‘ଏଣିକି ଦିଲ୍ଲୀରେ ମହିଳାମାନେ ଯେକୌଣସି ସମୟରେ କାମ କରିପାରିବେ’: ରେଖା ଗୁପ୍ତା

ନୂଆଦିଲ୍ଲୀ: ଦିଲ୍ଲୀ ମୁଖ୍ୟମନ୍ତ୍ରୀ ରେଖା ଗୁପ୍ତା ଶୁକ୍ରବାର ଜାତୀୟ ରାଜଧାନୀର ଦୋକାନ ଓ ବାଣିଜ୍ୟିକ ପ୍ରତିଷ୍ଠାନରେ ମହିଳା କର୍ମଚାରୀମାନଙ୍କୁ ରା‌ତି ସିଫ୍ଟରେ କାମ କରିବାକୁ ଅନୁମତି ଦେବା ପାଇଁ ତାଙ୍କ ସରକାରଙ୍କ ନିଷ୍ପତ୍ତିକୁ ପ୍ରଶଂସା କରିଛନ୍ତି ଏବଂ କାର୍ଯ୍ୟକ୍ଷେତ୍ରରେ ଲିଙ୍ଗଗତ ସମାନତା ଦିଗରେ ଏହା ଏକ ବଡ଼ ପଦକ୍ଷେପ ବୋଲି କହିଛନ୍ତି। ରେଖା ଗୁପ୍ତା କହିଛନ୍ତି, ରାତି ୯ଟାରୁ ସକାଳ ୭ଟା ପର୍ଯ୍ୟନ୍ତ ମହିଳାମାନଙ୍କୁ କାହିଁକି କାମ କରିବାର ଅଧିକାରରୁ ବଞ୍ଚିତ କରାଯାଇଥିଲା ତାହା ଭାବି ମୁଁ ଆଶ୍ଚର୍ଯ୍ୟ। ଆମେ ଏହାକୁ ରଦ୍ଦ କରିଛୁ। ଏବେ ମହିଳାମାନେ ନିଜ ସୁବିଧା ଅନୁସାରେ ଯେକୌଣସି ସମୟରେ କାମ କରିପାରିବେ। ଲେଫ୍ଟନାଣ୍ଟ ଗଭର୍ଣ୍ଣରଙ୍କ ଦ୍ୱାରା ଜାରି କରାଯାଇଥିବା ବିଜ୍ଞପ୍ତି ମାଧ୍ୟମରେ ଏହି ନିଷ୍ପତ୍ତି ଦିଲ୍ଲୀ ଦୋକାନ ଓ ପ୍ରତିଷ୍ଠାନ ଅଧିନିୟମ, ୧୯୫୪ ଅନୁଯାୟୀ ସଂଶୋଧନ କରାଯାଇଛି। ଜୁଲାଇରେ ମୁଖ୍ୟମନ୍ତ୍ରୀ ରେଖା ଗୁପ୍ତା ଏହି ଘୋଷଣା କରିଥିଲେ, କିନ୍ତୁ ବର୍ତ୍ତମାନ ଶ୍ରମ ବିଭାଗ ପକ୍ଷରୁ ଆନୁଷ୍ଠାନିକ ଭାବେ ବିଜ୍ଞପ୍ତି ପ୍ରକାଶ ପାଇଛି। ନୂଆ ଆଦେଶ ଅନୁଯାୟୀ, ମଦ ଦୋକାନ ବ୍ୟତୀତ ସମସ୍ତ ଦୋକାନ ଓ ବାଣିଜ୍ୟିକ ପ୍ରତିଷ୍ଠାନ ରାତ୍ରି ସମୟରେ ମହିଳାମାନଙ୍କୁ ନିଯୁକ୍ତି ଦେଇପାରିବେ, ଯଦି ସେମାନେ ସମସ୍ତ ନିର୍ଦ୍ଧାରିତ ସୁରକ୍ଷା, କଲ୍ୟାଣ ଓ ଶ୍ରମ ଆଇନ ସର୍ତ୍ତାବଳି ପାଳନ କରନ୍ତି। ବିଜ୍ଞପ୍ତି ଅନୁଯାୟୀ, କୌଣସି କର୍ମଚାରୀଙ୍କୁ ଦିନକୁ ନଅ ଘଣ୍ଟା କିମ୍ବା ସପ୍ତାହରେ ୪୮ ଘଣ୍ଟାରୁ ଅଧିକ କାମ କରିବାକୁ ପଡିବ ନାହିଁ। ବିନା ବିରତିରେ ପାଞ୍ଚ ଘଣ୍ଟାରୁ ଅଧିକ ସମୟ ଧରି ନିରନ୍ତର କାର୍ଯ୍ୟ କରିବା ନିଷେଧ। କୌଣସି ମହିଳା କେବଳ ରାତ୍ରି ସିଫ୍ଟରେ କାମ କରିବାକୁ ବାଧ୍ୟ ହେବେ ନାହିଁ। ନିଯୁକ୍ତିଦାତାମାନେ ସମସ୍ତ ରାତ୍ରି ସିଫ୍ଟ କର୍ମଚାରୀଙ୍କ ପାଇଁ ନିରାପଦ ପରିବହନ, ପର୍ଯ୍ୟାପ୍ତ ସୁରକ୍ଷା ବ୍ୟବସ୍ଥା ଏବଂ ସିସିଟିଭି କଭରେଜ୍ ନିଶ୍ଚିତ କରିବା ଆବଶ୍ୟକ। ସିସିଟିଭି ଫୁଟେଜ୍ ଅତି କମ୍‌ରେ ଏକ ମାସ ପାଇଁ ସଂରକ୍ଷିତ ହେବା ଆବଶ୍ୟକ। ଓଭରଟାଇମ୍ କାମ କରୁଥିବା କର୍ମଚାରୀମାନେ ସେମାନଙ୍କର ନିୟମିତ ବେତନର ଦୁଇଗୁଣା ପାଇବେ। ଜାତୀୟ ଛୁଟିଦିନରେ କାମ କରୁଥିବା ଲୋକଙ୍କୁ ଦୁଇଗୁଣା ଦରମା ଦିଆଯିବା ସହ କ୍ଷତିପୂରଣ ଛୁଟି ପ୍ରଦାନ କରାଯିବା ଆବଶ୍ୟକ।