୨୧ଟି ନଦୀରେ ଗମ୍ଭୀର ବନ୍ୟା ସ୍ଥିତି

ନୂଆଦିଲ୍ଲୀ: : କେନ୍ଦ୍ରୀୟ ଜଳ ଆୟୋଗ (ସିଡବ୍ଲ୍ୟୁସି) ବୁଧବାର କହିଛି ଯେ ଦେଶରେ ୨୧ଟି ନଦୀରେ ‘ଗମ୍ଭୀର ବନ୍ୟା ସ୍ଥିତି’ ସୃଷ୍ଟି ହୋଇଛି। ଅନ୍ୟ ୩୩ଟି ନଦୀ ବିପଦସଙ୍କେତ ଉପରେ ପ୍ରବାହିତ ହେଉଛି। ଏଥି ମଧ୍ୟରୁ ଦିଲ୍ଲୀରେ ଗୋଟିଏ ରହିଛି। ଆଗାମୀ ଦିନଗୁଡ଼ିକରେ ବିଭିନ୍ନ ରାଜ୍ୟରେ ପ୍ରବଳ ବର୍ଷାର ପୂର୍ବାନୁମାନ ମଧ୍ୟରେ ଦେଶବ୍ୟାପୀ ବନ୍ୟା ସତର୍କତା ଜାରି କରାଯାଇଛି। ୨୧ଟି ଗୁରୁତର ବନ୍ୟା ସ୍ଥାନ ମଧ୍ୟରୁ ୯ଟି ବିହାରରେ, ୮ଟି ଉତ୍ତରପ୍ରଦେଶରେ ଥିବାବେଳେ ଦିଲ୍ଲୀ, ଜମ୍ମୁ-କାଶ୍ମୀର, ପଶ୍ଚିମବଙ୍ଗ ଏବଂ ଝାଡ଼ଖଣ୍ଡରେ ଗୋଟିଏ ଲେଖାଏଁ ସ୍ଥାନ ରହିଛି। ବିପଦସଙ୍କେତ ଉପରେ ପ୍ରବାହିତ ହେଉଥିବା ୩୩ଟି ନଦୀ ମଧ୍ୟରେ ଉତ୍ତର ପ୍ରଦେଶର (୯), ବିହାର (୭), ଆସାମ (୭), ଉତ୍ତରାଖଣ୍ଡ (୨), ଓଡ଼ିଶା (୨), ତେଲେଙ୍ଗାନା (୨) ଏବଂ ଆନ୍ଧ୍ର ପ୍ରଦେଶ, ମହାରାଷ୍ଟ୍ର, ରାଜସ୍ଥାନ ଏବଂ ପଶ୍ଚିମବଙ୍ଗରେ ଗୋଟିଏ ଲେଖାଏଁ ରହିଛି। ଦିଲ୍ଲୀରେ, ରେଳ ସେତୁ ସ୍ଥାନରେ ଯମୁନା ନଦୀ ଗୁରୁତର ବନ୍ୟା ପରିସ୍ଥିତିରେ ଅଛି। ଉତ୍ତର ପାହାଡ଼ି ରାଜ୍ୟଗୁଡ଼ିକ ପାଇଁ ସର୍ବାଧିକ ସତର୍କତା ଜାରି କରାଯାଇଛି। ହିମାଚଳ ପ୍ରଦେଶ ଏବଂ ଉତ୍ତରାଖଣ୍ଡରେ ପ୍ରବଳରୁ ଅତି ପ୍ରବଳ ବର୍ଷା ହେବାର ସମ୍ଭାବନା ରହିଛି। ବ୍ୟାସ, ସତଲେଜ, ଚେନାବ, ରାବୀ, ଅଳକନନ୍ଦା ଏବଂ ଭାଗୀରଥୀ ନଦୀରେ ହଠାତ୍ ଜଳସ୍ତର ବୃଦ୍ଧି ପାଇବା ସମ୍ଭାବନା ରହିଛି। ଜମ୍ମୁ ଏବଂ କାଶ୍ମୀରରେ, ଚେନାବ, ତାୱି, ଝେଲମ୍ ଏବଂ ସିନ୍ଧୁ ନଦୀ ଅବବାହିକାରେ ବନ୍ୟା ଆଶଙ୍କା ଅଧିକ ରହିଛି। ବିଶେଷକରି କିସ୍ତୱାଡ଼, ଡୋଡ଼ା, କଠୁଆ, ଅନନ୍ତନାଗ ଏବଂ ପୁଲୱାମା ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ହେବା ସମ୍ଭାବନା ରହିଛି।