ଭାରତର ଜାତୀୟ ପାନୀୟ କହିଲେ ଚା’କୁ ହିଁ ବୁଝାଇଥାଏ ବାହାଘର ହେଉ କି ଜନ୍ମଦିନ ସବୁସ୍ଥାନରେ ଏହାର ଚାହିଦା ଥାଏ । କେହି ବନ୍ଧୁ ଆସି ପହଞ୍ଚିବା ସମୟ ହେଉ କି ଯିବା ସମୟ ସବୁବେଳେ ସମସ୍ତଙ୍କୁ ଯଚା ଯାଇଥାଏ ଚା’ । ସେହିଭଳି ଶୀତଦିନ ଆସିଲେ ଏହାର ଚାହିଦା ବେଶି ବଢିଯାଇଥାଏ ।
ଭାରତୀୟ ବଜାରରେ ବିଭିନ୍ନ କିସମର ଚା’ ମିଳିଥାଏ ନାଲି ଚା’, ଖୀର ଚା’, ହର୍ବାଲ ଟି, ଲେମନ ଟି, ଗ୍ରୀନ ଟି ଆଦି ଅନେକ ଚା’ ରହିଛି । ହେଲେ ଫୁଲକୁ ବି ଚା’ରେ ବ୍ୟବହାର କରିହେବ ତାହା ଶୁଣିଲେ ଟିକେ ଅଜବ ଲାଗେ । ତେବେ ଏଭଳି ମଧ୍ୟ କେତେକ ଚା’ ରହିଛି ଯାହାକୁ ଫୁଲ ବ୍ୟବହାର କରି ପ୍ରସ୍ତୁତ କରାଯାଇଥାଏ ।
ଚାମୋମିଲେ ଟି
ଏହି ଚା’କୁ ପ୍ରସ୍ତୁତ କରିବା ପାଇଁ ଏକ ସ୍ବତନ୍ତ୍ର ଧରଣର ଫୁଲକୁ ବ୍ୟବହାର କରାଯାଇଥାଏ । ଏହାର ସ୍ବାଦ ମିଠା ଓ ସେଓ ଫ୍ଲେବରର ହୋଇଥାଏ । ଏହି ଚା’କୁ ସମସ୍ତ ବର୍ଗର ଲୋକ ପିଇବାକୁ ପସନ୍ଦ କରିଥାଆନ୍ତି । ସେହିଭଳି ଏହା ମନକୁ ଶାନ୍ତି ଦେଇ ଚାପ ମୁକ୍ତ କରାଇଥାଏ ।
ଲାଭେଣ୍ଡର ଟି
ଏହି ଫୁଲର କିଛି ଶୁଖିଲା ପାଖୁଡାରେ ଭରି ରହିଥାଏ ସ୍ବାସ୍ଥ୍ୟପୋଯୋଗୀ ଗୁଣ । ଅଧାଚାମଚ ଶୁଖିଲା ଲାଭେଣ୍ଡର ଫୁଲର ଗୁଣ୍ଡ ଶରୀର ପାଇଁ ବେଶ୍ ଉପକାରୀ । ଏହା ଆଙ୍ଗଜାଇଟ୍ ସହ ମାନସିକ ଚାପରୁ ମୁକ୍ତି ଦେଇଥାଏ । ଏହି ଚା’ କେଶ ଝଡିବାକୁ ମଧ୍ୟ ରୋକିଥାଏ ।
ବୋରେଜ୍ ଟି
ଏହି ନିଆରା ଚା’ ନିଜର ରଙ୍ଗ ପାଇଁ ବେଶ୍ ପରିଚିତ । ଏହାର ଗାଢ ନୀଳ ରଙ୍ଗ ସମସ୍ତଙ୍କୁ ଆକୃଷ୍ଠ କରିବାରେ ସକ୍ଷମ ହୋଇଥାଏ । ଏହି ଚା’ର ଅନେକ ଔଷଧୀୟ ଗୁଣ ରହିଛି , ତେଣୁ ଏହାକୁ ପିଇବାର ଅନେକ ଫାଇଦା ରହିଛି ।
ରୋଜ୍ ଟି
ଏହି ଚା ବିଭିନ୍ନ ପ୍ରକାର ରଙ୍ଗରେ ମିଳିଥାଏ, ଏହାକୁ ଚା’ପତି ସହ ମିଶାଯାଇ ଅଲଗା ସ୍ବାଦରେ ପ୍ରସ୍ତୁତ କରାଯାଇଥାଏ । ତେବେ ଏହାର ମାତ୍ରାକୁ ଧ୍ୟାନର ସହ ମିଶାଯାଏ କାରଣ ଏହାର ମାତ୍ରାଧିକ ବ୍ୟବହାର ସୁରକ୍ଷିତ ନୁହେଁ । ଏହା ରକ୍ତ ସଞ୍ଚାଳନରେ ସହାୟକ ହୋଇଥାଏ ।
ହିବିସ୍କସ୍ ଟି
ଏହାର ଟ୍ୟାଙ୍ଗି ସ୍ବାଦ ଏହାକୁ ନିଆରା କରିଥାଏ । ଚା’ର ସ୍ବାଦ ଉଭୟ ଥଣ୍ଡା ଓ ଗରମରେ ନିଆରା ଥାଏ । ଏହାର ରଙ୍ଗ ଗାଢ ନାଲି ହେବା ସହ ଏଥିରେ ବିଭିନ୍ନ ପ୍ରକାରର ଚେରମୂଳି ସାମିଲ ଥାଏ । ଏଥିରେ ଭିଟାମିନ୍ ସି ରହିଥାଏ, ଯାହା ଶରୀରର ରୋଗପ୍ରତିରୋଧକ ଶକ୍ତିକୁ ବୃଦ୍ଧି କରିଥାଏ ।
ଜାସ୍ମିନ୍ ଟି
ଜାସ୍ମିନ୍ ଗ୍ରୀନ ଟିରେ ବ୍ୟବହାର ନେଇ ବେଶ୍ ପରିଚିତ । ଏହି ଫୁଲର ବ୍ୟବହାର କରି ଯେ କେବଳ ସୁସ୍ବାଦୁ ଚା’ ପ୍ରସ୍ତୁତ ହୋଇଥାଏ, ତାହା ନୁହେଁ ଏହା ବେଶ୍ ସ୍ବାସ୍ଥ୍ୟକର ମଧ୍ୟ ମାନସିକ ଚାପ ମୁକ୍ତ କରିବାସହ ରକ୍ତଚାପ ନିୟନ୍ତ୍ରଣରେ ମଧ୍ୟ ଏହା ସହାୟ ହୋଇଥାଏ ।
