ଫିଲିପାଇନ୍ସରେ ଟାଇଫୁନ୍ କାଲମେଗିରେ ୬୬ ଜଣଙ୍କ ମୃତ୍ୟୁ

ସେବୁ: କେନ୍ଦ୍ରୀୟ ଫିଲିପାଇନ୍ସରେ ଟାଇଫୁନ୍ ‘କାଲମେଗି’ ତାଣ୍ଡବ ରଚିଛି। ଏଥିରେ ଅତି କମ୍‌ରେ ୬୬ ଜଣଙ୍କର ଜୀବନ ନେଇଛି ଏବଂ ୨୬ ଜଣ ନିଖୋଜ ଅଛନ୍ତି। ବ୍ୟାପକ ବନ୍ୟା ପରିସ୍ଥିତିରେ ବହୁଲୋକ ଛାତ ଉପରେ ଫସି ରହିଛନ୍ତି ଏବଂ ଏକ ମାରାତ୍ମକ ଭୂକମ୍ପ-ପ୍ରଭାବିତ ପ୍ରଦେଶରେ ଅନେକ କାର୍ ଭାସି ଯାଇଛି ବୋଲି ବୁଧବାର ଅଧିକାରୀମାନେ କହିଛନ୍ତି। ମଙ୍ଗଳବାର ଦକ୍ଷିଣ ପ୍ରଦେଶ ଆଗୁସାନ୍ ଡେଲ୍ ସୁରରେ ଫିଲିପାଇନ୍ସ ବାୟୁସେନାର ଏକ ହେଲିକପ୍ଟର ଦୁର୍ଘଟଣାଗ୍ରସ୍ତ ହେବାରୁ ଛଅ ଜଣଙ୍କର ମୃତ୍ୟୁ ଘଟିଛି। ସେନା କହିଛି ଯେ, କ୍ରୁମାନେ କାଲମେଗି ଦ୍ୱାରା କ୍ଷତିଗ୍ରସ୍ତ ପ୍ରଦେଶଗୁଡ଼ିକୁ ମାନବିକ ସହାୟତା ଯୋଗାଇବାକୁ ଯାଉଥିଲେ। କର୍ତ୍ତୃପକ୍ଷଙ୍କ କହିବା ଅନୁଯାୟୀ, ବୁଧବାର ମଧ୍ୟାହ୍ନ ପୂର୍ବରୁ ପଶ୍ଚିମ ପାଲାୱାନ୍ ପ୍ରଦେଶରୁ ଦକ୍ଷିଣ ଚୀନ୍ ସାଗରରେ ଘଣ୍ଟାପ୍ରତି ୧୩୦ରୁ ୧୮୦ କିଲୋମିଟର ପର୍ଯ୍ୟନ୍ତ ବେଗରେ ପବନ ବହିଥିଲା। ବେସାମରିକ ପ୍ରତିରକ୍ଷା କାର୍ଯ୍ୟାଳୟର ଡେପୁଟି ଆଡମିନିଷ୍ଟ୍ରେଟର ବର୍ନାର୍ଡୋ ରାଫେଲିଟୋ ଆଲେଜାଣ୍ଡ୍ରୋ ଚତୁର୍ଥ ଏବଂ ପ୍ରାଦେଶିକ ଅଧିକାରୀ କହିଛନ୍ତି ଯେ ଅଧିକାଂଶ ମୃତ୍ୟୁ କେନ୍ଦ୍ରୀୟ ପ୍ରଦେଶ ସେବୁରେ ହୋଇଥିବା ରିପୋର୍ଟ ହୋଇଛି, ଯେଉଁଠି କାଲମେଗି ଆକସ୍ମିକ ବନ୍ୟା ସୃଷ୍ଟି କରିଥିଲା। ବୁଧବାର ସିଭିଲ୍ ଡିଫେନ୍ସ କାର୍ଯ୍ୟାଳୟ କହିଛି ଯେ, ସେବୁରେ ବନ୍ୟାଜଳରେ ବୁଡ଼ିଯିବା ଯୋଗୁ ୪୯ ଜଣଙ୍କର ଏବଂ ଭୂସ୍ଖଳନ ଯୋଗୁଁ ୨୬ ଜଣ ନିଖୋଜଙ୍କ ମଧ୍ୟରୁ ୧୩ ଜଣଙ୍କର ମୃତ୍ୟୁ ହୋଇଛି।