ପରୀକ୍ଷା ଜୀବନରେ ସବୁକିଛି ନୁହେଁ – ପ୍ରଧାନମନ୍ତ୍ରୀ

ନୂଆଦିଲ୍ଲୀ: ପ୍ରଧାନମନ୍ତ୍ରୀଙ୍କ ପରୀକ୍ଷା ପେ ଚର୍ଚ୍ଚା । ଏହି କାର୍ଯ୍ୟକ୍ରମ ମାଧ୍ୟମରେ ପିଏମ୍ ମୋଦୀ ପରୀକ୍ଷାର୍ଥୀ ମାନଙ୍କୁ ଅନେକ ଗୁରୁତ୍ତ୍ୱପୂର୍ଣ୍ଣ କଥା କହିଛନ୍ତି । ଜୀବନରେ ପରୀକ୍ଷା ସୁବିକିଛି ନୁହେଁ ,ବେଳେ ବେଳେ ନିଜ ସହ ମଧ୍ୟ କଥା ହୁଅନ୍ତୁ ବୋଲି ପରୀକ୍ଷାର୍ଥୀଙ୍କୁ ପ୍ରଧାନମନ୍ତ୍ରୀ ପରାମର୍ଶ ଦେଇଛନ୍ତି । ସେହିପରି ପିଲାଙ୍କୁ ଅଧିକ ଚାପ ନ ଦେବାକୁ ଅଭିଭାବକ ଓ ଶିକ୍ଷକ ମାନଙ୍କୁ ବାର୍ତ୍ତା ଦେଇଛନ୍ତି। ପିଲାର ଟାଲେଣ୍ଟ ଦେଖି ସେହି ଆଧାରରେ ବଢିବାକୁ ସହଯୋଗ କରନ୍ତୁ ।

ଉତ୍ତମ ସ୍ଵାସ୍ଥ୍ୟ ପାଇଁ ମଧ୍ୟ ପରୀକ୍ଷାର୍ଥୀ ମାନଙ୍କୁ ଟିପ୍ସ ଦେଇଛନ୍ତି ପିଏମ୍ ମୋଦୀ । ପ୍ରଧାନମନ୍ତ୍ରୀ ସୂର୍ଯ୍ୟ ସ୍ନାନର ଗୁରୁତ୍ୱ ପରୀକ୍ଷାର୍ଥୀ ମାନଙ୍କୁ ବୁଝାଇଛନ୍ତି। ସେ କହିଛନ୍ତି,’ସମସ୍ତେ ସକାଳର ସୂର୍ଯ୍ୟ କିରଣରେ ବାହାରକୁ ଯିବାକୁ ଅଭ୍ୟାସ କରିବା ଉଚିତ।’ ଆପଣଙ୍କ ଶରୀରର ଯଥାସମ୍ଭବ ଅଂଶ ସୂର୍ଯ୍ୟ କିରଣରେ ରଖିବାକୁ ଚେଷ୍ଟା କରନ୍ତୁ। ଏହା ବ୍ୟତୀତ, ଶାରୀରିକ ପୁଷ୍ଟିସାର ଗୁରୁତ୍ୱ ବୁଝାଇବା ସମୟରେ ସେ କହିଥିଲେ, ‘ଗହମ, ବାଜରା, ଚାଉଳ, ସବୁକିଛି ଖାଅ।’ ବାଜରା ଖାଇବା ଉପରେ ଧ୍ୟାନ ଦିଅ। ଏକ ଘନ ଗଛ ତଳେ ଠିଆ ହୁଅ ଏବଂ ଗଭୀର ନିଶ୍ୱାସ ନିଅ।ଏହା ସହ ଭରପୁର ଶୋଇବାକୁ କହିଛନ୍ତି ।

ପ୍ରଧାନମନ୍ତ୍ରୀ କହିଛନ୍ତି କ୍ରିକେଟରୁ ଶିଖ। ଯେତେବେଳେ ଜଣେ ବ୍ୟାଟସମ୍ୟାନ ପଡ଼ିଆରେ ଛିଡା ହୁଅନ୍ତି, ଲୋକମାନେ ପାଭିଲିୟନରୁ ପାଟି କରନ୍ତି। କେହି କୁହନ୍ତି ୪ ରନ୍, କେହି କୁହନ୍ତି ଛଅ, କେହି କୁହନ୍ତି ଅନ୍ୟ କିଛି। କିନ୍ତୁ ଯଦି ବ୍ୟାଟସମ୍ୟାନ୍ ସେମାନଙ୍କ କଥାରେ ଚାପଗ୍ରସ୍ତ ଅନୁଭବ କରିବାକୁ ଆରମ୍ଭ କରନ୍ତି, ତେବେ ସେ ପ୍ରଦର୍ଶନ କରିପାରିବେ ନାହିଁ। ସେ ସମସ୍ତଙ୍କ କଥା ଶୁଣନ୍ତି, କିନ୍ତୁ ନିଜ ଇଚ୍ଛା ଅନୁସାରେ ବ୍ୟାଟିଂ କରନ୍ତି। ତୁମେ ମଧ୍ୟ ସମସ୍ତଙ୍କ କଥାର ବୋଝ ନିଜ ମନ ଉପରେ ଲଦିବା ଉଚିତ୍ ନୁହେଁ। ସମସ୍ତଙ୍କ କଥା ଶୁଣ, କିନ୍ତୁ ତୁମେ ଯାହା ସର୍ବୋତ୍ତମ କରିପାରିବ ତାହା କର।’ଯେଉଁଠି କେହି ନ ଥିବେ ସେଠି ଆପଣ ପହଞ୍ଚନ୍ତୁ , ନେତୃତ୍ଵ ନେଇପାରିବେ।

ଲେଖିବାର ଅଭ୍ୟାସ ଥିଲେ ପରୀକ୍ଷାରେ ଲେଖିବାକୁ କଷ୍ଟ ହେବନି। ଛାତ୍ରଛାତ୍ରୀମାନେ ସମୟର ସଦୁପଯୋଗ କରିବା ଉଚିତ୍ । ଏବଂ ଟାଇମ୍ ମ୍ୟାନେଜମେଣ୍ଟ କରିବା ଶିଖିବା ଦରକାର। ଅଧିକ ନ ଭାବି ବର୍ତ୍ତମାନ ସମୟରେ ଧ୍ୟାନ ଦେଲେ ସଫଳତା ନିଶ୍ଚୟ ମିଳିବ। ତେବେ ପ୍ରଧାନମନ୍ତ୍ରୀ ବୋର୍ଡ ପରୀକ୍ଷା ପାଇଁ ପ୍ରସ୍ତୁତି କରୁଥିବା ଛାତ୍ରଛାତ୍ରୀ, ସେମାନଙ୍କ ଅଭିଭାବକ ଏବଂ ଶିକ୍ଷକ ଶିକ୍ଷୟିତ୍ରୀଙ୍କ ସହ ସିଧାସଳଖ କଥା ହୋଇଛନ୍ତି। ଏହି ଅଷ୍ଟମ ସଂସ୍କରଣରେ ଅଭିନେତା ବିକ୍ରମ ମାସି, ଅଭିନେତ୍ରୀ ଦୀପିକା ପାଦୁକୋନ ଓ ଭୂମି ପେଡନେକର ପ୍ରମୁଖ ଯୋଗଦେଇଥିଲେ ।