ଫ୍ୟାଟି ଲିଭର ଚିକିତ୍ସାର ନୂଆ ଦିଗ

ଜେରୁଜେଲମର ହିବ୍ରୁ ବିଶ୍ୱବିଦ୍ୟାଳୟର ଗବେଷକମାନେ ଏକ ନୂତନ ଅଧ୍ୟୟନରୁ ଜାଣିବାକୁ ପାଇଛନ୍ତି ଯେ କ୍ୟାନାବିସ୍‌ ବା ଗଞ୍ଜେଇ ଗଛରୁ ମିଳୁଥିବା ଦୁଇଟି ଗୁରୁତ୍ୱପୂର୍ଣ୍ଣ ଯୌଗିକ 'କ୍ୟାନାବିଡିଓଲ' ଏବଂ 'କ୍ୟାନାବିଗେରୋଲ'  ମାରାତ୍ମକ ଫ୍ୟାଟି ଲିଭର ରୋଗର ଚିକିତ୍ସାରେ ସହାୟକ ହୋଇପାରିବ । 'ବ୍ରିଟିଶ ଜର୍ଣ୍ଣାଲ ଅଫ୍ ଫାର୍ମାକୋଲୋଜି'ରେ ପ୍ରକାଶିତ ଏହି ଗବେଷଣା ଅନୁଯାୟୀ, ଏହି ଦୁଇଟି ଯୌଗିକ ଯକୃତରେ ଜମିଥିବା ଅତ୍ୟଧିକ ଚର୍ବିକୁ କମାଇବା ସହ ଶରୀରର ମେଟାବୋଲିକ୍ ସ୍ୱାସ୍ଥ୍ୟରେ ଉନ୍ନତି ଆଣିଥାଏ । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଗଞ୍ଜେଇରେ ଥିବା ଟିଏଚସି ଭଳି ଏହି ସିବିଡି ଏବଂ ସିବିଜି ଯୌଗିକଗୁଡ଼ିକ ନିଶାଦାୟକ ନୁହଁନ୍ତି, ଯାହା ଫଳରେ ଏହାକୁ ଦୀର୍ଘକାଳୀନ ଚିକିତ୍ସା ପାଇଁ ବ୍ୟବହାର କରାଯାଇପାରିବ । ବିଶ୍ୱର ପ୍ରାୟ ଏକ ତୃତୀୟାଂଶ ବୟସ୍କ ବ୍ୟକ୍ତି ବର୍ତ୍ତମାନ 'ମେଟାବୋଲିକ୍ ଡିସଫଙ୍କସନ୍-ଆସୋସିଏଟେଡ୍ ଷ୍ଟିଆଟୋଟିକ୍ ଲିଭର ଡିଜିଜ୍'  ବା ଫ୍ୟାଟି ଲିଭର ସମସ୍ୟାରେ ପୀଡ଼ିତ ଥିବାବେଳେ, ଏହି ନୂତନ ଆବିଷ୍କାର ଏକ ବଡ଼ ସଫଳତା ବୋଲି ଆଲୋଚନା କରାଯାଉଛି । ବୈଜ୍ଞାନିକଙ୍କ କହିବା ଅନୁଯାୟୀ, ଏହି ଯୌଗିକଗୁଡ଼ିକ ଯକୃତରେ 'ଫସଫୋକ୍ରିଏଟିନ୍' ନାମକ ଏକ ଅଣୁର ମାତ୍ରା ବଢ଼ାଇଥାନ୍ତି, ଯାହା କୋଷଗୁଡ଼ିକ ପାଇଁ ଏକ ବ୍ୟାକଅପ୍ ବ୍ୟାଟେରୀ ଭଳି କାମ କରିଥାଏ । ଏହାସହ ଯକୃତର କୋଷଗୁଡ଼ିକୁ ସଫା ରଖୁଥିବା 'କ୍ୟାଥେପସିନ୍' ଏନଜାଇମର ସକ୍ରିୟତାକୁ ବୃଦ୍ଧି କରି କ୍ଷତିକାରକ ଚର୍ବି ଓ ବର୍ଜ୍ୟବସ୍ତୁ ବାହାର କରିବାରେ ସାହାଯ୍ୟ କରିଥାଏ ।  ତେବେ ମଣିଷଙ୍କ ଉପରେ ଏହାର ପୂର୍ଣ୍ଣ ପ୍ରଭାବ ଜାଣିବା ପାଇଁ ଅଧିକ କ୍ଲିନିକାଲ୍ ଟ୍ରାଏଲ୍‌ର ଆବଶ୍ୟକତା ରହିଛି ବୋଲି ଗବେଷକମାନେ ମତ ଦେଇଛନ୍ତି । ଯଦି ଏହି କ୍ଲିନିକାଲ ଟ୍ରାଏଲ ସଫଳ ହୁଏ ତେବେ ଏହା ସ୍ବାସ୍ଥ୍ୟକ୍ଷେତ୍ରରେ ଖୁବ ପରିବର୍ତ୍ତନ ଆଣିବ ବୋଲି ବୈଜ୍ଞାନିକମାନେ ମତ ରଖିଛନ୍ତି ।