୨ ଦିନିଆ ରିମାଣ୍ଡରେ ଗଲା ଅରବିନ୍ଦ ଦାସ
ଭୁବନେଶ୍ୱର : ଏସଆଇ ପରୀକ୍ଷା ମହାଦୁର୍ନୀତି । ୨ ଦିନିଆ ପୋଲିସ ରିମାଣ୍ଡରେ ଗଲା ଅନ୍ୟତମ ଅଭିଯୁକ୍ତ ଅରବିନ୍ଦ ଦାସ । ସିବିଆଇ ଅଭିଯୁକ୍ତ ଅରବିନ୍ଦ ଦାସଙ୍କୁ ରିମାଣ୍ଡରେ ନେଇ ମାରାଥନ୍ ଜେରା କରୁଛି । ଦୀଘା ମଡେଲ ଦାୟିତ୍ୱରେ ଥିଲା ଅରବିନ୍ଦ ଦାସ । ଜେରା ବେଳେ ଅନେକ ଗୁରୁତ୍ଵପୂର୍ଣ୍ଣ ତଥ୍ୟ ଓଗାଳିଛି ପୋଲିସ । ରାଜ୍ୟ ବାହାରର ଲିଙ୍କ୍ ଖୋଜି ପାଇଛି ସିବିଆଇ।
ସୂଚନା ମୂତାବକ, ଅରବିନ୍ଦକୁ ତିନି ଦିନିଆ ରିମାଣ୍ଡରେ ନେବାକୁ ସିବିଆଇ ଆବେଦନ କରିଥିଲା। ଅଦାଲତ ଦୁଇଦିନ ଲାଗି ଅନୁମତି ଦେଇଛନ୍ତି। ଆସନ୍ତା ୩ ତାରିଖ ଅପରାହ୍ଣ ପର୍ଯ୍ୟନ୍ତ ସେ ସିବିଆଇର ହେପାଜତରେ ରହିବ। କୋଲକାତା ଦିଘାରେ ହେବାକୁ ଥିବା ପରୀକ୍ଷାର ଅରବିନ୍ଦ ଥିଲା ମୁଖ୍ୟ ଦଲାଲ। ଦିଘାରେ ପରୀକ୍ଷା ଦେବାକୁ ଚୁକ୍ତି କରିଥିବା ୧୧୦ ପରୀକ୍ଷାର୍ଥୀଙ୍କ ହୋଟେଲ୍ ବୁକିଂ କରି ରହଣି ଓ ମନ୍ଦିରରେ ଖାଇବା ବ୍ୟବସ୍ଥା ଅରବିନ୍ଦ ବୁଝୁଥିଲା।
ସେ ପରୀକ୍ଷାର୍ଥୀଙ୍କୁ ଯୋଗାଡ଼ କରିବା ସହ ଟଙ୍କା ଡିଲ୍ରେ ମୁଖ୍ୟ ଭୂମିକା ନେଇଥିଲା । ପରୀକ୍ଷାର୍ଥୀଙ୍କ ସହ ସେ ନିୟମିତ ଯୋଗାଯୋଗ କରିବା ସହ ପ୍ରଶ୍ନପତ୍ର ପ୍ରଦାନ କରୁଥିଲା । ଏହା ବଦଳରେ ପରୀକ୍ଷାର୍ଥୀଙ୍କଠାରୁ ସେମାନଙ୍କ ଅସଲ ଶିକ୍ଷାଗତ ପ୍ରମାଣପତ୍ର ଏବଂ ବ୍ଲାଙ୍କ ଚେକ୍ ସଂଗ୍ରହ କରୁଥିଲା। ସେ ଯୋଗାଡ଼ କରିଥିବା ପରୀକ୍ଷାର୍ଥୀଙ୍କୁ ଚିହ୍ନଟ କରାଯାଇ ତାଲିକା ପ୍ରସ୍ତୁତ କରାଯାଇଛି। ସେମାନଙ୍କ ସହ ଅରବିନ୍ଦର ସାମ୍ନାସାମ୍ନି ଜେରା ପାଇଁ ପ୍ରକ୍ରିୟା ଆରମ୍ଭ ହୋଇଛି।
