ହିମାଚଳ, ଉତ୍ତରାଖଣ୍ଡରେ ବର୍ଷା ବିତ୍ପାତ , ୪ ଜଣଙ୍କ ମୃତ୍ୟୁ

ନୂଆଦିଲ୍ଲୀ : ହିମାଚଳପ୍ରଦେଶ ଏବଂ ଉତ୍ତରାଖଣ୍ଡରେ ପ୍ରବଳ ବର୍ଷା ଲାଗି ରହିଛି। ଉତ୍ତରାଖଣ୍ଡର ବିଭିନ୍ନ ଜିଲ୍ଲାରେ ଆଇଏମ୍‌ଡି (ପାଣିପାଗ ବିଭାଗ) ଅରେଂଜ ଆଲର୍ଟ ଜାରି କରିଛି। ଆସନ୍ତା ୪୮ ଘଣ୍ଟା ମଧ୍ୟ‌ରେ ମହାରାଷ୍ଟ୍ରର ବିଭିନ୍ନ ଉପକୂଳ ଅଞ୍ଚଳରେ ପ୍ରବଳରୁ ଅତି ପ୍ରବଳ ବର୍ଷା ହେବ ବୋଲି ଆଇଏମ୍‌ଡି ଆକଳନ କରିଛି। ଓଡ଼ିଶା, ରାଜସ୍ଥାନ, ମଧ୍ୟପ୍ରଦେଶ, ଛତିଶଗଡ଼, ଗୋଆରେ ମଧ୍ୟ ପ୍ରବଳରୁ ଅତି ପ୍ରବଳ ବର୍ଷା ହେବ। ଉତ୍ତରାଖଣ୍ଡ ଏବଂ ହିମାଚଳପ୍ରଦେଶରେ ବର୍ଷା ଜନିତ ବିଭିନ୍ନ କାରଣ ପାଇଁ ୪ ଜଣଙ୍କ ମୃତ୍ୟୁ ହୋଇଛି। ରୁଦ୍ରପ୍ରୟାଗ ଜିଲ୍ଲାରେ ଭୂସ୍ଖଳନ ଯୋଗୁଁ ଜଣେ ୫୦ ବର୍ଷୀୟ ବ୍ୟକ୍ତିଙ୍କର ମୃତ୍ୟୁ ହୋଇଛି। ଅନ୍ୟ ଏକ ଘଟଣାରେ ଉତ୍ତରକାଶି ଜିଲ୍ଲାରେ ଜଣଙ୍କର ମୃତ୍ୟୁ ହୋଇଛି ଏବଂ ୩ ଜଣ ଆହତ ହୋଇଛନ୍ତି। ସେହିପରି ହିମାଚଳପ୍ରଦେଶର ହମିରପୁର ଏବଂ ଶିମ୍‌ଲା ଜିଲ୍ଲାରେ ବର୍ଷା ଜନିତ ବିଭିନ୍ନ କାରଣ ପାଇଁ ଜଣେ ଲେଖାଏଁ ବ୍ୟକ୍ତିଙ୍କର ମୃତ୍ୟୁ ‌ହୋଇଛି। ରବିବାର ଦିନ ହିମାଚଳପ୍ରଦେଶର ମଣ୍ଡି ଜିଲ୍ଲାରେ ବାଦଲଫଟା ବର୍ଷା ଯୋଗୁଁ ଅଚାନକ ବନ୍ୟା ଆସିଥିଲା। ଫଳରେ ମଣ୍ଡି-କୁଲ୍ଲୁ ଜାତୀୟ ରାଜପଥ ବନ୍ଦ ରହିଛି। ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମୀ ଡେରାଡୁନରେ ବିପର୍ଯ୍ୟୟ ପରିଚାଳନା କକ୍ଷ ଗସ୍ତ କରି ସ୍ଥିତି ସମୀକ୍ଷା କରିଛନ୍ତି। ହିମାଚଳପ୍ରଦେଶରେ ବର୍ଷା‌ ପାଇଁ ଗତ ୨୪ ଘଣ୍ଟାରେ ୭୮ ଲକ୍ଷ ଟଙ୍କାର କ୍ଷୟକ୍ଷତି ହୋଇଛି। କାଙ୍ଗ୍ରା, ମଣ୍ଡି, ଶିମଲା, ସି‌ରମୌର, ଚାମ୍ବା ଏବଂ କୁଲ୍ଲୁ ଜିଲ୍ଲାରେ ଅଚାନକ ବନ୍ୟା ଆସିବାର ସମ୍ଭାବନା ନେଇ ସତର୍କ କରାଯାଇଛି।