କାଶ୍ମୀରରେ ପ୍ରକୃତିର ତାଣ୍ଡବ, ରିଆସିରେ ୭ ମୃତ, ରମ୍ବନରେ ୪ ମୃତ

ଶ୍ରୀନଗର: ଶନିବାର କେନ୍ଦ୍ର ଶାସିତ ଅଞ୍ଚଳ ଜମ୍ମୁ କାଶ୍ମୀରର ବିଭିନ୍ନ ସ୍ଥାନରେ ବାଦଲ ଫଟା ବର୍ଷା ଏବଂ ଭୂସ୍ଖଳନ ଯୋଗୁଁ ଅତି କମ୍‌ରେ ୧୧ ଜଣଙ୍କର ମୃତ୍ୟୁ ହୋଇଥିବା ‌ବେଳେ ଅନେକ ଲୋକ ନିଖୋଜ ଅଛନ୍ତି। ରିଆସି ଜିଲ୍ଲାରେ ଶୁକ୍ରବାର ପ୍ରତ୍ୟୁଷରେ ଭୂସ୍ଖଳନ ଯୋଗୁଁ ଘର ଭୁଶୁଡ଼ି ପଡ଼ିବା ଫଳରେ ଗୋଟିଏ ପରିବାରର ସାତ ଜଣ ସଦସ୍ୟଙ୍କ ମୃତ୍ୟୁ ଘଟିଛି। ଶନିବାର ସକାଳେ କଚ୍ଚା ଘରର ଭଗ୍ନାବଶେଷ ମଧ୍ୟରୁ ପାଞ୍ଚ ଜଣ ପିଲା (୪,୬,୮,୧୦,୧୨) ସମେତ ସମସ୍ତ ସାତ ଜଣ ସଦସ୍ୟଙ୍କ ମୃତଦେହ ଉଦ୍ଧାର କରାଯାଇଛି। ରାଜଗଡ଼ର ଉଚ୍ଚ ଅଞ୍ଚଳରେ ବାଦଲ ଫଟା ବର୍ଷା ହୋଇ ବନ୍ୟା ଆସିବାରୁ ରାମବନରେ ୪ ଜଣ ପ୍ରାଣ ହରାଇଛନ୍ତି ଏବଂ ୪ ଜଣ ନିଖୋଜ ଅଛନ୍ତି। ଅଧିକାରୀଙ୍କ ଅନୁଯାୟୀ, ପ୍ରବାହିତ ପାଣି ଘରଗୁଡ଼ିକୁ ଭସାଇ ନେଇଛି। ଅନେକ ନିର୍ମାଣ କ୍ଷତିଗ୍ରସ୍ତ ହୋଇଛି ଏବଂ କିଛି ସମ୍ପୂର୍ଣ୍ଣ ଭାସିଯାଇଛି। ଉକ୍ତ ଅଞ୍ଚଳରେ ଉଦ୍ଧାର ଏବଂ ରିଲିଫ୍ କାର୍ଯ୍ୟ ଜାରି ରହିଛି। କେନ୍ଦ୍ରମନ୍ତ୍ରୀ ଜିତେନ୍ଦ୍ର ସିଂହ ରାମବନରେ ଘଟିଥିବା ଘଟଣାକୁ ନିଶ୍ଚିତ କରିଛନ୍ତି ଏବଂ କହିଛନ୍ତି ଯେ ପ୍ରଭାବିତ ଲୋକଙ୍କୁ ସମସ୍ତ ପ୍ରକାରର ସହାୟତା ପ୍ରଦାନ କରାଯାଉଛି। ଉଲ୍ଲେଖଯୋଗ୍ୟ ଯେ ଜମ୍ମୁ ଏବଂ କାଶ୍ମୀରରେ ଗୋଟିଏ ସପ୍ତାହ ଧରି ପ୍ରବଳ ବର୍ଷା ହେଉଛି। ନଦୀଗୁଡିକ ବିପଦ ସଙ୍କେତ ଟପି ପ୍ରବାହିତ ହେଉଛି। ୨୭୦ କିଲୋମିଟର ଦୀର୍ଘ ଜୀବନରେଖା ଏବଂ ଉପତ୍ୟକାକୁ ଦେଶର ଅନ୍ୟାନ୍ୟ ଅଂଶ ସହିତ ସଂଯୋଗ କରୁଥିବା ଏକମାତ୍ର ସବୁଦିନିଆ ରାସ୍ତା, ଜମ୍ମୁ-ଶ୍ରୀନଗର ଜାତୀୟ ରାଜପଥ ଲଗାତାର ପଞ୍ଚମ ଦିନ ପାଇଁ ବନ୍ଦ ରହିଛି। ଏହି ସପ୍ତାହର ଆରମ୍ଭରେ ପ୍ରବଳ ବର୍ଷା ଏବଂ ବନ୍ୟା ଯୋଗୁଁ ଉଧମପୁର ଜିଲ୍ଲାର ଜାଖେନି ଏବଂ ଚେନାନି ମଧ୍ୟରେ ଭୂସ୍ଖଳନ ଘଟି ୨୦୦୦ ରୁ ଅଧିକ ଯାନବାହନ ଫସି ରହିଛି।