ଆପ୍ ଦଳକୁ ସୁପ୍ରିମକୋର୍ଟଙ୍କ ନିର୍ଦ୍ଦେଶ, ଜୁନ୍ ୧୫ ସୁଦ୍ଧା ଅଫିସ ଖାଲି କର

ନୂଆଦିଲ୍ଲୀ: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ନେତୃତ୍ବାଧୀନ ଦଳ ଆପ୍ ୨୦୨୪ ଜୁନ୍ ୧୫ ତାରିଖ ସୁଦ୍ଧା ଦିଲ୍ଲୀର ରୋଜ୍ ଆଭେନ୍ୟୁ ସ୍ଥିତ ଏହାର ଅଫିସ ଖାଲି କରିବ। ସୁପ୍ରିମକୋର୍ଟ ଆଜି ଏକ ଆବେଦନର ଶୁଣାଣି କରି ଆପ୍ ଦଳକୁ ଏହି ନିର୍ଦ୍ଦେଶ ଦେଇଛନ୍ତି। ପ୍ରଧାନ ବିଚାରପତି ଡିୱାଇ ଚନ୍ଦ୍ରଚୂଡ଼ ଏବଂ ଜଷ୍ଟିସ ଜେବି ପରଦିୱାଲା ଓ ମନୋଜ ମିଶ୍ରଙ୍କ ଖଣ୍ଡପୀଠ ଆପ୍ ଦଳକୁ ଏହାର ଅଫିସ ପାଇଁ ସଠିକ୍ ଜମି ଦେବାପାଇଁ ଜମି ଏବଂ ବିକାଶ ଅଫିସକୁ ଅନୁରୋଧ କରିବାପାଇଁ କୁହାଯାଇଛି। କୋର୍ଟ ମଧ୍ୟ ଜମି ଏବଂ ବିକାଶ ବିଭାଗକୁ ଏହାର ନିଷ୍ପତ୍ତି ୪ ସପ୍ତାହ ମଧ୍ୟରେ ଜଣାଇବାକୁ ସମୟ ଦେଇଛନ୍ତି। ଏବେ ଆପ୍ର ଅଫିସ ଥିବା ଜାଗା ଦିଲ୍ଲୀ ହାଇକୋର୍ଟକୁ ଏହାର ନ୍ୟାୟିକ ଭିତ୍ତିଭୂମି ବୃଦ୍ଧି କରିବାପାଇଁ ଦିଆଯାଇଥିଲା। ଆଗକୁ ଲୋକସଭା ନିର୍ବାଚନ ଥିବାରୁ ଆପ୍କୁ ଏହାର ଅଫିସ ଖାଲି କରିବାକୁ ଜୁନ୍ ୧୫ ତାରିଖ ପର୍ଯ୍ୟନ୍ତ ସମୟ ଦିଆଯାଇଛି। ଶାସକ ଦଳ ଆପ ପକ୍ଷରୁ କୋର୍ଟରେ ହାଜର ହୋଇଥିବା ବରିଷ୍ଠ ଆଇନୀଜୀବ ଅଭିଶେକ ମନୁ ସିଂହଭି କହିଛନ୍ତି, ଆପ୍ ହେଉଛି ଦେଶରେ ୬ ଜାତୀୟ ଦଳ ମଧ୍ୟରୁ ଗୋଟିଏ। ସେମାନେ ଆମକୁ ଜାତୀୟ ଦଳ କହୁଛନ୍ତି କିନ୍ତୁ ସମସ୍ତେ ଭଲ ସ୍ଥାନରେ ଥିବାବେଳେ ଆମକୁ ଏମିତି ସ୍ଥାନ ମିଳିଛି। ତେବେ କୋର୍ଟ କହିଛନ୍ତି, ଆପ୍ ଦଳ ଅଫିସ ପାଇଁ ଜମି ଏବଂ ବିକାଶ ବିଭାଗ ନିକଟକୁ ଯାଇ ଆବେଦନ କରୁ। ସୁପ୍ରିମକୋର୍ଟଙ୍କ ରାୟ ଉପରେ ଜବାବ ରଖି ଆପ ମୁଖ୍ୟ ମୁଖପାତ୍ର ପ୍ରିୟଙ୍କା କକ୍କର କହିଛନ୍ତି, ଦଳ ସୁପ୍ରିମକୋର୍ଟଙ୍କ ରାୟକୁ ସମ୍ମାନ ଦେଉଛି ଏବଂ ଆଶା କରୁଛି ଯେ ବିଜେପି ଉକ୍ତ ପ୍ରସଙ୍ଗରେ କୌଣସି ନକରାତ୍ମକ ରାଜନୀତି କରିବନି।