ଡବ୍ଲୁଟିସି ଫାଇନାଲ୍: ପ୍ରଥମ ଦିନରେ ବୋଲରଙ୍କୁ କନ୍ଦାଇଲେ ଷ୍ଟିଭ୍ ସ୍ମିଥ୍-ଟ୍ରାଭିସ୍ ହେଡ୍

ଲଣ୍ଡନ: ବିଶ୍ବ ଟେଷ୍ଟ ଚାମ୍ପିଅନ୍ସିପ୍ (ଡବ୍ଲୁଟିସି) ଫାଇନାଲ୍ରେ ଶତକ ମାରିବାରେ ଅଷ୍ଟ୍ରେଲିଆର ଟ୍ରାଭିସ୍ ହେଡ୍ ପ୍ରଥମ ଖେଳାଳି ହୋଇଛନ୍ତି। ଦ ଓଭାଲ୍ରେ ଭାରତ ଓ ଅଷ୍ଟ୍ରେଲିଆ ମଧ୍ୟରେ ଆରମ୍ଭ ହୋଇଥିବା ଡବ୍ଲୁଟିସି ଫାଇନାଲ୍ରେ ହେଡ୍ ଓ ଷ୍ଟିଭ୍ ସ୍ମିଥ୍ଙ୍କ ମଧ୍ୟରେ ଦ୍ବିଶତକୀୟ ଭାଗୀଦାରି (୨୫୧* ରନ୍, ୩୭୦ ବଲ୍) ହୋଇଛି। ଯାହାଫଳରେ ପ୍ରଥମ ଦିନର ଷ୍ଟମ୍ପ୍ସ ଅପସାରଣ ବେଳକୁ ଅଷ୍ଟ୍ରେଲିଆ ୩ ୱିକେଟ୍ ବିନିମୟରେ ୩୨୭ ରନ୍ ସଂଗ୍ରହ କରି ଦୃଢ଼ ସ୍ଥିତିରେ ରହିଛି। ହେଡ୍ ୧୪୬* ଓ ସ୍ମିଥ୍ ୯୫* ରନ୍ କରି ଅପରାଜିତ ଅଛନ୍ତି। ଡବ୍ଲୁଟିସି ଫାଇନାଲ୍ରେ ମଧ୍ୟ ପ୍ରଥମ ଥର ଶତକୀୟ ଭାଗୀଦାରି ହୋଇପାରିଛି। ୫୦ତମ ଟେଷ୍ଟ ଖେଳୁଥିବା ଭାରତୀୟ ଅଧିନାୟକ ରୋହିତ ଶର୍ମା ଟସ୍ ଜିତି ବୋଲିଂ କରିବାକୁ ନିଷ୍ପତ୍ତି ନେଇଥିଲେ। ଘାସୁଆ ପିଚ୍ରୁ ପ୍ରାରମ୍ଭିକ ଫାଇଦା ଉଠାଇ ମହମ୍ମଦ ସିରାଜ ଚତୁର୍ଥ ଓଭରରେ ଉସ୍ମାନ ଖୱାଜାଙ୍କୁ ଖାତା ଖୋଲିବା ପୂର୍ବରୁ ଆଉଟ୍ କରିଥିଲେ। ଡେଭିଡ୍ ୱାର୍ଣ୍ଣର ଓ ମାର୍ନସ ଲବୁସାନ୍ ରକ୍ଷଣାତ୍ମକ ଖେଳୁଥିଲେ ବି ଦଳୀୟ ରନ୍ ୭୧ ହୋଇଥିଲା ବେଳେ ୱାର୍ଣ୍ଣରଙ୍କୁ ଶାର୍ଦୁଳ ଆଉଟ କରି ଦ୍ବିତୀୟ ସଫଳତା ଦେଇଥିଲେ। ୫ ରନ୍ ବ୍ୟବଧାନରେ ଲବୁସାନ୍ଙ୍କୁ ସାମି ପ୍ରଥମ ଶିକାର କରିଥିଲେ। କିନ୍ତୁ ଏହାପରଠୁ ପିଚ୍ରେ ସ୍ମିଥ୍ ଓ ମଧ୍ୟାହ୍ନ ଭୋଜନ ପରେ ବ୍ୟାଟିଂ ଆସିଥିବା ହେଡ୍ ଭାରତୀୟ ବୋଲରଙ୍କୁ ପ୍ରବଳ ଖଟାଇଥିଲେ। ଗୋଟିଏ ପଟରୁ ହେଡ୍ ଦ୍ରୁତ ଭାବେ ରନ୍ ବାହାର କରୁଥିଲା ବେଳେ ସ୍ମିଥ୍ ରକ୍ଷଣାତ୍ମକ ଖେଳୁଥିଲେ। ହେଡ୍ ୧୦୬ ବଲ୍ରୁ ଭାରତ ବିପକ୍ଷରେ ଷଷ୍ଠ ଟେଷ୍ଟ ଶତକ ଅର୍ଜନ କରିଥିଲା ବେଳେ ସ୍ମିଥ୍ ୩୧ତମ ଶତକର ନିକଟତର ହୋଇଛନ୍ତି।