ଆମେରିକାରେ କ୍ୱାଡ୍ ବୈଠକରେ ଯୋଗ ଦେବେ ଜୟଶଙ୍କର

ନୂଆଦିଲ୍ଲୀ: ଆମେରିକାର ବୈଦେଶିକ ସଚିବ ମାର୍କୋ ରୁବିଓଙ୍କ ନିମନ୍ତ୍ରଣକ୍ରମେ ବୈଦେଶିକ ବ୍ୟାପାର ମନ୍ତ୍ରୀ ଏସ୍ ଜୟଶଙ୍କର ଏବେ ଆମେରିକା ଗସ୍ତରେ ଅଛନ୍ତି। ଜୟଶଙ୍କର ଜୁନ୍‌ ୩୦ ତାରିଖରୁ ଜୁଲାଇ ୨ ତାରିଖ ପର୍ଯ୍ୟନ୍ତ ଆମେରିକା ଗସ୍ତରେ ଅଛନ୍ତି ବୋଲି ବୈଦେଶିକ ବ୍ୟାପାର ମନ୍ତ୍ରାଳୟ ପକ୍ଷରୁ ଘୋଷଣା କରାଯାଇଛି। ଜୟଶଙ୍କର ଆଜି ୱାସିଂଟନରେ କ୍ୱାଡ୍ ବୈଦେଶିକ ମନ୍ତ୍ରୀମାନଙ୍କ ବୈଠକ (କ୍ୟୁଏଫ୍‌ଏମ୍‌ଏମ୍‌)ରେ ଯୋଗ ଦେବେ। ଭାରତ, ଆମେରିକା, ଜାପାନ ଓ ଅଷ୍ଟ୍ରେଲିଆର ବୈଦେଶିକ ମନ୍ତ୍ରୀମାନଙ୍କ ଏହି ବୈଠକରେ ଆଲୋଚନା ହେବାକୁ ଥିବା କେତେକ ପ୍ରମୁଖ ବିଷୟ ମଧ୍ୟରେ ଆଞ୍ଚଳିକ ଓ ବୈଶ୍ୱିକ ବିକାଶ, ଭାରତ-ପ୍ରଶାନ୍ତ ମହାସାଗର ଉପରେ ଧ୍ୟାନ ଦେବା ସହିତ ଭାରତ ଦ୍ୱାରା ଆୟୋଜନ ହେବାକୁ ଥିବା ଆଗାମୀ କ୍ୱାଡ୍ ଲିଡର୍ସ ଶିଖର ସମ୍ମିଳନୀ ପୂର୍ବରୁ ଜାରି ରହିଥିବା କ୍ୱାଡ୍ ପଦକ୍ଷେପର ଅଗ୍ରଗତିର ସମୀକ୍ଷା ଅନ୍ତର୍ଭୁକ୍ତ। ଆଜି ନ୍ୟୁୟର୍କସ୍ଥିତ ଜାତିସଂଘ ମୁଖ୍ୟାଳୟରେ ‘ଆତଙ୍କବାଦର ମାନବିକ ମୂଲ୍ୟ’ ଶୀର୍ଷକ ଏକ ପ୍ରଦର୍ଶନୀକୁ ଉଦ୍‌ଘାଟନ କରିଥିଲେ ଜୟଶଙ୍କର। ଏହି ପ୍ରଦର୍ଶନୀ ସମଗ୍ର ବିଶ୍ୱରେ ଜଘନ୍ୟ ଆତଙ୍କବାଦୀ କାର୍ଯ୍ୟକଳାପର ବିନାଶକାରୀ ସଂଖ୍ୟା ଏବଂ ଆତଙ୍କବାଦର ମୁକାବିଲା ପାଇଁ ଅନ୍ତର୍ଜାତୀୟ ସମୁଦାୟ ଦ୍ୱାରା ନିଆଯାଇଥିବା ପଦକ୍ଷେପ ଉପରେ ଆଲୋକପାତ କରିଥିଲା। ଉଲ୍ଲେଖଯୋଗ୍ୟ, ପହଲଗାମ ଆତଙ୍କବାଦୀ ଆକ୍ରମଣର ଜବାବରେ ଭାରତ ପାକିସ୍ତାନ ଓ ପିଓକେରେ ଆତଙ୍କବାଦୀ ଭିତ୍ତିଭୂମି ନଷ୍ଟ କରିବା ଉଦ୍ଦେଶ୍ୟରେ ଅପରେସନ୍ ସିନ୍ଦୂର ଆରମ୍ଭ କରିବାର ଏକ ମାସ ପରେ ଏହି କାର୍ଯ୍ୟକ୍ରମ ଓ ଜୟଶଙ୍କରଙ୍କ ଗସ୍ତକୁ ଗୁରୁତ୍ବପୂର୍ଣ୍ଣ ମନେ କରାଯାଉଛି।