ବିଶ୍ୱ ଜେଲିଫିସ ଦିବସ

ପ୍ରତିବର୍ଷ ନଭେମ୍ବର ୩ ତାରିଖକୁ ବିଶ୍ୱବ୍ୟାପୀ ‘ବିଶ୍ୱ ଜେଲିଫିସ ଦିବସ’ ଭାବେ ପାଳନ କରାଯାଏ, ଯାହାର ମୁଖ୍ୟ ଉଦ୍ଦେଶ୍ୟ ହେଉଛି ପୃଥିବୀର ଏହି ପ୍ରାଚୀନ ତଥା ରହସ୍ୟମୟ ସାମୁଦ୍ରିକ ଜୀବ ପ୍ରତି ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରିବା । ସାମୁଦ୍ରିକ ଜୀବବିଜ୍ଞାନୀ ଏବଂ ପ୍ରକୃତିପ୍ରେମୀଙ୍କ ଦ୍ୱାରା ଆରମ୍ଭ ହୋଇଥିବା ଏହି ଦିବସ ମାଧ୍ୟମରେ ସମୁଦ୍ରର ବାସ୍ତବିକ ସନ୍ତୁଳନ ରକ୍ଷାରେ ଜେଲିଫିସର ଅବଦାନକୁ ସ୍ମରଣ କରାଯାଏ । ଉଲ୍ଲେଖଯୋଗ୍ୟ ଯେ, ଜେଲିଫିସ କୌଣସି ପ୍ରକୃତ ମାଛ ନୁହଁନ୍ତି, ବରଂ ଏଗୁଡ଼ିକ ମସ୍ତିଷ୍କ, ହୃତପିଣ୍ଡ, ହାଡ଼ ଓ ରକ୍ତବିହୀନ ଜେଲି-ସଦୃଶ ସାମୁଦ୍ରିକ ପ୍ରାଣୀ । ଯେଉଁମାନେ ଡାଇନୋସରଙ୍କ ଆବିର୍ଭାବର ପ୍ରାୟ ୫୦୦ ନିୟୁତ ବର୍ଷ ପୂର୍ବରୁ ପୃଥିବୀର ମହାସାଗରଗୁଡ଼ିକରେ ବାସ କରିଆସୁଛନ୍ତି। ପାରିସ୍ଥିତିକ ସନ୍ତୁଳନ ଦୃଷ୍ଟିରୁ ଜେଲିଫିସର ଗୁରୁତ୍ୱ ଢେର ଅଧିକ । ଏଗୁଡ଼ିକ  ତିମି ଏବଂ ଅନ୍ୟାନ୍ୟ ବଡ଼ ସାମୁଦ୍ରିକ ଜୀବଙ୍କର ମୁଖ୍ୟ ଆହାର ହୋଇଥିବା ବେଳେ ସମୁଦ୍ରର କାର୍ବନ ସାଇକେଲକୁ ନିୟନ୍ତ୍ରଣ କରିବାରେ ମଧ୍ୟ ସାହାଯ୍ୟ କରନ୍ତି । ଏହାଛଡ଼ା, ଜେଲିଫିସର ଦେହରୁ ମିଳୁଥିବା ‘ଗ୍ରୀନ୍ ଫ୍ଲୋରସେଣ୍ଟ ପ୍ରୋଟିନ୍’ ବୈଜ୍ଞାନିକ ଓ ଚିକିତ୍ସା ଗବେଷଣାରେ କର୍କଟ ତଥା ଅନ୍ୟାନ୍ୟ ଜଟିଳ ରୋଗର ଅନୁସନ୍ଧାନ ପାଇଁ ବହୁଳ ଭାବରେ ବ୍ୟବହୃତ ହେଉଛି । ତେବେ ଜଳବାୟୁ ପରିବର୍ତ୍ତନ, ସମୁଦ୍ର ପ୍ରଦୂଷଣ, ପ୍ଲାଷ୍ଟିକ୍ ବର୍ଜ୍ୟବସ୍ତୁ ଏବଂ ଅତ୍ୟାଧିକ ମାଛ ଧରାଯିବା ହେତୁ ସାମୁଦ୍ରିକ ସଂସ୍ଥାରେ ଅସନ୍ତୁଳନ ଦେଖାଦେଉଛି । ଯାହା ଫଳରେ ଜେଲିଫିସଙ୍କ ସଂଖ୍ୟାରେ ଅସ୍ବାଭାବିକ ବୃଦ୍ଧି ଘଟୁଛି । ତେଣୁ ଏହି ବିଶ୍ୱ ଜେଲିଫିସ ଦିବସ ଅବସରରେ ମହାସାଗରଗୁଡ଼ିକୁ ପ୍ରଦୂଷଣମୁକ୍ତ ରଖିବା ଏବଂ ଏହି ଅଦ୍ଭୁତ କାଳଜୟୀ ଜୀବଙ୍କ ସୁରକ୍ଷା ପାଇଁ ସଂକଳ୍ପ ନେବା ଆମ ସମସ୍ତଙ୍କର ନୈତିକ କର୍ତ୍ତବ୍ୟ ।