ଦିଲ୍ଲୀର ଧୂଆଁ ଆସ୍ତରଣର କାରଣ

ଦିଲ୍ଲୀର ପ୍ରଦୂଷଣ ଯେପରି ଏହାକୁ ଏକ ନୂଆ ପରିଚୟ ବିଶ୍ବସ୍ତରରେ ଦେଉଛି । ପ୍ରତିବର୍ଷ ଶୀତଦିନ ଆସିଲେ ଦିଲ୍ଲୀର ବାୟୁମଣ୍ଡଳର ମାନ କମିବାରେ ଲାଗିଥାଏ ଏବଂ ପ୍ରଦୂଷଣର ମାତ୍ରା ବଢିବାରେ ଲାଗିଥାଏ । ତେବେ ଏହାପଛରେ ଏକାଧିକ କାରଣ ରହିଛି, ଯାହା ଦିଲ୍ଲୀର ପ୍ରଦୂଷଣକୁ ବଢାଉଛି । ଆସନ୍ତୁ ସେହିଭଳି କିଛି କାରଣ ସମ୍ପର୍କରେ ଆଲୋଚନା କରିବା ।

ସହରୀକରଣ ବଢିବା

ଦିଲ୍ଲୀ ବର୍ତ୍ତମାନ ଭାରତର ସବୁଠାରୁ କ୍ଷୀପ୍ରଗତିରେ ସହରୀକରଣକୁ ଆପଣାଉଥିବା ରାଷ୍ଟ୍ର ପାଲଟିଛି । ଏହାର ଜନସଂଖ୍ୟା ବଢିବାରେ ଲାଗିଛି, ଯେଉଁକାରଣରୁ ଗାଡିମୋଟରର ସଂଖ୍ୟା, ଶିଳ୍ପ କାରଖାନାର ମାତ୍ରା ବଢିବାରେ ଲାଗିଛି । ଲୋକଙ୍କର ସଂଖ୍ୟା ବଢ଼ୁଥିବାରୁ ସେମାନଙ୍କର ଆବଶ୍ୟକତା ବଢୁଛି, ତେଣୁ ସେହି ଅନୁଯାୟୀ ସମସ୍ତ ପ୍ରଦୂଷଣକାରୀ ସାମଗ୍ରୀ ମଧ୍ୟ ବଢୁଛି । ଏହି ବୃଦ୍ଧି କାରଣରୁ ଏହାର ସିଧାସଳଖ ନକରାତ୍ମକ ପ୍ରଭାବ ବାୟୁମଣ୍ଡଳ ଉପରେ ପଡୁଥିବା ଦେଖିବାକୁ ମିଳୁଛି ।

ଯାନବାହାନ ନିର୍ଗମନ

ଯାନବାହାନ ସବଠାରୁ ବଡ କାରଣ ଦିଲ୍ଲୀ ବାୟୁ ପ୍ରଦୂଷଣର । ବାୟୁ ପ୍ରଦୂଷଣକୁ ସବୁଠାରୁ ଅଧିକ ଖରାପ ସ୍ତରକୁ ନେଇଥାଏ ଗାଡିରୁ ବାହାରୁଥିବା ଧୂଆଁ । ରାସ୍ତାରେ ଗଡୁଥିଲା ପୁରୁଣା ଡିଜେଲ ଗାଡି ଏଥିରେ ଅଧିକ ଯୋଗଦାନ କରିଥାଏ । ସେହିଭଳି ଦିଲ୍ଲୀରେ ଅଧିକ ଟ୍ରାଫିକ ସମସ୍ୟା ଦେଖିବାକୁ ମିଳିଥାଏ । ତେବେ ଟ୍ରାଫିକରେ ଗାଡି ଠିଆ ହେଉଥିବାବେଳେ ଗାଡି ମଟରରୁ ନାଇଟ୍ରୋଜେନ ଅକ୍ସାଇଡ, କାର୍ବନ ମନୋକ୍ସାଇଡ ସହିତ ବିଭିନ୍ନ କ୍ଷତିକାରକ ଗ୍ୟାସ ନିର୍ଗତ ହୋଇଥାଏ । ଯାହା ବାୟୁର ମାନକୁ ବିପଦଜନ୍ନକ ସ୍ଥିତିକୁ ନେବାରେ ବିଶେଷ ସହାୟକ ହୋଇଥାଏ ।

