୫୦ ବର୍ଷ ପରେ ବଦଳାନ୍ତୁ ଖାଦ୍ୟଅଭ୍ୟାସ

୫୦ ବର୍ଷ ବୟସ ପରେ ଶରୀରରେ ଅନେକ ଜୈବିକ ପରିବର୍ତ୍ତନ ଦେଖାଦେଇଥାଏ, ଯେପରିକି ହାଡ଼ ଦୁର୍ବଳ ହେବା, ମାଂସପେଶୀ କମିଯିବା ଏବଂ ହଜମ ପ୍ରକ୍ରିୟା ଧୀର ହେବା। ଏହି ସମୟରେ ନିଜକୁ ସୁସ୍ଥ ଏବଂ ଶକ୍ତିଶାଳୀ ରଖିବା ପାଇଁ ସଠିକ୍ ଖାଦ୍ୟପେୟ ଅତ୍ୟନ୍ତ ଜରୁରୀ। ତେଣୁ ଡାକ୍ତରଙ୍କ ପରାମର୍ଶରେ ନିଜ ଖାଦ୍ୟପେୟରେ ପରିବର୍ତ୍ତନ କରନ୍ତୁ ।

ପତ୍ରଯୁକ୍ତ ଶାଗ

ପାଳଙ୍ଗ, କୋବି ଏବଂ ଅନ୍ୟାନ୍ୟ ସବୁଜ ପନିପରିବାରେ ପ୍ରଚୁର ପରିମାଣରେ କ୍ୟାଲସିୟମ୍, ଭିଟାମିନ୍-କେ ଏବଂ ଆଇରନ୍ ଥାଏ। ଏହା ହାଡ଼କୁ ମଜବୁତ୍ କରିବା ସହ ରକ୍ତହୀନତା ଦୂର କରେ। ଏଥିରେ ଥିବା ଆଣ୍ଟି-ଅକ୍ସିଡାଣ୍ଟ ଆଖିର ଜ୍ୟୋତି ବଢ଼ାଇବାରେ ସାହାଯ୍ୟ କରିଥାଏ।

ଦହି

୫୦ ବର୍ଷ ପରେ ହଜମ ଜନିତ ସମସ୍ୟା ବଢ଼ିଥାଏ। ଦହିରେ ଥିବା 'ଗୁଡ୍ ବ୍ୟାକ୍ଟେରିଆ' ବା ପ୍ରୋବାୟୋଟିକ୍ସ ପେଟକୁ ସୁସ୍ଥ ରଖେ। ଏହାଛଡ଼ା ଦହି କ୍ୟାଲସିୟମର ଏକ ଉତ୍ତମ ଉତ୍ସ, ଯାହା ବୟସ୍କ ଅବସ୍ଥାରେ ହାଡ଼କୁ ଦୁର୍ବଳ ହେବାରୁ ରକ୍ଷା କରେ।

 ଅଣ୍ଡା

ଅଣ୍ଡା ହେଉଛି ଉଚ୍ଚମାନର ପ୍ରୋଟିନ୍‌ର ଏକ ସୁଲଭ ଉତ୍ସ। ମାଂସପେଶୀର କ୍ଷୟ ରୋକିବା ପାଇଁ ବୟସ୍କ ବ୍ୟକ୍ତିଙ୍କ ପାଇଁ ପ୍ରୋଟିନ୍ ଅତ୍ୟନ୍ତ ଆବଶ୍ୟକ। ଏଥିରେ 'କୋଲିନ' ନାମକ ତତ୍ତ୍ୱ ଥାଏ ଯାହା ମସ୍ତିଷ୍କର ସ୍ମୃତିଶକ୍ତି ବଜାୟ ରଖିବାରେ ସାହାଯ୍ୟ କରେ। ହେଲେ ଯଦି କୋଲେଷ୍ଟ୍ରୋଲ ଅଛି ତେବେ ଡାକ୍ତରଙ୍କ ପରାମର୍ଶରେ ଅଣ୍ଡା ଖାଆନ୍ତୁ ।

ଓଟ୍ସ

ଓଟ୍ସରେ ପ୍ରଚୁର ପରିମାଣରେ ଫାଇବର  ଥାଏ। ଏହା ରକ୍ତରେ ଶର୍କରା ସ୍ତର ନିୟନ୍ତ୍ରଣ କରିବା ସହ କୋଲେଷ୍ଟ୍ରଲ କମାଇବାରେ ସାହାଯ୍ୟ କରେ। ଏହା ହୃଦୟକୁ ସୁସ୍ଥ ରଖିବା ପାଇଁ ଏକ ଉତ୍କୃଷ୍ଟ ଜଳଖିଆ।

ବାଦାମ

ଚିନାବାଦାମ, କାଜୁ, ଆଲମଣ୍ଡ ଏବଂ ଅଖରୋଟରେ ସୁସ୍ଥ ଚର୍ବି  ଏବଂ ଓମେଗା-୩ ଫ୍ୟାଟି ଏସିଡ୍ ଥାଏ। ଏଗୁଡ଼ିକ ହୃଦ୍‌ରୋଗର ଆଶଙ୍କା କମାନ୍ତି ଏବଂ ଶରୀରକୁ ଦୀର୍ଘ ସମୟ ପର୍ଯ୍ୟନ୍ତ ଶକ୍ତି ପ୍ରଦାନ କରନ୍ତି।

ଡାଲି ଜାତୀୟ ଶସ୍ୟ

ମୁଗ, ହରଡ଼, ଚଣା ଏବଂ ବିରି ଭଳି ଡାଲିରେ ଉଭୟ ପ୍ରୋଟିନ୍ ଏବଂ ଫାଇବର ଭରପୂର ରହିଥାଏ। ଏହା ଶରୀରର ମରାମତି କରିବା ସହ ଓଜନ ନିୟନ୍ତ୍ରଣ କରିବାରେ ବହୁତ ସହାୟକ ହୋଇଥାଏ।

 ଫଳ

ପ୍ରତିଦିନ ଗୋଟିଏ ସେଓ କିମ୍ବା କଦଳୀ ଖାଇବା ଦ୍ୱାରା ଶରୀରକୁ ପୋଟାସିୟମ୍ ଏବଂ ଭିଟାମିନ୍-ସି ମିଳିଥାଏ। କଦଳୀ ରକ୍ତଚାପ ନିୟନ୍ତ୍ରଣ କରେ ଏବଂ ସେଓ ରୋଗ ପ୍ରତିରୋଧକ ଶକ୍ତି ବଢ଼ାଇଥାଏ ।

ମାଛ

ଯଦି ଆପଣ ଆମିଷାହାରୀ, ତେବେ ମାଛ ଆପଣଙ୍କ ପାଇଁ ଅତ୍ୟନ୍ତ ଲାଭଦାୟକ। ଏଥିରେ ଥିବା ଓମେଗା-୩ ଗଣ୍ଠି ବ୍ୟଥା କମାଇବାରେ ଏବଂ ହୃଦୟକୁ ସୁରକ୍ଷିତ ରଖିବାରେ ଔଷଧ ପରି କାମ କରେ ।