କାର୍ତ୍ତିକ ପୂର୍ଣ୍ଣିମାରେ ସୁପରମୁନ୍ ୨୦୨୫

ନୂଆଦିଲ୍ଲୀ: ଏ ବର୍ଷର ସୁପରମୁନ୍ ନଭେମ୍ବର ୫ କାର୍ତ୍ତିକ (ରାସ) ପୂର୍ଣ୍ଣିମା ଦିନ ଦେଖିବାକୁ ମିଳିବ । ରାତ୍ରି ଆକାଶରେ ଏହା ଅତ୍ୟନ୍ତ ଉଜ୍ଜ୍ବଳ ଦେଖାଯିବ। ପୂର୍ଣ୍ଣିମା ଚନ୍ଦ୍ର ପୃଥିବୀର ନିକଟତମ ସ୍ଥାନରେ ପହଞ୍ଚିବା ପରେ ସାଧାରଣ ଅପେକ୍ଷା ବଡ଼ ଓ ଅଧିକ ଉଜ୍ଜ୍ୱଳ ଦେଖାଯାଏ। ପୃଥିବୀ ଚାରିପାଖରେ ଚନ୍ଦ୍ରର କକ୍ଷପଥ ବୃତ୍ତାକାର ନୁହେଁ, ଅଣ୍ଡାକାର, ଯାହାର ଅର୍ଥ ପୃଥିବୀଠାରୁ ଏହାର ଦୂରତା ପ୍ରତି ମାସରେ ସାମାନ୍ୟ ପରିବର୍ତ୍ତନ ହୁଏ। ଯେତେବେଳେ ଚନ୍ଦ୍ର ପୃଥିବୀର ନିକଟତମ ସ୍ଥାନରେ ପହଞ୍ଚେ ତାହାକୁ ପେରିଜି କୁହାଯାଏ। ଏହି ମୁହୂର୍ତ୍ତ ଯଦି ଏକ ପୂର୍ଣ୍ଣିମା ସହିତ ମେଳ ଖାଏ, ତେବେ ଏହାକୁ ସୁପରମୁନ୍ କୁହାଯାଏ।ପେରିଜି ଶବ୍ଦ ଗ୍ରୀକ୍ ମୂଳ ପେରି ଓ ଜିଓରୁ ଆସିଛି। ପେରି ଅର୍ଥ ନିକଟ ଓ ଜିଓ ଅର୍ଥ ପୃଥିବୀ। ଏକ ସୁପରମୁନ୍ ସମୟରେ ପୂର୍ଣ୍ଣିମା ଚନ୍ଦ୍ର ଅନ୍ୟ ସମୟ ଅପେକ୍ଷା ଉଲ୍ଲେଖନୀୟ ଭାବରେ ବଡ଼ ଓ ଉଜ୍ଜ୍ୱଳ ଦେଖାଯାଏ। ଏହି ସ୍ୱର୍ଗୀୟ ଘଟଣା ଦେଖିବା ପାଇଁ ଆପଣଙ୍କୁ ଟେଲିସ୍କୋପ୍ କିମ୍ବା କୌଣସି ବିଶେଷ ଉପକରଣ ଆବଶ୍ୟକ ହେବ ନାହିଁ। କେବଳ ସ୍ୱଚ୍ଛ ଆକାଶ ଏବଂ ସର୍ବନିମ୍ନ କୃତ୍ରିମ ଆଲୋକ ଥିବା ଏକ ସ୍ଥାନ ଖୋଜନ୍ତୁ, ଯେପରିକି ଏକ ଖୋଲା ପଡ଼ିଆ କିମ୍ବା ଛାତ। ଆଲୋକ ପ୍ରଦୂଷଣ ଯେତେ କମ୍ ହେବ, ଚନ୍ଦ୍ର ସେତେ ଉଜ୍ଜ୍ୱଳ ଦେଖାଯିବ। ଏହି ‘ସୁପରମୁନ୍’ ନଭେମ୍ବର ୫ ତାରିଖ ସନ୍ଧ୍ୟାରେ ଏହାର ସର୍ବୋଚ୍ଚ ଉଜ୍ଜ୍ୱଳତାରେ ଦେଖାଯିବ। ଯଦି ପାଗ ପରିଷ୍କାର ରହେ, ତେବେ ଭାରତର ଆକାଶ ପର୍ଯ୍ୟବେକ୍ଷକମାନେ ସନ୍ଧ୍ୟା ପ୍ରାୟ ୬ଟା ୩୦ରୁ ଏହି ଚମତ୍କାର ଦୃଶ୍ୟ ଦେଖିପାରିବେ। ବର୍ଷର ପ୍ରତ୍ୟେକ ପୂର୍ଣ୍ଣିମାର ଏକ ପାରମ୍ପରିକ ନାମ ଅଛି। ନଭେମ୍ବରର ପୂର୍ଣ୍ଣିମାକୁ ‘ବିଭର ମୁନ୍’ କୁହାଯାଏ।