ଜେଲେନସ୍କିଙ୍କ ଉପ‌ରେ ବର୍ଷିଲେ ଟ୍ରମ୍ପ୍‌

ନୂଆଦିଲ୍ଲୀ : ୟୁକ୍ରେନ ଯୁଦ୍ଧର ଅନ୍ତ ଘଟାଇବା ଉଦ୍ଦେଶ୍ୟରେ ରିୟାଦରେ ହୋଇଥିବା ଆମେରିକା-ରୁଷିଆ ଆଲୋଚନାରେ ୟୁକ୍ରେନକୁ ନିମନ୍ତ୍ରଣ କରାଯାଇ ନାହିଁ ବୋଲି ଅଭିଯୋଗ କରିବା ପରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ୟୁକ୍ରେନର ରାଷ୍ଟ୍ରପତି ବୋଲଡିମିର ଜେଲେନସ୍କିଙ୍କୁ କଡ଼ା ସମାଲୋଚନା କରିଛନ୍ତି। ୟୁକ୍ରେନ ଯୁଦ୍ଧ ଆରମ୍ଭ କରିବା ପାଇଁ ତାଙ୍କୁ ଦାୟୀ କରି ଟ୍ରମ୍ପ ଜେଲେନସ୍କିଙ୍କୁ ଜଣେ “ସମ୍ପୂର୍ଣ୍ଣ ଅପାରଗ” ନେତା ଏବଂ ଜଣେ ଦୁର୍ବଳ ବୁଝାମଣାକାରୀ ବୋଲି କହିଛନ୍ତି। ଟ୍ରମ୍ପ ଆହୁରି ମଧ୍ୟ କହିଛନ୍ତି ଯେ ପ୍ରାୟ ତିନି ବର୍ଷ ତଳେ ରୁଷ୍ ସହ ଲଢ଼େଇ ଶେଷ କରିବା ପାଇଁ ୟୁକ୍ରେନ୍ ରାଷ୍ଟ୍ରପତି ଏକ ଚୁକ୍ତି କରିବା ଉଚିତ୍ ଥିଲା। ରୁଷ୍‌-ୟୁକ୍ରେନ ଯୁଦ୍ଧକୁ ତୃତୀୟ ବର୍ଷ ହେବାକୁ ଯାଉଥିବାବେଳେ ୟୁକ୍ରେନ ଯୁଦ୍ଧର ଅନ୍ତ ବିଷୟରେ ଆଲୋଚନା ପାଇଁ ଆମେରିକା ଏବଂ ରୁଷିଆ ରିୟାଦରେ ହୋଇଥିବା ଆଲୋଚନାରେ ଅଂଶଗ୍ରହଣ କରିବା ପରେ ଟ୍ରମ୍ପ୍‌ ଏହି ମନ୍ତବ୍ୟ ଦେଇଛନ୍ତି। ଗତକାଲିର ଆଲୋଚନାରେ ୟୁକ୍ରେନ୍ ସାମିଲ ହୋଇନଥିଲା। ଆଲୋଚନାରୁ ୟୁକ୍ରେନକୁ ବାଦ୍ ଦିଆଯିବା ନେଇ ଜେଲେନସ୍କି ପ୍ରତିକ୍ରିୟା ପ୍ରକାଶ କରିବା ସହ ୟୁକ୍ରେନ ଯୁଦ୍ଧ ସମ୍ବନ୍ଧୀୟ କୌଣସି ଫଳାଫଳକୁ ତାଙ୍କ ଦେଶ ଗ୍ରହଣ କରିବ ନାହିଁ ବୋଲି କହିଛନ୍ତି। ଏହାର ଜବାବରେ ଟ୍ରମ୍ପ କହିଛନ୍ତି, ଆଜି ମୁଁ ଶୁଣିଛି, ‘ଓହ, ଆମକୁ ନିମନ୍ତ୍ରଣ କରାଯାଇ ନଥିଲା। ଆପଣ ସେଠାରେ ତିନି ବର୍ଷ ଧରି ଅଛନ୍ତି । ତୁମେ ଏହାକୁ ଶେଷ କରିବା ଉଚିତ୍ ଥିଲା । ଆପଣ ଏହାକୁ କେବେ ବି ଆରମ୍ଭ କରିବା ଉଚିତ୍ ନୁହେଁ । ଆପଣ ଏକ ଚୁକ୍ତି କରିପାରିଥାନ୍ତେ ବୋଲି ଟ୍ରମ୍ପ୍‌ କହିଛନ୍ତି।