ଇରାନରୁ ଆର୍ମେନିଆକୁ ସ୍ଥାନାନ୍ତର ହେଲେ ୧୧୦ ଭାରତୀୟ ଛାତ୍ର

ତେହରାନ : ଇରାନ ଏବଂ ଇସ୍ରାଏଲ ମଧ୍ୟରେ ଯୁଦ୍ଧ ଉତ୍ତେଜନା ବଢ଼ୁଥିବା ବେଳେ ଭାରତ ଇରାନରୁ ଏହାର ନାଗରିକମାନଙ୍କୁ ଖାଲି କରିବା ପ୍ରକ୍ରିୟା ଆରମ୍ଭ କରିଛି। ଇରାନରୁ ୧୧୦ ଭାରତୀୟ ଛାତ୍ର ଆର୍ମେନିଆରେ ପହଞ୍ଚିଛନ୍ତି। ଆସନ୍ତାକାଲି ସେମାନେ ଦିଲ୍ଲୀ ଅଭିମୁଖେ ଉଡ଼ାଣ କରିବେ। ଉଲ୍ଲେଖଯୋଗ୍ୟ ଯେ ଭାରତ ଏକ ନୂତନ ପରାମର୍ଶାବଳିରେ ତେହରାନରେ ରହୁଥିବା ଭାରତୀୟ ନାଗରିକମାନଙ୍କୁ ସେଠାରୁ ସ୍ଥାନାନ୍ତର କରି ଦୂତାବାସ ସହିତ ଯୋଗାଯୋଗ କରିବାକୁ ଅନୁରୋଧ କରିଛି। ତେହେରାନରେ ଥିବା ଭାରତୀୟ ଦୂତାବାସ ଏକ ଜରୁରୀକାଳୀନ ହେଲ୍ପଲାଇନ୍ ନମ୍ବର ମଧ୍ୟ ଜାରି କରିଛି। ଆଜି କ୍ରମାଗତ ପଞ୍ଚମ ଦିନରେ ଇରାନ ଇସ୍ରାଏଲ ଉପରେ ଏକ ନୂତନ କ୍ଷେପଣାସ୍ତ୍ର ଏବଂ ଡ୍ରୋନ ଆକ୍ରମଣ ଆରମ୍ଭ କରିଛି, ଯାହା ମଧ୍ୟପ୍ରାଚ୍ୟକୁ ବ୍ୟାପିପାରେ ବୋଲି ଆଶଙ୍କା ସୃଷ୍ଟି କରିଛି। ଗତ ସପ୍ତାହରେ ତେଲ ଅବିବ ଇରାନର ପରମାଣୁ ପ୍ରତିଷ୍ଠାନ ବିରୁଦ୍ଧରେ ‘ଅପରେସନ୍ ରାଇଜିଂ ଲାୟନ୍’ ନାମକ ଏକ ଅପରେସନ୍ ଆରମ୍ଭ କରିବା ପରେ ଦୀର୍ଘକାଳୀନ ଶତ୍ରୁ ଇରାନ ଏବଂ ଇସ୍ରାଏଲ ମଧ୍ୟରେ ଉତ୍ତେଜନା ବୃଦ୍ଧି ପାଇଥିଲା । ସ୍ଥାନୀୟ ଗଣମାଧ୍ୟମ ରିପୋର୍ଟ ଅନୁଯାୟୀ ଇରାନ କର୍ତ୍ତୃପକ୍ଷ ତେହରାନରେ ଇସ୍ରାଏଲୀ ଗୁଇନ୍ଦା ସଂସ୍ଥା ମୋସାଦର ଏକ ଡ୍ରୋନ୍ ଉତ୍ପାଦନ କାରଖାନାକୁ ଭାଙ୍ଗି ଦେଇଥିବା ଦାବି କରିଛନ୍ତି। ରିପୋର୍ଟ ଅନୁଯାୟୀ, ଇରାନ କର୍ତ୍ତୃପକ୍ଷ ତେହେରାନ ଏବଂ ଆଲବୋର୍ଜ ପ୍ରଦେଶରେ ପୃଥକ ଅପରେସନରେ ଇସ୍ରାଏଲର ମୋସାଦ ଗୁଇନ୍ଦା ସଂସ୍ଥା ପାଇଁ କାମ କରୁଥିବା ଅଭିଯୋଗରେ ଦୁଇ ଜଣଙ୍କୁ ଗିରଫ କରିଛନ୍ତି।