ୱାଟର ୱେଟ

ୱାଟର ୱେଟ୍ ବା ଶରୀରରେ ଅତ୍ୟଧିକ ଜଳ ଜମା ହେବା ଏକ ସାଧାରଣ ସମସ୍ୟା, ଯାହାକୁ ଚିକିତ୍ସା ବିଜ୍ଞାନ ଭାଷାରେ 'ଏଡିମା'  ବୋଲି ମଧ୍ୟ କୁହାଯାଏ। ଶରୀରର କୋଷଗୁଡ଼ିକ ମଧ୍ୟରେ କିମ୍ବା ରକ୍ତ ସଞ୍ଚାଳନ ପ୍ରକ୍ରିୟା ବାହାରେ ଥିବା ଟିସୁରେ ଯେତେବେଳେ ଅତ୍ୟଧିକ ପରିମାଣର ତରଳ ପଦାର୍ଥ ବା ଜଳ ଜମା ହୋଇଯାଏ, ତାହାକୁ ୱାଟର ୱେଟ୍ କୁହାଯାଏ। ଏହା ଚର୍ବି ବା ମାଂସପେଶୀ ଜନିତ ଓଜନ ନୁହେଁ, ବରଂ କେବଳ ପାଣି ଜମିବା କାରଣରୁ ଶରୀରର ଓଜନ ବଢ଼ିଥାଏ। ଏହା ଦ୍ୱାରା ଶରୀର ଫୁଲିଯାଏ ଏବଂ ମଣିଷ ନିଜକୁ ଭାରି ଅନୁଭବ କରେ।

କାରଣ

-  ଖାଦ୍ୟରେ ଅଧିକ ସୋଡିୟମ ବା ଲୁଣ ବ୍ୟବହାର କଲେ ଶରୀର ଅଧିକ ପାଣି ଧରି ରଖେ , ଯାହା ଓଜନ ବୃଦ୍ଧିର ମୁଖ୍ୟ କାରଣ ହୁଏ।

- ଯେତେବେଳେ ଆମେ କାର୍ବୋହାଇଡ୍ରେଟ୍ ଖାଉ, ଶରୀର ତାହାକୁ ଗ୍ଲାଇକୋଜେନ୍ ଭାବେ ସଞ୍ଚୟ କରେ। ପ୍ରତି ଗ୍ରାମ ଗ୍ଲାଇକୋଜେନ୍ ସହ ଶରୀର ପ୍ରାୟ ୩ ରୁ ୪ ଗ୍ରାମ ପାଣି ଧରି ରଖିଥାଏ।

- ମହିଳାମାନଙ୍କ କ୍ଷେତ୍ରରେ ମାସିକ ଋତୁସ୍ରାବ ପୂର୍ବରୁ ହରମୋନର ଅସନ୍ତୁଳନ ଯୋଗୁଁ ପ୍ରାୟତଃ ୱାଟର ୱେଟ୍ ବଢ଼ିଥାଏ।

- ଦୀର୍ଘ ସମୟ ଧରି ଗୋଟିଏ ସ୍ଥାନରେ ବସି ରହିଲେ କିମ୍ବା ଠିଆ ହେଲେ ମାଧ୍ୟାକର୍ଷଣ ଶକ୍ତି ଯୋଗୁଁ ଗୋଡ଼ ଓ ପାଦରେ ପାଣି ଜମା ହୋଇଥାଏ।

ପ୍ରଭାବ

- ପେଟ, ହାତ, ପାଦ ଏବଂ ମୁହଁ ଫୁଲିବା ଭଳି ଦେଖାଯାଏ। ବିଶେଷ କରି ସକାଳ ସମୟରେ ମୁହଁ ଫୁଲା ଲାଗିପାରେ।

- ମାତ୍ର ଗୋଟିଏ ଦିନ କିମ୍ବା ରାତିକ ମଧ୍ୟରେ ଓଜନ ୧ ରୁ ୨ କିଲୋ ବଢ଼ିଯାଏ କିମ୍ବା କମିଯାଏ। ଏହା ଚର୍ବି ନୁହେଁ ବରଂ ପାଣି ଯୋଗୁଁ ହୋଇଥାଏ।

- ଗଣ୍ଠିଗୁଡ଼ିକରେ କାଠିନ୍ୟ ଅନୁଭବ ହେବା ଏବଂ ଚର୍ମକୁ ଚିପିଲେ ସେଠାରେ ଗାତ ପଡ଼ିଯିବା ଭଳି ସମସ୍ୟା ଦେଖାଯାଏ।

- ପୋଷାକ, ମୁଦି କିମ୍ବା ଜୋତା ହଠାତ୍ ଟାଇଟ୍ ହୋଇଯିବା।

- କେତେକ ପରିସ୍ଥିତିରେ ଏହା ଗମ୍ଭୀର ରୋଗର ସଙ୍କେତ ହୋଇପାରେ । ଯଦି ହଠାତ୍ ଶରୀରର କୌଣସି ଅଂଶ ଅତ୍ୟଧିକ ଫୁଲିଯାଏ ଏବଂ କମେ ନାହିଁ ତେବେ ତୁରନ୍ତ ଡାକ୍ତରଙ୍କ ପରାମର୍ଶ ନିଅନ୍ତୁ ।