ଖୁବ ଶୀଘ୍ର ନୂଆ ରୂପ ପାଇବ ବାରବାଟୀ ଷ୍ଟାଡିୟମ

କଟକ : ଐତିହାସିକ ବାରବାଟୀ ଷ୍ଟାଡିୟମର ହେବ ନବ କଳେବର I ଖୁବ ଶୀଘ୍ର ବାରବାଟୀ ଷ୍ଟାଡ଼ିୟମର ରୂପାନ୍ତରଣ ପ୍ରକ୍ରିୟା ଆରମ୍ଭ ହେବ I ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ,୫ଟି ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ ବୁଧବାର ବାରବାଟୀ ଷ୍ଟାଡିୟମ ପରିଦର୍ଶନ କରିଛନ୍ତି। ଏହି ସମୟରେ ରାଜ୍ୟରେ କ୍ରିକେଟ ବିକାଶ ସମ୍ପର୍କରେ ଓଡ଼ିଶା କ୍ରିକେଟ ଆସୋସିଏଶନ (ଓସିଏ) ସଭାପତି ପ୍ରଣବ ପ୍ରକାଶ ଦାସ ଏବଂ ଅନ୍ୟ ଅଧିକାରୀଙ୍କ ସହ ଆଲୋଚନା କରିଛନ୍ତି। ଏଥିସହ ବାରବାଟୀ କ୍ରିକେଟ ଷ୍ଟାଡିୟମର ୬୦,୦୦୦ ଆସନ କ୍ଷମତା ବିଶିଷ୍ଟ ଯୋଜନାଗୁଡିକର ସମୀକ୍ଷା କରିଛନ୍ତି। ରାଜ୍ୟର ଏକମାତ୍ର ଏହି ଅନ୍ତର୍ଜାତୀୟ କ୍ରିକେଟ ଷ୍ଟାଡିୟମର ନବକଳେବର ନିମନ୍ତେ ୬୦୦ ରୁ ୭୦୦ କୋଟି ଖର୍ଚ୍ଚ କରାଯିବ ବୋଲି ଜଣାପଡିଛି।

ଆସନ୍ତା ସପ୍ତାହରେ ଭିତ୍ତି ପ୍ରସ୍ତ ସ୍ଥାପନ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ I ଏହି ପ୍ରକଳ୍ପ ରାଜ୍ୟ ସରକାରଙ୍କ ୫ଟି ପରିବର୍ତ୍ତନ ପଦକ୍ଷେପ ଅଧୀନରେ ନିଆଯିବ। ବାରବାଟୀ ଷ୍ଟାଡିୟମ କ୍ରିକେଟର ତଥା ଅନ୍ୟାନ୍ୟ କ୍ରୀଡା ବିଭାଗ ପାଇଁ ସର୍ବୋତ୍ତମ ସୁବିଧା ସହିତ ବିଶ୍ୱ ସ୍ତରୀୟ କ୍ରୀଡା କ୍ୟାମ୍ପସରେ ବିକଶିତ ହେବ। ରାସ୍ତାରୁ ପାର୍କିଂ ଠାରୁ ଷ୍ଟାଡିୟମକୁ ପ୍ରବେଶ ପର୍ଯ୍ୟନ୍ତ ଏବଂ ଖାଦ୍ୟ କୋର୍ଟ, ଶୌଚାଳୟ ଇତ୍ୟାଦି ସୁବିଧାଜନକ ଦୃଷ୍ଟିରୁ ଦର୍ଶକମାନେ ଅନ୍ତର୍ଜାତୀୟ ମାନଦଣ୍ଡ ଅନୁଭବ କରିବେ। ଏହି କ୍ୟାମ୍ପସରେ ଅନ୍ୟାନ୍ୟ କ୍ରୀଡା ବିଭାଗ ପାଇଁ ମଧ୍ୟ ସୁବିଧା ରହିବ।