ନିର୍ବାଚନ ରାଲିରେ ଇରାନକୁ ଉଡ଼ାଇଦେବାକୁ ଧମକ ଦେଲେ ଡୋନାଲ୍ଡ ଟ୍ରମ୍ପ

ୱାସିଂଟନ: ଆମେରିକାର ପୂର୍ବତନ ରାଷ୍ଟ୍ରପତି ତଥା ରିପବ୍ଲିକାନ ପ୍ରାର୍ଥୀ ଡୋନାଲ୍ଡ ଟ୍ରମ୍ପ ଇରାନକୁ ଟାର୍ଗେଟ କରି କହିଛନ୍ତି ଯେ ଯଦି ଇରାନ ମୋତେ ହତ୍ୟା ଉଦ୍ୟମରେ ସମ୍ପୃକ୍ତ ହୁଏ ତେବେ ଏହାର ପରିଣାମ ଭୟଙ୍କର ହେବ। ଦୁଇ ମାସ ମଧ୍ୟରେ ଦୁଇଟି ହତ୍ୟା ଉଦ୍ୟମରୁ ବର୍ତ୍ତିବା ପରେ ଇରାନରୁ ତାଙ୍କ ଜୀବନ ପ୍ରତି ବଡ଼ ବିପଦ ଥିବା ଟ୍ରମ୍ପ ଅଭିଯୋଗ କରିଛନ୍ତି। ସେ କହିଛନ୍ତି, ଯଦି ମୁଁ ରାଷ୍ଟ୍ରପତି ହୋଇଥାନ୍ତି, ତେବେ ସ୍ପଷ୍ଟ ଭାବରେ ଇରାନକୁ ଜଣାଇଥାନ୍ତି ଯେ ଯଦି ଆପଣ ଆମକୁ କ୍ଷତି ପହଞ୍ଚାଇବା ପାଇଁ କିଛି କରନ୍ତି, ତେବେ ଆମେ ତୁମର ବୃହତ୍ତମ ସହରଗୁଡ଼ିକୁ ଓ ଦେଶକୁ ବିସ୍ଫୋରଣରେ ଉଡ଼ାଇଦେବୁ। ଆମେ ତୁମ ଦେଶକୁ ଟୁକୁଡ଼ାଟୁକୁଡ଼ା କରିଦେବୁ ବୋଲି ଟ୍ରମ୍ପ ଉତ୍ତର କରୋଲିନାର ମିଣ୍ଟ ହିଲରେ ଏକ ରାଲିରେ କହିଛନ୍ତି। ଟ୍ରମ୍ପ ଆହୁରି କହିଛନ୍ତି, ମୋତେ ହତ୍ୟା କରିବାକୁ ଦୁଇଥର ଉଦ୍ୟମ ହୋଇଛି ଯାହା ବିଷୟରେ ସମସ୍ତେ ଜାଣନ୍ତି ଏବଂ ସେଥିରେ ଇରାନ ସମ୍ପୃକ୍ତ ଥାଇପାରେ। ଆମେରିକାର ଗୁଇନ୍ଦା ଅଧିକାରୀମାନେ ତାଙ୍କୁ ହତ୍ୟା କରିବା ପାଇଁ ଇରାନର ଷଡ଼୍‌ଯନ୍ତ୍ର ସମ୍ପର୍କରେ ମଙ୍ଗଳବାର ସୂଚନା ଦେବା ପରେ ଟ୍ରମ୍ପ ଏହି ମନ୍ତବ୍ୟ ଦେଇଛନ୍ତି। ଚଳିତ ମାସ ପ୍ରାରମ୍ଭରେ ଟ୍ରମ୍ପଙ୍କ ଫ୍ଲୋରିଡା ଗଲ୍ଫ କୋର୍ସରେ ଏବଂ ଜୁଲାଇରେ ପେନସିଲଭେନିଆରେ ଏକ ରାଲିରେ ଟ୍ରମ୍ପଙ୍କ ଉପରେ ହତ୍ୟା ଉଦ୍ୟମର ତଦନ୍ତ କରୁଛନ୍ତି ଫେଡେରାଲ କର୍ତ୍ତୃପକ୍ଷ। ଉଭୟ ଘଟଣାରେ ଇରାନ କିମ୍ବା ଅନ୍ୟ କୌଣସି ବିଦେଶୀ ଶକ୍ତିର ସମ୍ପୃକ୍ତି ଥିବାର କୌଣସି ପ୍ରମାଣ ମିଳିନାହିଁ। କେବଳ ସନ୍ଦେହ କରାଯାଉଛି ଯେ ଏଥିରେ ଇରାନର ସମ୍ପୃକ୍ତି ଥାଇପାରେ।