ବାସ୍ତବ ଜୀବନରେ ରୁହନ୍ତୁ ଖୁସି

ସୋସିଆଲ୍ ମିଡିଆର ଏହି ଆଧୁନିକ ଯୁଗରେ ଅଧିକାଂଶ ଲୋକ ଏକ ଭିନ୍ନ ମାନସିକ ସ୍ଥିତି ଦେଇ ଗତି କରୁଛନ୍ତି, ଯେଉଁଠି ପ୍ରଶ୍ନ ଉଠୁଛି ଯେ ଆମ ଖୁସିର ପ୍ରକୃତ ଉତ୍ସ ଆମର ସଫଳତା ନା ଅନ୍ୟମାନଙ୍କ ସ୍ୱୀକୃତି । ମାସ ମାସର ପରିଶ୍ରମ ପରେ ହାସଲ କରିଥିବା ଲକ୍ଷ୍ୟର ଆନନ୍ଦ ଏବେ ନିଜ ଅନୁଭୂତି ଅପେକ୍ଷା ପୋଷ୍ଟରେ ଆସୁଥିବା ଲାଇକ୍ସ, କମେଣ୍ଟ ଓ ଶୁଭେଚ୍ଛା ଉପରେ ଅଧିକ ନିର୍ଭର କରୁଛି। ସୋସିଆଲ୍ ମିଡିଆରେ ମିଳୁଥିବା ସକାରାତ୍ମକ ପ୍ରତିକ୍ରିୟା ମସ୍ତିଷ୍କରେ ‘ଡୋପାମିନ୍’ ନାମକ କେମିକାଲ୍ ସକ୍ରିୟ କରିଥାଏ, ଯାହା ଲୋକଙ୍କୁ ବାରମ୍ବାର ନୋଟିଫିକେସନ୍ ଚେକ୍ କରିବାକୁ ବାଧ୍ୟ କରେ । ଧୀରେ ଧୀରେ ବ୍ୟକ୍ତି ଭାବିବାକୁ ଲାଗେ ଯେ ଅନ୍ୟମାନଙ୍କ ପ୍ରଶଂସା ବିନା ତା’ର ସଫଳତା ଅଧୁରା । ସୋସିଆଲ୍ ମିଡିଆ ଏକ ଅଦୃଶ୍ୟ ବିଚାରପତି ସାଜିବା ଫଳରେ ଲୋକେ ନିଜକୁ ଅନ୍ୟମାନଙ୍କ ସହ ତୁଳନା କରିବା ଆରମ୍ଭ କରନ୍ତି । ଯାହାଦ୍ୱାରା ଆତ୍ମସନ୍ତୋଷ କମିଯାଏ ଏବଂ ଆତ୍ମସମ୍ମାନ ଦୁର୍ବଳ ହୁଏ । ଯାହାକୁ ମନୋବିଜ୍ଞାନରେ ‘ହେଡୋନିକ୍ ଟ୍ରେଡ୍‌ମିଲ୍’ କୁହାଯାଏ। ଏହି ଭାଲିଡେସନ୍‌ର ଜାଲରୁ ବାହାରିବା ପାଇଁ ନିଜେ ଚେଷ୍ଟା କରନ୍ତୁ । ଏହାସହ ଲାଇକ୍ସ ବଦଳରେ ନିଜ ଚେଷ୍ଟାକୁ ଗୁରୁତ୍ୱ ଦେଇ ଏକ ‘ଆଚିଭ୍‌ମେଣ୍ଟ ଡାଏରୀ’ ତିଆରି କରନ୍ତୁ, ଯେଉଁଠି ସୋସିଆଲ୍ ମିଡିଆର ପ୍ରଶଂସା ପାଇଁ କୌଣସି ସ୍ଥାନ ରହିବ ନାହିଁ ଏବଂ ଏହି ଅଭ୍ୟାସ ଆପଣଙ୍କ ମସ୍ତିଷ୍କକୁ ନୂଆ ଓ ସକାରାତ୍ମକ ଭାବରେ ଚିନ୍ତା କରିବାକୁ ପ୍ରଶିକ୍ଷଣ ଦେବ। ସୋସିଆଲ ମିଡିଆ ଜୀବନରୁ ବାହାରି ବାସ୍ତବ ଦୁନିଆରେ ବଞ୍ଚନ୍ତୁ ।