ଆମାଜନରୁ ଆଇଫୋନ୍-୧୫ କିଣିବାକୁ ଯାଇ ଠକେଇର ଶିକାର ହେଲେ ସୁପ୍ରିମ୍‌କୋର୍ଟ ଓକିଲ

ନୂଆଦିଲ୍ଲୀ: ଆମାଜନରୁ ଆଇଫୋନ୍ ୧୫ ଅର୍ଡର କରି ସୁପ୍ରିମ୍‌କୋର୍ଟର ଓକିଲ ମୁକୁଲ ପି ଉନ୍ନି ୩୮ ହଜାର ଟଙ୍କା ଠକେଇର ଶିକାର ହୋଇଥିବା ଅଭିଯୋଗ କରିଛନ୍ତି। ଆମାଜନରେ ଏକ ଏକ୍ସଚେଞ୍ଜ ଅଫର ଜରିଆରେ ଉନ୍ନି ତାଙ୍କ ଆଇଫୋନ୍ ୧୩କୁ ଅପଗ୍ରେଡ୍ କରିବାକୁ ନିଷ୍ପତ୍ତି ନେବା ପରେ ଏହି ଘଟଣା ସାମ୍ନାକୁ ଆସିଥିଲା।
ଜୁଲାଇ ୨୧, ୨୦୨୪ରେ ଏହି ଅର୍ଡର ଦିଆଯାଇଥିଲା ଏବଂ ପରଦିନ ରାତି ପ୍ରାୟ ସାଢ଼େ ୯ଟାରେ ଡେଲିଭରି ବୟ ତାଙ୍କ ବାସଭବନରେ ପହଞ୍ଚିଥିଲେ। ଡେଲିଭରି ବୟ ନୂଆ ଆଇଫୋନ୍ ୧୫ ହସ୍ତାନ୍ତର କରିବା ପରେ ଏବଂ ଉନ୍ନି ଆବଶ୍ୟକ ଓଟିପି ଦେବା ପରେ ସେ ତାଙ୍କ ପୁରୁଣା ଆଇଫୋନ୍ ୧୩ ହସ୍ତାନ୍ତର କରିଥିଲେ। ଆଶ୍ଚର୍ଯ୍ୟର କଥା ହେଉଛି, ଏହା ପରେ ଡେଲିଭରି ବୟ ଅନ୍ୟ ଏକ ଓଟିପି ମାଗିଥିଲେ। ଉନ୍ନି କହିଥିଲେ ଯେ ତାଙ୍କ ପାଖରେ ଦେବା ପାଇଁ ଅନ୍ୟ କୌଣସି ଓଟିପି ନାହିଁ। ଡେଲିଭରି ଏକ୍ଜିକ୍ୟୁଟିଭ୍ ତାଙ୍କ ସୁପରଭାଇଜରଙ୍କ ସହ ଯୋଗାଯୋଗ କରିଥିଲେ। ସୁପରଭାଇଜର ଅଶୋକ କହିଲେ ଯେ ଏକ୍ସଚେଞ୍ଜ ପ୍ରକ୍ରିୟାରେ ଏକ ଭିନ୍ନ ଟିମ୍‌ର ଆବଶ୍ୟକତା ରହିଛି ଏବଂ ପରଦିନ ଏହାକୁ ପୁନଃଅନୁଧ୍ୟାନ କରାଯିବ। ଏହା କହି ଉନ୍ନିଙ୍କୁ ନୂଆ ଆଇଫୋନ୍ ଫେରାଇଦେବାକୁ ଅନୁରୋଧ କରିଥିଲେ। ଆପତ୍ତି ସତ୍ତ୍ୱେ ଡେଲିଭରି କର୍ମଚାରୀ ବିଶାଲଙ୍କୁ ନୂଆ ଫୋନ୍ ଫେରାଇ ଦେଇଥିଲେ ଏବଂ ଉଭୟ ପରସ୍ପରର ଯୋଗାଯୋଗ ନମ୍ବର ରଖିଥିଲେ। ପରଦିନ ଉନ୍ନି ଆମାଜନର କଷ୍ଟମର କେୟାର ସହ ଯୋଗାଯୋଗ କରି ଘଟଣା ସମ୍ପର୍କରେ ଜଣାଇଥିଲେ। ଯଦି ଅର୍ଡର ଡେଲିଭରି କରା ନଯାଏ ତେବେ ଟଙ୍କା ଫେରସ୍ତ କରାଯିବ ବୋଲି ତାଙ୍କୁ ପ୍ରତିଶ୍ରୁତି ଦିଆଯାଇଥିଲା। କିନ୍ତୁ ତାଙ୍କୁ ଜୁଲାଇ ୩୧ ପର୍ଯ୍ୟନ୍ତ ଅପେକ୍ଷା କରିବାକୁ କୁହାଯାଇଥିଲା। ଜୁଲାଇ ୩୧ତାରିଖରେ ଆମାଜନ ଉନ୍ନିଙ୍କୁ ଜଣାଇଥିଲା ଯେ ତଦନ୍ତ ଶେଷ ହୋଇଛି ଏବଂ ଟଙ୍କା ଫେରସ୍ତ ହୋଇପାରିବ ନାହିଁ। ଏହାକୁ ନେଇ ଉନ୍ନି ପୁଲିସ୍‌ ନିକଟରେ ଅଭିଯୋଗ କରିଛନ୍ତି।