ଶିଳ୍ପାଞ୍ଚଳ ପ୍ରଦୂଷଣ

ଦିଲ୍ଲୀରେ ଛୋଟବଡ ଅନେକ ଶିଳ୍ପ ରହିଛି, ଯେଉଁମାନଙ୍କର ଭାଗିଦାରୀ ବାୟୁପ୍ରଦୂଷଣରେ ଖୁବ ଅଧିକ ରହୁଛି । ଏହି ଶିଳ୍ପ ତାଲିକାରେ ଇଟା, କେମିକାଲ ପ୍ଲାଣ୍ଟ ଆଦି ସାମିଲ ରହିଛି । ଯେଉଁ ଶିଳ୍ପରୁ ସଲଫର ଡାଇଅକ୍ସାଇଡ, ଭୋଲାଟାଇଲ ଅର୍ଗାନିକ କମ୍ପାଉଣ୍ଡ ନିର୍ଗତ ହେଉଛି, ଯେଉଁକାରଣରୁ ବାୟୁର ମାନ ଖରାପ ହେବାରେ ଲାଗିଛି । ବିଶେଷଭାବେ ଦିଲ୍ଲୀର ଗାଜିଆବାଦ, ନୋଏଡା, ଫରିଦାବାଦରେ ରହିଥିବା ଶିଳ୍ପ ଗୁଡିକ ଦିଲ୍ଲୀ ବାୟୁପ୍ରଦୂଷଣର ମୁଖ୍ୟ କାରଣ ସାଜୁଛି । ଏହି ସ୍ଥାନରେ ଥିବା ଶିଳ୍ପରୁ ଖୁବ ଅଧିକ ପରିମାଣର ପ୍ରଦୂଷକ ବାୟୁମଣ୍ଡଳକୁ ନିର୍ଗତ ହେଉଛି । ଏଠାରେ ସିମେଣ୍ଟ କାରଖାନା, ଷ୍ଟିଲ ମିଲ୍ସ, ଟେକ୍ସଷ୍ଟାଇଲ ୟୁନିଟ ଓ କେମିକାଲ ମ୍ୟାନୁଫାକ୍ଚରିଂ ୟୁନିଟ ରହିଛି । ଯେଉଁଥିରୁ ଅନେକ ପ୍ରଦୂଷକ ଯେପରି ସଲଫର ଡାଇଅକ୍ସାଇଡ, ନାଇଟ୍ରୋଜେନ୍ ଅକ୍ସାଇଡ ଆଦି ସାମିଲ ରହିଛି । ସେହିଭଳି ଅନେକ ଶିଳ୍ପ ରହିଛି ଯେଉଁଥିରେ କୋଇଲାକୁ ଜଳାଯାଇ ବିଦ୍ୟୁତ ଶକ୍ତି ଉତ୍ପନ୍ନ କରାଯାଉଛି । ବିଦ୍ୟୁତ ଶକ୍ତି ସହିତ ଏହି ଶିଳ୍ପରୁ ପ୍ରଦୂଷଣକାରୀ ସାମଗ୍ରୀ ମଧ୍ୟ ଖୁବ ନିଗର୍ତ ହେଉଛନ୍ତି, ଯାହା ଦିଲ୍ଲୀର ବାୟୁମଣ୍ଡଳକୁ ପ୍ରଦୂଷିତ କରୁଛନ୍ତି ।

