ଏଭଳି ଅନେକ ସ୍ୱାସ୍ଥ୍ୟ ସମସ୍ୟା ରହିଥାଏ ଯାହାକୁ ସମାଧାନ କରିବାକୁ ସଚେତନତାର ଆବଶ୍ୟକତା ରହିଛି । ସେହିଭଳି ଏକ ରୋଗ ହେଲା ଗୋଦରା ଗୋଡ ବା ଏଲିଫାଣ୍ଟାସିସ୍ । ଏହି ରୋଗ ବିଷୟରେ ଜାଣିବା ସହ ଏହାର ଲକ୍ଷଣକୁ ଚିହ୍ନଟ କରିପାରିଲେ ଏଥିରୁ ମୁକ୍ତି ମିଳିବ ।
ଆମ ଦେଶରେ ଗୋଦରା ଗୋଡ ସମସ୍ୟା ଅନେକଙ୍କ ପାଖରେ ଦେଖିବାକୁ ମିଳିଥାଏ । ହଠାତ୍ ଗୋଡ ଫୁଲିବା ଏବଂ ଜ୍ୱର ହେବା ଗୋଦରା ଗୋଡର ପ୍ରାଥମିକ ଲକ୍ଷଣ ହୋଇଥାଏ । ଏହା ଅନେକ ଲୋକଙ୍କ ପାଖରେ ଦେଖିବାକୁ ମିଳିଥାଏ । ବେଳେବେଳେ ଅଧିକ ସମୟ ଠିଆ ହୋଇ ରହିବା କିମ୍ବା ଗୋଡ ଝୁଲାଇ ବସି ରହିବାରୁ ଆମ ଗୋଡ ଫୁଲିଥାଏ, କିନ୍ତୁ ଏହା ଆରାମ କରିବା ପରେ କମି ଯାଇଥାଏ । ମାତ୍ର ଗୋଦରା ଗୋଡ ସମସ୍ୟାରେ ଏହି ଫୁଲା ଅନେକ ଦିନ ଧରି ରହିଥାଏ । ରିପୋର୍ଟ ଅନୁସାରେ ବିଶ୍ୱର ପାଖାପାଖି ୯୦ ମିଲିଅନ ଲୋକ ଏହି ରୋଗରେ ପୀଡିତ ଅଛନ୍ତି । ଏହି ବିଶେଷଭାବେ ଭାରତ, ଚୀନ ଓ ଇଣ୍ଡୋନେସିଆରେ ଦେଖିବାକୁ ମିଳିଥାଏ ।
ଆମ ଗୋଡରେ ଦୁଇପ୍ରକାର ତରଳ ପ୍ରବାହିତ ହୋଇଥାଏ । ଗୋଟିଏ ରକ୍ତ ଏବଂ ଅନ୍ୟଟି ହେଲା ଲିମ୍ଫ୍ । ଏହି ଲିମ୍ଫ ଏକ ସ୍ୱତନ୍ତ୍ର ଚ୍ୟାନେଲ ଦେଇ ଗତି କରୁଥିବାବେଳେ ଦୁଇଟି ସ୍ୱତନ୍ତ୍ର କାର୍ଯ୍ୟ ମଧ୍ୟ କରିଥାଏ । ଏହା ଗୋଡରେ ପାଣି ଜମାହେବାକୁ ରୋକିଥାଏ ଏହା ସହ ଗୋଡ ଓ ଶରୀରର ଅନ୍ୟ କୌଣସି ଅଙ୍ଗରେ ସଂକ୍ରମଣ ହେବାକୁ ଦେଇ ନଥାଏ । ତେଣୁ ଏହି ଚ୍ୟାନେଲ ବ୍ଲକ ହେବା ଦ୍ୱାରା ଗୋଡ ଫୁଲିବା ଆରମ୍ଭ ହୋଇଥାଏ । ବେଳେବେଳେ କେତେକ ରୋଗୀଙ୍କର ଜନ୍ମରୁ ଲିମ୍ଫାଟିକ୍ ଚ୍ୟାନେଲ ବିକଶିତ ହୋଇନଥାଏ, ସେହି କ୍ଷେତ୍ରରେ ଏହି ସମସ୍ୟା ଦେଖାଦେଇଥାଏ । ଏହାର ଅନେକ କାରଣ ଭିତରେ ଭାରତରେ ଏକ ପ୍ରମୁଖ କାରଣ ଦେଖିବାକୁ ମିଳିଥାଏ ଫାଇଲେରିଆ କାରଣରୁ ହେଉଥିବା ସଂକ୍ରମଣ କାରଣରୁ । ଫାଇଲେରିଆ କରାଉଥିବା ଜୀବାଣୁ ଲିମ୍ଫାଟିକ୍ ଚ୍ୟାନେଲ ଉପରେ ଆକ୍ରଣ କରିଥାଏ । ଯାହା ଫଳରେ ଲିମ୍ଫ୍ ପ୍ରବାହିତ ହେବାରେ ବ୍ୟାଘାତ ସୃଷ୍ଟି ହୋଇଥାଏ ଏବଂ ଗୋଦରଗୋଡ ସମସ୍ୟାକୁ ଜନ୍ମ ଦେଇଥାଏ । ଏହାର ଅନ୍ୟକାରଣ ମଧ୍ୟ ରହିଛି I
