ଅନେକ ସହରର ବାୟୁ ଦୂଷିତ

କେବଳ ଦିଲ୍ଲୀ ନୁହେଁ ଭାରତର ଅନେକ ସହର ଏଭଳି ରହିଛି ଯାହାର ବାୟୁର ମାନ ଖୁବ ଖରାପ । ଏଠାରେ ମଧ୍ୟ ପ୍ରଦୂଷଣ ଦିନକୁ ଦିନ ବଢିବାରେ ଲାଗିଛି । ତେବେ ପ୍ରତିବର୍ଷ ଏକ୍ୟୁଆଇ ବା ବାୟୁର ମାନ ସୂଚାଙ୍କ ରିପୋର୍ଟ ପ୍ରକାଶ ପାଇଥାଏ । ଯେଉଁଥିରେ ଭାରତର ପ୍ରତିଟି ସହରର ବାୟୁମଣ୍ଡଳର ମାନକୁ ଯାଞ୍ଚ କରାଯାଇ ସବୁଠାରୁ ଖରାପ ବାୟୁମାନ ଥିବା ୧୦ଟି ସହରକୁ ବଛା ଯାଇଥାଏ । ଯାହାକୁ ନେଇ ସେଠିକାର ବାସିନ୍ଦାଙ୍କୁ ସତର୍କ କରାଯାଇଥାଏ । ଏହି ପ୍ରକ୍ରିୟାରେ ପ୍ରତିଟି ସହରର ବାୟୁମଣ୍ଡଳରେ ୧୦ଟି ପ୍ରଦୂଷକ ଯଥା ପିଏମ୍ ୧୦, ପିଏମ୍ ୨.୫, ନାଇଟ୍ରୋଜେନ ଡାଇଅକ୍ସାଇଡ, ସଲଫର ଡାଇଅକ୍ସାଇଡ, କାର୍ବୋନ ମନୋଅକ୍ସାଇଡ, ଓଜୋନ, ଆମୋନିଆ ଓ ଲିଡର ପରିମାଣକୁ ମପା ଯାଇଥାଏ । ଯାହାପରେ ସହର ଗୁଡିକୁ ରାଙ୍କ ମିଳିଥାଏ । ତେବେ ଆସନ୍ତ ଜାଣିବା ୨୦୨୫ରେ ଏହିଭଳି ୧୦ ଟି ସହର ସମ୍ପର୍କରେ ଯାହାର ବାୟୁ ଅଧିକ ପ୍ରଦୂଷିତ ।

୧. ଥୁଥୁକୁଡି (ତାମିଲନାଡୁ)

ତାମିଲନାଡୁର ଏହି ସହରର ବାୟୁରେ ପିଏମ୍ ୧୦ର ମାତ୍ରା ଖୁବ ଅଧିକ ରହିଥାଏ । ଏହି ସହରରେ ଶିଳ୍ପ ଖୁବ ଅଧିକ ଥିବାରୁ ଏହାର ବାୟୁ ପ୍ରଦୂଷିତ । ଏଠାରେ ଥିବା ଫ୍ୟାକ୍ଟ୍ରି, ଥର୍ମାଲ ପ୍ଲାଣ୍ଟରୁ ପ୍ରତିଦିନ ଅନେକ ଧୂଆଁ ବାୟୁମଣ୍ଡଳକୁ ନିର୍ଗତ ହୋଇଥାଏ, ଯାହା ବାୟୁକୁ ପ୍ରଦୂଷିତ କରୁଛି ।

୨ କାଟିହାଲ (ହରିୟାଣା)

ଏହି ସ୍ଥାନରେ ଖୁବ ଅଧିକମାତ୍ରାରେ ସହରୀକରଣ ବାୟୁ ପ୍ରଦୂଷଣର କାରଣ ସାଜିଛି । ଏଠାରେ ଯାନବାହାନରୁ ଧୂଳି, ଚାଷ ଯମିରୁ ଧୂଳି କାରଣୁ ବାୟୁମଣ୍ଡଳ ପ୍ରଦୂଷିତ ହେଉଛି ।

୩ ବାଗପଟ (ଉତ୍ତର ପ୍ରଦେଶ)