ନିର୍ମାଣଧୀନ କାର୍ଯ୍ୟ

ଦିଲ୍ଲୀରେ ଅନେକ ସମୟରେ ବିଭିନ୍ନ ଅଞ୍ଚଳରେ ନିର୍ମାଣ କାର୍ଯ୍ୟ ଜାରି ରହିଥାଏ । ଯେଉଁଗୁଡିକ ମଧ୍ୟ ପ୍ରଦୂଷଣର ମାତ୍ରାକୁ ବଢାଇଥାଆନ୍ତି । ଏହି କାର୍ଯ୍ୟ ସମୟରେ ନିଗର୍ତ ହେଉଥିବା ଧୂଳି ବାୟୁମଣ୍ଡଳରେ ପିଏମ ୧୦ ଓ ପିଏମ୍ ୨.୫କୁ ବଢାଇଥାଏ । ଏହି ସମସ୍ତ ନିର୍ମାଣଧୀନ କାର୍ଯ୍ୟ ଗୁଡିକରେ ଧୂଳିକୁ ନିୟନ୍ତ୍ରଣ କରିବାକୁ ବେଳେବେଳେ କୌଣସି ପଦକ୍ଷେପ ନିଆଯାଇନଥାଏ । ଯେଉଁକାରଣରୁ ବାୟୁମଣ୍ଡଳର ପ୍ରଦୂଷିତ ଧୂଳିକଣା ବଢିଚାଲିଥାଏ ।

କୃଷି ବର୍ଜ୍ୟ ଦହନ

ଦିଲ୍ଲୀ ପ୍ରଦୂଷଣର କାରଣ ଭାବେ କୃଷି ବର୍ଜ୍ୟ ଦହନକୁ ବିଶେଷଭାବେ ଦାୟୀ କରାଯାଇଥାଏ । ଗହମ ଚାଷ ହେବାପରେ ବାହାରୁଥିବା ଅଳିଆ ବା ଗଛ ଗୁଡିକର ବଳକା ଅଂଶବିଶେଷକୁ ଚାଷୀମାନେ ପୋଡି ଥାଆନ୍ତି, ଯାହା ଦିଲ୍ଲୀ ବାୟୁପ୍ରଦୂଷଣରେ ଏକ ପ୍ରମୁଖ କାରଣ ଭାବେ ବିବେଚିତ ହୋଇଥାଏ । ଏହା ଚାଷୀଙ୍କ ପାଇଁ ଏକ ସୁବିଧା ପ୍ରକ୍ରିୟା ହୋଇଥାଏ ନିଜ ଚାଷ ଯମିକୁ ପରବର୍ତ୍ତୀ ଚାଷପାଇଁ ପ୍ରସ୍ତୁତ କରିବାକୁ । ତେଣୁ ଅଧିକାଂଶ ଚାଷୀ ଏହି ପ୍ରକ୍ରିୟାକୁ ଆପଣାଇଥାଆନ୍ତି । ଅକ୍ଟୋବର ଓ ନଭେମ୍ବର ମାସରେ ହିଁ ପଞ୍ଜାବ, ହରିୟାଣା ଚାଷୀମାନେ ଖୁବ ଅଧିକ ପରିମାଣର କୃଷି ବର୍ଜ୍ୟକୁ ଜାଳିଥାଆନ୍ତି । ଯେଉଁ ଧୂଆଁରେ କାର୍ବୋନ ମୋନୋଅକ୍ସାଇଡ, ସଲଫର ଡାଇଅକ୍ସାଇଡ ସହିତ ଅନ୍ୟାନ କ୍ଷତିକାରକ କଣିକା ସାମିଲ ଥାଏ । ଯାହା ଦିଲ୍ଲୀର ବାୟୁମଣ୍ଡଳରେ ମିଶିବା ସହିତ ବାୟୁପ୍ରଦୂଷଣକୁ ବଢାଇଥାଏ ।