ବିଶ୍ୱ ଆଲଜାଇମର ଦିବସ
ପ୍ରତିବର୍ଷ ସେପ୍ଟେମ୍ବର ୨୧ ତାରିଖକୁ ସମଗ୍ର ବିଶ୍ୱରେ 'ବିଶ୍ୱ ଆଲଜାଇମର ଦିବସ' ଭାବେ ପାଳନ କରାଯାଇଥାଏ । ମସ୍ତିଷ୍କଜନିତ ସମସ୍ୟା ଆଲଜାଇମର ସମ୍ପର୍କରେ ଜନସାଧାରଣଙ୍କୁ ଜାଗ୍ରତ କରିବା ତଥା ଏହା ସହ ଜଡ଼ିତ ସାମାଜିକ କୁସଂସ୍କାର ଓ ଭ୍ରାନ୍ତ ଧାରଣାକୁ ଦୂର କରିବା ଏହି ଦିବସ ପାଳନର ମୁଖ୍ୟ ଉଦ୍ଦେଶ୍ୟ । ୧୯୮୪ ମସିହାରେ ପ୍ରତିଷ୍ଠିତ 'ଆଲଜାଇମର୍ସ ଡିଜିଜ୍ ଇଣ୍ଟରନ୍ୟାସନାଲ'ର ୧୦ମ ବାର୍ଷିକୋତ୍ସବ ଅବସରରେ, ୧୯୯୪ ସେପ୍ଟେମ୍ବର ୨୧ରେ ଏଡିନବର୍ଗଠାରେ ପ୍ରଥମ କରି ଏହି ଦିବସର ଶୁଭାରମ୍ଭ କରାଯାଇଥିଲା । ଜର୍ମାନ ମାନସିକ ରୋଗ ବିଶେଷଜ୍ଞ ଆଲୋଇସ ଆଲଜାଇମର ୧୯୦୧ ମସିହାରେ ପ୍ରଥମେ ଏହି ରୋଗ ଚିହ୍ନଟ କରିଥିବାରୁ, ତାଙ୍କ ନାମାନୁସାରେ ଏହାର ନାମକରଣ କରାଯାଇଛି । ବୟସ ବୃଦ୍ଧି ସହ ମସ୍ତିଷ୍କର କୋଷଗୁଡ଼ିକ କ୍ରମଶଃ ନଷ୍ଟ ହେବା ଫଳରେ ରୋଗୀ ନିଜର ସ୍ମରଣଶକ୍ତି, ଚିନ୍ତାଶକ୍ତି, ଏବଂ ଦୈନନ୍ଦିନ କାର୍ଯ୍ୟ କରିବାର କ୍ଷମତା ହରାଇବସେ । ବର୍ତ୍ତମାନ ସାରା ବିଶ୍ୱରେ କୋଟି କୋଟି ଲୋକ ଏହି ବ୍ୟାଧି ଦ୍ୱାରା ପ୍ରଭାବିତ ହେଉଥିବା ବେଳେ ଏହାର କୌଣସି ସମ୍ପୂର୍ଣ୍ଣ ଆରୋଗ୍ୟକାରୀ ଚିକିତ୍ସା ନାହିଁ। ମାତ୍ର ପ୍ରାରମ୍ଭିକ ଅବସ୍ଥାରେ ରୋଗ ଚିହ୍ନଟ କରି ଉପଯୁକ୍ତ ସେବା, ଔଷଧ ଓ ମାନସିକ ସାହାଯ୍ୟ ଯୋଗାଇଦେଲେ ରୋଗୀର ଜୀବନଧାରଣ ମାନକୁ ସୁଧାରିହେବ। ଏହି କାରଣରୁ ଏହିଦିନ ଅନେକ କାର୍ଯ୍ୟକ୍ରମ ଜରିଆରେ ଲୋକଙ୍କୁ ଏ ରୋଗ ସମ୍ପର୍କରେ ସଚେତନ କରାଯାଇଥାଏ ।
