ପତ୍ନୀଙ୍କୁ ହତ୍ୟା କଲେ ଇସ୍ରୋର ପୂର୍ବତନ କର୍ମଚାରୀ

ବେଙ୍ଗାଲୁରୁ : ପୂର୍ବତନ ଇସ୍ରୋ କର୍ମଚାରୀଙ୍କ ଜଘନ୍ୟ କାଣ୍ଡ । ସ୍ତ୍ରୀ ଙ୍କ ବେକରେ ଏକ ଟାଓ୍ବେଲ ବାନ୍ଧି ହତ୍ୟା କରିଛନ୍ତି ବେଙ୍ଗାଲୁରୁରେ ଇସ୍ରୋର ଜଣେ ପୂର୍ବତନ କର୍ମଚାରୀ ନାଗେଶ ରାଓ । ପତ୍ନୀ ସନ୍ଧ୍ୟାଶ୍ରୀ ଙ୍କ ହତ୍ୟା ଅଭିଯୋଗରେ ନାଗେଶ ରାଓଙ୍କୁ ଗିରଫ କରାଯାଇଛି । ଗତକାଲି ସକାଳ ପ୍ରାୟ ୧୧ ଟାରେ ଆଭାଲାହାଲି ପୋଲିସ ଷ୍ଟେସନ ଅଂଚଳରେ ଏହି ଘଟଣା ଘଟିଥିଲା । ତେବେ ସେ ପତ୍ନୀଙ୍କୁ ମାରିବା ପରେ ନିଜେ ଆତ୍ମହତ୍ୟା କରିବାକୁ ଚାହୁଁଥିଲେ ବୋଲି ପୋଲିସ ସୂଚନା ଦେଇଛି । 

୬୫ ବର୍ଷୀୟ ନାଗେଶ ଇସ୍ରୋରୁ ଅବସର ପରେ ବେଙ୍ଗାଲୁରୁର ହ୍ବାଇଟଫିଲ୍ଡ ଅଞ୍ଚଳରେ ଭର୍ଚୁଓସୋ ଆପାର୍ଟମେଣ୍ଟ କମ୍ପ୍ଲେକ୍ସରେ ନିଜ ପତ୍ନୀ ସନ୍ଧ୍ୟାଶ୍ରୀଙ୍କ ସହ ରହୁଥିଲେ। ଗତ କିଛି ଦିନ ହେବ ସେ ଚାପଗ୍ରସ୍ତ ରହୁଥିଲେ ଏବଂ ତାଙ୍କ ଚିକିତ୍ସା ଚାଲିଥିଲା । ତାଙ୍କ ମାନସିକ ସ୍ଥିତି ଠିକ୍ ନଥିବା ଜଣେ ବରିଷ୍ଠ ପୁଲିସ ଅଧିକାରୀ ଗଣମାଧ୍ୟମକୁ ସୂଚନା ଦେଇଛନ୍ତି । ନାଗେଶ ନିଜ ପତ୍ନୀଙ୍କୁ ଏକ ଟାୱଲରେ ତଣ୍ଟି ଚିପି ହତ୍ୟା କରିବା ପରେ  ସେ ଫେରାର ନ ହୋଇ ସେହି ଘରେ ହିଁ ରହିଥିଲେ । ପରେ ଏସମ୍ପର୍କରେ ସେ ନିଜର ଜଣେ ସମ୍ପର୍କୀୟଙ୍କୁ ଫୋନ କରି ଜଣାଇଥିଲେ । ପରେ ସମ୍ପର୍କୀୟ ଙ୍କ ଠାରୁ ପୋଲିସକୁ ସୂଚନା ମିଳିଥିଲା । ବେଙ୍ଗାଲୁରୁ ସ୍ଥିତ ଆପାର୍ଟମେଣ୍ଟରୁ ପତ୍ନୀଙ୍କ ଶବ ମିଳିବା ପରେ ବୁଧବାର ନାଗେଶଙ୍କୁ ଗିରଫ କରାଯାଇଛି।

ପଚରାଉଚରା ସମୟରେ ସେ ହତ୍ୟା କରିଥିବା ସ୍ବୀକାର ମଧ୍ୟ କରିଛନ୍ତି। ଉଭୟଙ୍କ କନ୍ୟା ଆମେରିକାରେ ରହନ୍ତି। ପୁଲିସ ତାଙ୍କୁ ଏ ବାବଦରେ ସୂଚନା ଦେବା ସହ ହତ୍ୟା ମାମଲା ରୁଜୁ କରି ଆଗାମୀ ଯାଞ୍ଚ କରୁଛି।