ସହିଦ ଦିବସରେ ମନେ ପଡନ୍ତି ‘ବାପୁ’

ଆଜି ଜାତିର ପିତା ମହାତ୍ମା ଗାନ୍ଧିଙ୍କ ୭୬ ତମ ତିରୋଧାନ ଦିବସ । ପ୍ରତିବର୍ଷ ୩୦ ଜାନୁଆରୀରେ ଗାନ୍ଧିଜୀଙ୍କ ମୃତ୍ୟୁ ବାର୍ଷିକୀ ସହିତ ଶହୀଦ ଦିବସ ମଧ୍ୟ ପାଳନ କରାଯାଏ। ଭାରତର ସ୍ୱାଧୀନତା ସଂଗ୍ରାମର ମୁଖ୍ୟ ନାୟକ ମୋହନଦାସ କରମଚାନ୍ଦ ଗାନ୍ଧିଙ୍କ ମୃତ୍ୟୁ ୩୦ ଜାନୁଆରୀ ୧୯୪୮ ରେ ହୋଇଥିଲା । ଦିଲ୍ଲୀ ସ୍ଥିତ ବିରଳା ହାଉସରେ ପ୍ରାର୍ଥନା ସଭାକୁ ଯିବା ବେଳେ ଆତତାୟୀ ନାଥୁରାମ ଗଡସେ ତାଙ୍କୁ ଅତି ନିର୍ମମ ଭାବେ ଗୁଳି କରି ହତ୍ୟା କରିଥିଲେ ।

ମହାତ୍ମା ଗାନ୍ଧୀ ଥିଲେ ସତ୍ୟର ପୂଜାରୀ I ତାଙ୍କ ପାଇଁ ସତ୍ୟ ଥିଲା ଭଗବାନ I ଏହି ଅବସରରେ ସାରାଦେଶ ଗାନ୍ଧିଜୀଙ୍କୁ ଶ୍ରଦ୍ଧାଞ୍ଜଳି ଜଣାଉଛି । ସକାଳୁ ସକାଳୁ ରାଜଘାଟରେ ଗାନ୍ଧିଜୀଙ୍କ ସ୍ମୃତିଚାରଣ ସହ ପୁଷ୍ପମାଲ୍ୟ ଅର୍ପଣ କରିଛନ୍ତି ବହୁ ବରିଷ୍ଠ ନେତା । ମହାତ୍ମା ଗାନ୍ଧିଙ୍କ ଆଦର୍ଶ, ଅହିଂସାର ପ୍ରେରଣା, ସତ୍ୟର ଶକ୍ତି ବ୍ରିଟିଶମାନଙ୍କୁ ପରାସ୍ତ କରିଥିଲା ।

ମହାତ୍ମା ଗାନ୍ଧୀଙ୍କ ତିରୋଧାନ ଦିବସ ଉପଲକ୍ଷେ ସତ୍ୟ ଓ ଅହିଂସାର ଜନକଙ୍କୁ ମନେ ପକାଇଛି ଓଡ଼ିଶା I ରାଜ୍ୟ ସଂଗ୍ରହାଳୟରେ ଲୋକାର୍ପିତ ହେବାକୁ ଯାଉଛି ମହାତ୍ମା ଗାନ୍ଧୀ ସଂଗ୍ରହାଳୟ I ୧୯୨୧ ମସିହା ରୁ ୧୯୪୬ ମସିହା ପର୍ଯ୍ୟନ୍ତ ମଧ୍ୟରେ ଗାନ୍ଧିଜୀ ୮ ଥର ଓଡିଶା ଗସ୍ତରେ ଆସିଥିଲେ I ସେହି ସ୍ଥାନ ଗୁଡିକ ଗ୍ୟାଲେରୀରେ ସ୍ଥାନ ପାଇଛି I ୧୯୨୧ ମସିହାରେ କାଠଯୋଡ଼ି ନଦୀକୂଳରେ ସେ ପ୍ରଥମ ଗସ୍ତ କରିଥିଲେ I ସେଠାରେ ହୋଇଥିବା ସାଧାରଣ ସଭାରେ ପଣ୍ଡିତ ଗୋପବନ୍ଧୁ ଦାସ ଏବଂ କସ୍ତୁରବା ଗାନ୍ଧୀ ଉପସ୍ଥିତ ଥିଲେ I ୧୯୨୫ ରେ ୨ୟ ଗସ୍ତ ସମୟରେ ସେ ଉତ୍କଳ ଟାନେରୀ ଯାଇଥିଲେ I ୧୯୨୭ ତୃତୀୟ ଗସ୍ତରେ ବୋଲଗଡ଼ ବଙ୍ଗଳାରେ ସେ ଲୋକଙ୍କ ସହ ଆଲୋଚନା କରିଥିଲେ I

ସେହିପରି ୧୯୨୮ ରେ ସମ୍ବଲପୁର,୧୯୩୪ ରେ ସେ ପୁରୀ ଜଗନ୍ନାଥ ମନ୍ଦିରରୁ ପଦଯାତ୍ରା ଆରମ୍ଭ କରିଥିଲେ I ୧୦୩୮ ରେ ସପ୍ତମ ଗସ୍ତ କରିଥିବାବେଳେ ୧୯୪୬ରେ ଅଷ୍ଟମ ଗସ୍ତ ସମୟରେ ସେ ବ୍ରହ୍ମପୁର ରେଳଷ୍ଟେସନ ରେ ଏକ ସାଧାରଣ ସଭାକୁ ଉଦ୍ବୋଧନ ଦେଇଥିଲେ I

ସ୍ୱାଧୀନତା ସଂଗ୍ରାମରେ ଗାନ୍ଧୀଜୀଙ୍କର ଅତୁଳନୀୟ ଅବଦାନ ରହିଛି । ଗାନ୍ଧୀଜୀଙ୍କର ବଳିଦାନ ଦିବସକୁ ସାରାଦେଶରେ ସହିଦ ଦିବସ ଭାବରେ ପାଳନ କରାଯାଏ Iଏହି ଅବସରରେ ଦେଶର ସଶସ୍ତ୍ର ବାହିନୀର ଶହୀଦମାନଙ୍କୁ ଅଭିବାଦନ ଜଣାଯାଏ ଏବଂ ବାପୁଙ୍କୁ ସ୍ମରଣ କରିବା ସହ ସହିଦମାନଙ୍କ ସ୍ମୃତିରେ ଦୁଇ ମିନିଟର ନିରବ ପ୍ରାର୍ଥନା ମଧ୍ୟ କରାଯାଏ।