ସଙ୍ଗମର ପବିତ୍ର ଜଳରେ ସ୍ନାନ କରିବେ ୟୁପି ଜେଲ୍‌ର ୯୦ ହଜାର କଏଦୀ

ନୂଆଦିଲ୍ଲୀ: ଉତ୍ତରପ୍ରଦେଶ ଜେଲ୍ ପ୍ରଶାସନ ପ୍ରୟାଗରାଜର ସଙ୍ଗମରୁ ପବିତ୍ର ଜଳ ରାଜ୍ୟର ୭୫ଟି ଜେଲ୍‌କୁ ଆଣିବାକୁ ଯାଉଛନ୍ତି। ଏହା ଦ୍ବାରା ଜେଲ୍‌ ଭିତରେ ରହି ୯୦,୦୦୦ରୁ ଅଧିକ କଏଦୀ ମହାକୁମ୍ଭ ସ୍ନାନରେ ଅଂଶଗ୍ରହଣ କରିପାରିବେ। ୟୁପି ଜେଲ ମନ୍ତ୍ରୀ ଦାରା ସିଂହ ଚୌହାନଙ୍କ କାର୍ଯ୍ୟାଳୟ ଅନୁଯାୟୀ, ଫେବ୍ରୁଆରି ୨୧ରେ ସକାଳ ୯ଟା ୩୦ରୁ ୧୦ଟା ପର୍ଯ୍ୟନ୍ତ ସମସ୍ତ ଜେଲ୍‌ରେ ଏହି କାର୍ଯ୍ୟକ୍ରମ ଅନୁଷ୍ଠିତ ହେବ। କାରାଗାର ମହାନିର୍ଦ୍ଦେଶକ (ଡିଜି) ପିଭି ରାମଶାସ୍ତ୍ରୀଙ୍କ ତତ୍ତ୍ୱାବଧାନରେ ଏହି ପଦକ୍ଷେପ ନିଆଯାଉଛି। ସଙ୍ଗମର ଗଙ୍ଗାଜଳକୁ ସାତଟି କେନ୍ଦ୍ରୀୟ କାରାଗାର ସମେତ ସମସ୍ତ ୭୫ଟି ଜେଲ୍‌କୁ ପଠାଯିବ, ଯେଉଁଠାରେ ଏହାକୁ ନିୟମିତ ପାଣିରେ ମିଶାଇ ଏକ ଛୋଟ ଟାଙ୍କିରେ ରଖାଯିବ। କଏଦୀମାନେ ପ୍ରାର୍ଥନା ପରେ ଏହି ପବିତ୍ର ଜଳରେ ସ୍ନାନ କରିବେ। ଫେବ୍ରୁଆରି ୨୧ରେ ଲକ୍ଷ୍ନୌ ଜେଲ୍‌ରେ ହେବାକୁ ଥିବା ଏହି କାର୍ଯ୍ୟକ୍ରମରେ ମନ୍ତ୍ରୀ ଚୌହାନ ଓ ବରିଷ୍ଠ ଜେଲ୍ ଅଧିକାରୀମାନେ ଯୋଗ ଦେବେ ବୋଲି ଆଶା କରାଯାଉଛି। ଗୋରଖପୁର ଜିଲ୍ଲା ଜେଲ୍‌ର ଜେଲର୍ ଏକେ କୁଶୱାହା କହିଛନ୍ତି ଯେ ଜେଲ୍ ଗାର୍ଡ ଅରୁଣ ମୌର୍ଯ୍ୟଙ୍କୁ ପବିତ୍ର ଜଳ ସଂଗ୍ରହ ପାଇଁ ପ୍ରୟାଗରାଜ ପଠାଯାଇଛି। ନୈନି ସେଣ୍ଟ୍ରାଲ ଜେଲ୍ ଓ ପ୍ରୟାଗରାଜ ଜିଲ୍ଲା ଜେଲ୍‌ରେ ମଧ୍ୟ ସମାନ ବ୍ୟବସ୍ଥା କରାଯାଉଛି ଏବଂ ବରିଷ୍ଠ ଅଧୀକ୍ଷକ ଅମିତା ଦୁବେ କହିଛନ୍ତି ଯେ ୧,୩୫୦ କଏଦୀ ଏହି ରୀତିନୀତିକୁ ଉତ୍ସାହର ସହ ଅପେକ୍ଷା କରିଛନ୍ତି। ଅନ୍ୟପକ୍ଷରେ ଉନ୍ନାଓ ଜେଲ୍ ଫେବ୍ରୁଆରି ୧୭ ତାରିଖରେ ସମାନ କାର୍ଯ୍ୟକ୍ରମ ଆୟୋଜନ କରିଥିଲା, ଯେଉଁଥିରେ କଏଦୀମାନଙ୍କୁ ଏହି ରୀତିନୀତିରେ ଅଂଶଗ୍ରହଣ କରିବାର ପ୍ରାରମ୍ଭିକ ସୁଯୋଗ ମିଳିଥିଲା।