ଇସ୍ରାଏଲର ଘନଘନ ଆକ୍ରମଣରେ ୪ ଦିନରେ ୨ଲକ୍ଷ ଗାଜାବାସୀ ବିସ୍ଥାପିତ

ନୂଆଦିଲ୍ଲୀ: ଦକ୍ଷିଣ ଗାଜା ସହର ଖାନ୍ ୟୁନିସ୍ ଉପରେ ଇସ୍ରାଏର ଘନଘୋର ଆକ୍ରମଣ ଯୋଗୁ ଗତ ୪ ଦିନ ସୋମବାରରୁ ଗୁରୁବାର ମଧ୍ୟରେ ମଧ୍ୟରେ ୧,୮୦,୦୦୦ରୁ ଅଧିକ ପାଲେଷ୍ଟିନୀୟ ଜୀବନ ବଞ୍ଚାଇ ପଳାୟନ କରିଛନ୍ତି ବୋଲି ଜାତିସଂଘ ଶୁକ୍ରବାର କହିଛି। ଇସ୍ରାଏଲ-ହମାସ ଯୁଦ୍ଧର ୯ ମାସରୁ ଅଧିକ ସମୟ ପରେ ଖାନ୍ ୟୁନିସ୍ ଅଞ୍ଚଳରେ ସାମ୍ପ୍ରତିକ ଆକ୍ରମଣ ତୀବ୍ର ହେବା ଫଳରେ ଗାଜାରେ ଆଭ୍ୟନ୍ତରୀଣ ବିସ୍ଥାପନର ନୂଆ ଲହର ସୃଷ୍ଟି ହୋଇଛି ବୋଲି ଜାତିସଂଘର ମାନବିକତା ଏଜେନ୍ସି ଓସିଏଚ୍ଏ କହିଛି। ଏଥିରେ କୁହାଯାଇଛି ଯେ କେନ୍ଦ୍ରୀୟ ଓ ପୂର୍ବ ଖାନ୍ ୟୁନିସ୍‌ରୁ ପ୍ରାୟ ୧,୮୨,୦୦୦ ଲୋକ ବିସ୍ଥାପିତ ହୋଇଛନ୍ତି ଏବଂ ଶହଶହ ଲୋକ ପୂର୍ବ ଖାନ୍ ୟୁନିସ୍‌ରେ ଫସି ରହିଛନ୍ତି। ଇସ୍ରାଏଲ ସେନା ସୋମବାର ଦକ୍ଷିଣ ସହରର କିଛି ଅଂଶକୁ ଖାଲି କରିବାକୁ ନିର୍ଦ୍ଦେଶ ଦେଇଛି ଏବଂ ଘୋଷଣା କରିଛି ଯେ ପୂର୍ବରୁ ଏକ ସୁରକ୍ଷିତ ମାନବବାଦୀ ଅଞ୍ଚଳ ଭାବେ ଘୋଷଣା କରାଯାଇଥିବା ଅଞ୍ଚଳ ସମେତ ସେଠାରେ ଏହାର ସେନା ତା’ର କାର୍ଯ୍ୟ ଜାରି ରଖିବ। ବୁଧବାର ଇସ୍ରାଏଲ କହିଛି ଯେ ଅକ୍ଟୋବର ୭ରେ ହମାସର ଆକ୍ରମଣ ସମୟରେ ଅପହୃତ ୫ ଜଣ ବନ୍ଧକଙ୍କ ମୃତଦେହ ସେହି ଅଞ୍ଚଳରୁ ଉଦ୍ଧାର କରାଯାଇଛି। ତାଙ୍କ ସେନା ଚଳିତ ସପ୍ତାହରେ ସହରରୁ ପ୍ରାୟ ୧୦୦ ଆତଙ୍କବାଦୀଙ୍କୁ ନିପାତ କରିଛି। ହମାସ ଦ୍ବାରା ବନ୍ଧକ ଥିବା ୨୫୧ ଜଣଙ୍କ ମଧ୍ୟରୁ ୧୧୧ ଜଣ ଏବେ ବି ଗାଜା ଉପତ୍ୟକାରେ ବନ୍ଦୀ ଅଛନ୍ତି ଏବଂ ୩୯ ଜଣ ପ୍ରାଣ ହରାଇଥିବା ସେନା କହିଛି।