏହି କାରଗୁଡ଼ିକ ଏତେ ଦିନ ଧରି ଏଠାରେ ଠିଆ ହୋଇ ରହିଛି ଯେ ଏବେ ସେଥିରେ ଗଛର ଡାଳ ବଢ଼ିବାରେ ଲାଗିଛି । ଘଞ୍ଚ ଜଙ୍ଗଲ ମଧ୍ୟରେ ଏହି ସ୍ଥାନଟି ରହିଥିବାରୁ ଏଗୁଡିକ ଆଉ ଦେଖାଯାଉନାହିଁ । ମାଟିରେ ମିଶିବା ସହ ଗଛ ଉଠିଲାଣି । ତେବେ ଗୋଟିଏ ସ୍ଥାନରେ ଏତେ ସଂଖ୍ୟକ କାର ଛିଡ଼ା ହେବା ରହସ୍ୟମୟ ଲାଗିଥାଏ । ହେଲେ କେତେକ ଲୋକଙ୍କ କହିବା ଅନୁଯାୟୀ ଏହି ସ୍ଥାନ କାର ଡମ୍ପି ଗ୍ରାଉଣ୍ଡ ଥିଲା । ଏଠାରେ ପ୍ରାୟ ୫୦୦ରୁ ଅଧିକ ଗାଡ଼ି ଦେଖିବାକୁ ମିଳିଥାଏ ।
କୁହାଯାଏ ଯେ ବିଶ୍ୱଯୁଦ୍ଧ ସମୟରେ ଏହି କାରଗୁଡ଼ିକୁ ଏଠାରେ ଲୁଚାଇ ରଖିଯାଇଥିଲା ଯାହାଦ୍ୱାରା ପରବର୍ତ୍ତୀ ସମୟରେ ଯୁଦ୍ଧ ପରେ ଖୁସିରେ ନିଜ ଘରକୁ ଯାଇପାରିବେ । ଅନ୍ୟ ଏକ କାହାଣୀ ରହିଛି ଯେ ଆମେରିକୀୟ ସୈନିକମାନେ ଏଠାରେ ଥିବା ଭଙ୍ଗା କାରକୁ ବ୍ୟବହାର କରୁଥିଲେ । ଚାଟିଲନ ଗାଁ ଜଙ୍ଗଲ ମଧ୍ୟରେ ଅବସ୍ଥିତ ଏବଂ ଗଛ ମଧ୍ୟରେ କାର ଲୁଚାଇବା ଗାଁ ଲୋକଙ୍କ ପାଇଁ ସହଜ ଥିଲା । ୨୦୧୦ ମସିହାରେ ଏହି ସ୍ଥାନକୁ ଠାବ କରାଯାଇଥିଲା । ସେବେଠାରୁ ଏହା ସାରା ବିଶ୍ୱରେ ଲୋକଙ୍କ ମଧ୍ୟରେ ରହସ୍ୟ ଏବଂ ଆକର୍ଷଣର କେନ୍ଦ୍ର ହୋଇ ରହିଆସିଛି ।
