ଆନ୍ତର୍ଜାତୀୟ ସଂଗ୍ରହାଳୟ ଦିବସ

ଆମର ଅତୀତର ଗୌରବମୟ ଇତିହାସ, ସଂସ୍କୃତି, କଳା ଏବଂ ସଭ୍ୟତାର ଅମୂଲ୍ୟ ସମ୍ପଦକୁ ସାଇତି ରଖୁଥିବା ସଂଗ୍ରହାଳୟଗୁଡ଼ିକର ମହତ୍ତ୍ୱକୁ ପ୍ରତିପାଦିତ କରିବା ଉଦ୍ଦେଶ୍ୟରେ ପ୍ରତିବର୍ଷ ମେ’ ୧୮ ତାରିଖକୁ ସମଗ୍ର ବିଶ୍ୱରେ 'ଆନ୍ତର୍ଜାତୀୟ ସଂଗ୍ରହାଳୟ ଦିବସ'  ଭାବେ ବହୁ ଉତ୍ସାହର ସହ ପାଳନ କରାଯାଉଛି । ୧୯୭୭ ମସିହାରେ 'ଆନ୍ତର୍ଜାତୀୟ ସଂଗ୍ରହାଳୟ ପରିଷଦ' ଦ୍ୱାରା ଏହି ଦିବସ ପାଳନର ଶୁଭାରମ୍ଭ କରାଯାଇଥିଲା । ଏହାର ମୁଖ୍ୟ ଲକ୍ଷ୍ୟ ହେଉଛି ସମାଜର ବିକାଶ, ସାଂସ୍କୃତିକ ଆଦାନପ୍ରଦାନ ଏବଂ ବିଭିନ୍ନ ସମୁଦାୟ ମଧ୍ୟରେ ପାରସ୍ପରିକ ବୁଝାମଣା ଓ ଶାନ୍ତି ପ୍ରତିଷ୍ଠା ଦିଗରେ ସଂଗ୍ରହାଳୟଗୁଡ଼ିକର ଗୁରୁତ୍ୱପୂର୍ଣ୍ଣ ଭୂମିକା ସମ୍ପର୍କରେ ଜନସଚେତନତା ସୃଷ୍ଟି କରିବା । ସଂଗ୍ରହାଳୟଗୁଡ଼ିକ କେବଳ ପୁରୁଣା ଜିନିଷ ରଖିବାର ସ୍ଥାନ ନୁହଁନ୍ତି, ବରଂ ଏହା ଆମ ପୂର୍ବପୁରୁଷଙ୍କ ଜ୍ଞାନକୌଶଳ ଓ ଜୀବନଶୈଳୀର ପ୍ରେରଣାଦାୟୀ ଦର୍ପଣ ଏବଂ ଆଗାମୀ ପିଢ଼ି ପାଇଁ ଶିକ୍ଷାର ଏକ ମାଧ୍ୟମ ହୋଇଥିବାରୁ ଏହି ଦିବସର ତାତ୍ପର୍ଯ୍ୟ ଅତି ବ୍ୟାପକ । ପ୍ରତିବର୍ଷ ଏକ ନିର୍ଦ୍ଦିଷ୍ଟ  'ଥିମ୍'କୁ ନେଇ ଏହି ଦିବସ ପାଳିତ ହୋଇଥାଏ । ଏହି ଅବସରରେ ବିଶ୍ୱର ପ୍ରାୟ ସମସ୍ତ ପ୍ରମୁଖ ସଂଗ୍ରହାଳୟରେ ସାଧାରଣ ଜନତା ଓ ବିଶେଷ କରି ଛାତ୍ରଛାତ୍ରୀମାନଙ୍କ ପାଇଁ ମାଗଣା ପ୍ରବେଶ ସୁବିଧା ଯୋଗାଇ ଦିଆଯାଇଥାଏ ।  ସଂଗ୍ରହାଳୟଗୁଡ଼ିକ ପକ୍ଷରୁ ସ୍ୱତନ୍ତ୍ର ପ୍ରଦର୍ଶନୀ, ସାଂସ୍କୃତିକ କାର୍ଯ୍ୟକ୍ରମ, କଳା ଉତ୍ସବ, ଆଲୋଚନାଚକ୍ର, କାହାଣୀ କହିବା ପ୍ରତିଯୋଗିତା ଏବଂ ଗାଇଡେଡ୍ ଟୁର୍‌ ବା ସଂଗ୍ରହାଳୟ ପରିକ୍ରମାର ଆୟୋଜନ କରାଯାଏ । ଯାହା ଲୋକଙ୍କୁ ସେମାନଙ୍କ ଜେଜେବାପା-ଜେଜେମା’ଙ୍କ ସମୟର ଇତିହାସ ସହ ସିଧାସଳଖ ଯୋଡ଼ିବାର ସୁଯୋଗ ଦେଇଥାଏ । ଆଧୁନିକ ଡିଜିଟାଲ୍ ଯୁଗରେ ଅନେକ ସଂଗ୍ରହାଳୟ ଏବେ 'ଭର୍ଚୁଆଲ୍ ଟୁର୍'ର ମଧ୍ୟ ବ୍ୟବସ୍ଥା କରୁଛନ୍ତି, ଯାହାଦ୍ୱାରା ଘରେ ବସି ମଧ୍ୟ ଲୋକେ ବିଶ୍ୱର ବିଭିନ୍ନ ପ୍ରାନ୍ତର ଐତିହ୍ୟକୁ ଦେଖିପାରୁଛନ୍ତି। ତେଣୁ, ଆନ୍ତର୍ଜାତୀୟ ସଂଗ୍ରହାଳୟ ଦିବସ କେବଳ ଏକ ଔପଚାରିକ ପାଳନ ନୁହେଁ, ବରଂ ଏହା ଆମର ସାଂସ୍କୃତିକ ମୂଳଦୁଆକୁ ସୁରକ୍ଷିତ ରଖିବା ଏବଂ ବିଶ୍ୱ ଐତିହ୍ୟର ସଂରକ୍ଷଣ ପାଇଁ ସମସ୍ତଙ୍କୁ ସଂକଳ୍ପବଦ୍ଧ ହେବାକୁ ଆହ୍ୱାନ ଦେଇଥାଏ ।