ଚିହ୍ନିବେ କିପରି
– ମହିଳା ହୁଅନ୍ତୁ କିମ୍ବା ପୁରୁଷ ହଠାତ୍ ସେମାନଙ୍କ ଗୋଡ ଫୁଲିବା ଆରମ୍ଭ କରିଥାଏ ।
– ବାରମ୍ବାର ଡାଇରିଆ ସମସ୍ୟା ଦେଖାଦେବା ଏହାସହ ଓଜନ ହ୍ରାସ ।
– ଗୋଡ ଓ ପାଦର ଚର୍ମରେ ଛୋଟ ଛୋଟ ଫୋଟକା ଭଳି ଫଳିଯିବା, ଯାହା ଭିତରେ ଧଳାଧଳା ପାଣି ତରଳ ରହିଥାଏ ।
– ଗୋଡ ଓ ପାଦର ଚମଡା ପତଳା ହୋଇଯିବା ।
– ଗୋଡର ନଖ ହଳଦିଆ ପଡିବା ।
ଉପଚାର
ଏହି ସମସ୍ୟାର ଉପଚାର ପାଇଁ ମେଡିସିନ୍ ସହିତ କିଛି ସ୍ୱତନ୍ତ୍ର ବ୍ୟୟାମ କରିବାକୁ ହୋଇଥାଏ । ଏହାକୁ ପ୍ରଥମେ ଡାକ୍ତରଙ୍କୁ ଦେଖାଇ ପରାମର୍ଶ ନେବାକୁ ହୋଇଥାଏ । ଏହି ରୋଗ ପାଇଁ ସ୍ୱତନ୍ତ୍ର ଔଷଧ ରହିଛି, ଯାହାକୁ ଡାକ୍ତରମାନେ ଦେଇଥାଆନ୍ତି । ବର୍ତ୍ତମାନ ବିଭିନ୍ନ ପ୍ରକାରର ଉନ୍ନତ୍ତ ଟେକନିକ୍ ବ୍ୟବହାର କରି ଡାକ୍ତରମାନେ ଏହାର ଚିକିତ୍ସା କରୁଛନ୍ତି । କିଛି ସ୍ୱତନ୍ତ୍ର ଔଷଧ ଏବଂ ହାଇପ୍ରୋଟିନ ଡାଏଟ୍ ଅନୁକରଣ କରିବା ଦ୍ୱାରା ଆମେ ଏହାକୁ ନିୟନ୍ତ୍ରଣରେ ରଖିପାରିବା । ଏହି ରୋଗ ନିମନ୍ତେ ବର୍ତ୍ତମାନ ବିଭିନ୍ନ ଅସ୍ତ୍ରୋପଚାରକୁ ମଧ୍ୟ ଆପଣା ଯାଉଛି, ଯେପରି ଡିବଲ୍କିଂ ଅପରେସନ୍, ଲିମ୍ଫଭେନିଅସ୍ ଆନାଷ୍ଟୋମୋସିସ୍, ଲିମ୍ଫାଟିକ୍ ଗ୍ରାଫିଙ୍ଗ ଆଦି । ଆପଣ ଡାକ୍ତରଙ୍କୁ ଦେଖାଇବା ପରେ ଯେ କୌଣସି ଉପାୟ ଆପଣାଇ ପାରିବେ ।
କିଭଳି ନେବେ ଗୋଡର ଯନି
– ସର୍ବଦା ଗୋଡକୁ ମଶା କାମୁଡାରୁ ଦୂରେଇ ରଖନ୍ତୁ । ଯେତେବେଳେ ଶୋଉଛନ୍ତି ଶରୀରକୁ ଘୋଡାଇ ଶୁଅନ୍ତୁ ।
– ତୁରନ୍ତ ଡାକ୍ତର ଦେଖାଇ ଚିକିତ୍ସା କରନ୍ତୁ ।
– ଗୋଡରେ କ୍ଷତ ହେବାକୁ ଦିଅନ୍ତୁ ନାହିଁ, ଏହା ହେବା ଦ୍ୱାରା ସମସ୍ୟା ବଢିଥାଏ ।
– ସବୁବେଳେ ସଂକ୍ରମିତ ହୋଇଥିବା ସ୍ଥାନକୁ ସଫା ରଖନ୍ତୁ ।
– ଅନ୍ୟ କୌଣସି ଫଙ୍ଗାଲ ଇନ୍ଫେକସନ୍ ଗୋଡରେ ହେବାକୁ ଦିଅନ୍ତୁ ନାହିଁ ।
– ସବୁବେଳେ ଗୋଡକୁ ସଫା କରିବା ସହିତ ଡାକ୍ତର ପରାମର୍ଶ କରିଥିବା ଔଷଧକୁ ଲଗାନ୍ତୁ ।