ଦିଲ୍ଲୀ ଏନ୍ସିଆରର ନିକଟବର୍ତ୍ତୀ ଏହି ସହରରେ ଟ୍ରାଫିକ, କୋଠା ନିର୍ମାଣ, ଇଟା ଫ୍ୟାକ୍ଟ୍ରି ଆଦିରୁ ନିର୍ଗମନ କାରଣରୁ ଏହି ସହରର ବାୟୁ ପ୍ରଦୂଷିତ ହେଉଛି ।

୪ ମିରଟ (ଉତ୍ତରପ୍ରଦେଶ)

ଏହା ଆର୍ଥିକ ଓ ଶିଳ୍ପର ଏକ ପ୍ରମୁଖ ସହର, ଯେଉଁକାରଣରୁ ଏହାର ବାୟୁମଣ୍ଡଳ ଅଧିକ ପ୍ରଦୂଷିତ । ଏଠାରେ ଶିଳ୍ପ ଗୁଡିକରୁ ନିର୍ଗମନ ଖୁବ ଅଧିକ ଥାଏ, ଯାହା ବାୟୁମଣ୍ଡଳକୁ ପ୍ରଦୂଷିତ କରିଥାଏ ।

୫ ଜିନ୍ଦ (ହରିୟାଣା)

ଏହି ସହରର ଅଧିକାଂଶ ସ୍ଥାନ ଚାଷଯମିରେ ଭରପୂର । ଯେଉଁଠାରେ କୃଷିବର୍ଜ୍ୟ ଦହନ, ରାସ୍ତାର ଧୂଳି କାରଣରୁ ବାୟୁ ମଣ୍ଡଳରେ ଅଧିକ ପ୍ରଦୂଷକ ମିଳିଥାଏ ।

୬. ଗାଜିବାଦ (ଉତ୍ତରପ୍ରଦେଶ)

ଦିଲ୍ଲୀ ଏନ୍ସିଆର ସହର ଭିତରେ ଏହା ସବୁଠାରୁ ଅଧିକ ପ୍ରଦୂଷିତ ସହର । ଏଠାରେ ଦେଖିବାକୁ ମିଳୁଥିବା ଟ୍ରାଫିକ, ଶିଳ୍ପ, ନିର୍ମାଣ କାର୍ଯ୍ୟ ଆଦିରୁ ଅନେକ ପ୍ରଦୂଷକ ବାୟୁମଣ୍ଡଳରେ ମିଶିଥାଏ ।

୭ ମାନେସର (ହରିୟାଣା)

ଏହି ସହର ମୋଟର ଗାଡି ନିର୍ମାଣ ଓ ଶିଳ୍ପର ପ୍ରମୁଖ ସହର ହୋଇଥାଏ । ତେଣୁ ଏହି ସବୁ ଶିଳ୍ପରୁ ନିର୍ଗମନ ବାୟୁପ୍ରଦୂଷଣର ମୁଖ୍ୟ କାରଣ ସାଜିଥାଏ ।

୮. ମୁଜାଫରନଗର (ଉତ୍ତରପ୍ରଦେଶ)

ଏଠାରେ ଥିବା ଚିନି ଫ୍ୟାକ୍ଟ୍ରି, ଗାଡିମଟର ଓ ବାୟୋଗ୍ୟାସ ଦହନରୁ ଅଧିକାଂଶ ପ୍ରଦୂଷକ ବାହାରିଥାଏ ଯାହା ବାୟୁମଣ୍ଡଳରେ ମିଶିଥାଏ ।

୯. କାଶିପୁର (ଉତ୍ତରାଖଣ୍ଡ)

ଏହି ସହରରେ କାଗଜ କଳ, ରସାୟନ ଶିଳ୍ପ ଆଦି ଏକାଧିକ ରହିଛି, ଯାହା ପ୍ରଦୂଷଣର ପ୍ରମୁଖ କାରଣ ସାଜୁଛି ।

୧୦. ହପୁର (ଉତ୍ତରପ୍ରଦେଶ)

ଏଠାରେ ଇଟା ତିଆରି କାରଖାନା ଖୁବ ଅଧିକ ପରିମାଣରେ ଅଛି । ଏହାସହିତ ଯାନବାହାନ, କୃଷିବର୍ଜ୍ୟ ଦହନ ଆଦିରୁ ଏହି ସହର ପ୍ରଦୂଷିତ ହେଉଛି ।