ଗିରଫ ହେଲେ କୋଟିପତି ଫରେଷ୍ଟର

ଭବାନୀପାଟଣା: ଗିରଫ ହେଲେ କୋଟିପତି ଫରେଷ୍ଟର ଭାଗବତ ଭୂଷଣ ବେହେରା। ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଗତକାଲି କଳାହାଣ୍ଡି ଉତ୍ତର ବନଖଣ୍ଡ ଅନ୍ତର୍ଗତ ସଦର ରେଞ୍ଜର ଭଟାଙ୍ଗପଦର ସେକ୍ସନ ଦାୟିତ୍ବରେ ଥିବା ଫରେଷ୍ଟର ଭାଗବତ ଭୂଷଣ ବେହେରାଙ୍କ ଘରେ ଭିଜିଲାନ୍ସ ଚଢ଼ଉ କରିଥିଲା । ଭିଜିଲାନ୍ସ ଦ୍ୱାରା ଗିରଫ ହେବା ପରେ ଆଜି ତାଙ୍କୁ ଭବାନୀପାଟଣା ଭିଜିଲାନ୍ସ ସ୍ପେଶାଲ ଜଜ୍‌ଙ୍କ ସମ୍ମୁଖରେ ହାଜର କରାଯିବ। 

ଭବାନୀପାଟଣା ଭିଜିଲାନ୍ସ ସ୍ପେଶାଲ ଜଜ୍‌ଙ୍କ ସର୍ଚ୍ଚ ୱାରେଣ୍ଟ ଆଧାରରେ ଶୁକ୍ରବାର ଭଟାଙ୍ଗପଦର ଫରେଷ୍ଟର ଭାଗବତ ଭୂଷଣ ବେହେରାଙ୍କ ଘରେ ଭିଜିଲାନ୍ସ ଚଢ଼ାଉ ହୋଇଥିଲା । ଭବାନୀପାଟଣା ସହରସ୍ଥିତ ହିଲ ଟାଉନ ବାସଭବନ, ପୈତୃକ ଗାଁ ଦେଉଣ୍ଡି ଓ ଭଟାଙ୍ଗପଦର ସେକ୍ସନ ଅଫିସରେ ଏକକାଳୀନ ଚଢ଼ାଉ ହୋଇଥିଲା। ଚଢ଼ାଉ ବେଳେ ବାବୁଙ୍କର ୯ଟି ଦାମୀ ପ୍ଲଟ୍ ସହ ପ୍ରାୟ ଅଧେ କିଲେ ସୁନା ମିଳିଥିଲା । ସେହିଭଳି ଫରେଷ୍ଟର ଶ୍ରୀ ବେହେରାଙ୍କ ୯ଟି ଗାଡ଼ି ଠାବ ହୋଇଛି । ସେଥିରେ ୨ଟି କାର୍‌, ୪ଟି ଟ୍ରାକ୍ଟର, ଗୋଟିଏ ବାଇକ, ୨ଟି ହାର୍ଭେଷ୍ଟର ମେସିନ ରହିଛି । ତେବେ ଏଥିମଧ୍ୟରୁ କେତେକ ଗାଡ଼ି ବେନାମୀ ବୋଲି ଭିଜିଲାନ୍ସ ପକ୍ଷରୁ କୁହାଯାଇଛି । ଫରେଷ୍ଟର ଶ୍ରୀ ବେହେରାଙ୍କ ଘରୁ ୨୧୦ ଗ୍ରାମର ସୁନା ଅଳଙ୍କାର ମଧ୍ୟ ଜବତ କରାଯାଇଛି।

ଏହାବ୍ୟତୀତ ବିଭିନ୍ନ ବ୍ୟାଙ୍କରେ ଜମା ଥିବା ୨୩ ଲକ୍ଷ ଟଙ୍କା, କିଛି ପୋଷ୍ଟାଲ୍ ଜମା ଓ ଜୀବନବୀମା ଆଦିର ସୂଚନା ମିଳିଛି । ୨୦୦୦ ମସିହା ଅଗଷ୍ଟ ୨୦ରେ ଜଣେ ଫରେଷ୍ଟଗାର୍ଡ ଭାବେ ସରକାରୀ ଚାକିରି ଆରମ୍ଭ କରିଥିବା ଶ୍ରୀ ବେହେରା ପ୍ରାରମ୍ଭିକ ଦରମା ଭାବେ ୩ ହଜାର ଟଙ୍କା ପାଉଥିଲେ । ପରେ କଳାହାଣ୍ଡି ଉତ୍ତର ଓ ଦକ୍ଷିଣ ବନଖଣ୍ଡର ବିଭିନ୍ନ ସ୍ଥାନରେ ଫରେଷ୍ଟଗାର୍ଡ ଓ ଫରେଷ୍ଟର ଭାବେ ସେ ଚାକିରି କରିଆସୁଛନ୍ତି। ଗତକାଲି ଜବତ ହୋଇଥିବା ସମ୍ପତ୍ତିର ଆକଳନ ୩ କୋଟି ଟଙ୍କା ହେବ ବୋଲି କୁହାଯାଉଛି । କଳାହାଣ୍ଡି ଭିଜିଲାନ୍ସ ଡିଏସ୍‌ପିଙ୍କ ନେତୃତ୍ୱରେ ୩ଟି ଦଳ ଏକକାଳୀନ ଚଢ଼ଉ କରିଥିଲେ।