ହିଟ୍ ଇଣ୍ଡେକ୍ସ

 ଆକଳନ କରିବା ଏବଂ ପୂର୍ବାନୁମାନ ପ୍ରଦାନ କରିବା ପାଇଁ ଆଇଏମଡି ଏକ 'ହିଟ୍ ଇଣ୍ଡେକ୍ସ' (ଉତ୍ତାପ ସୂଚକାଙ୍କ) ନାମକ ପ୍ରାୟୋଗିକ ଉପକରଣ ମଧ୍ୟ ପ୍ରବର୍ତ୍ତନ କରିଛି, ଯେଉଁଥିରେ ଆଦ୍ରତାକୁ ଅନ୍ତର୍ଭୁକ୍ତ କରାଯାଇଛି । ହିଟ୍ ଇଣ୍ଡେକ୍ସ ହେଉଛି ବାୟୁର ତାପମାତ୍ରା ଏବଂ ଆପେକ୍ଷିକ ଆଦ୍ରତାର ଏକ ମିଶ୍ରଣ, ଏବଂ ପ୍ରକୃତ ବାୟୁ ତାପମାତ୍ରା ସହିତ ଆପେକ୍ଷିକ ଆଦ୍ରତାକୁ ହିସାବକୁ ନେଲେ ବାସ୍ତବରେ କେତେ ଗରମ ଅନୁଭୂତ ହୁଏ, ଏହା ତାହା ମାପିଥାଏ । ଏହାକୁ କେତେବେଳେ କେତେବେଳେ 'ଆପାରେଣ୍ଟ ଟେମ୍ପରେଚର'  ମଧ୍ୟ କୁହାଯାଏ ଏବଂ ଏହାକୁ ଶରୀର ଦ୍ୱାରା ଅନୁଭୂତ ହେଉଥିବା ତାପମାତ୍ରା ଭାବେ ବୁଝାଯାଇପାରେ। ଭାରତରେ ଗରମ ଏବଂ ଆଦ୍ରତାକୁ ଭାରତୀୟ ପାଣିପାଗ ବିଭାଗ ଦ୍ୱାରା ପୃଷ୍ଠଭୂମି ପର୍ଯ୍ୟବେକ୍ଷଣ କେନ୍ଦ୍ରଗୁଡ଼ିକର ଏକ ନେଟୱର୍କ ମାଧ୍ୟମରେ ମାପ କରାଯାଏ । ଯାହା ତାପମାତ୍ରା ପାଇଁ ଥର୍ମୋମିଟର ଏବଂ ଆଦ୍ରତା ମାପ ପାଇଁ ହାଇଗ୍ରୋମିଟର କିମ୍ବା ସାଇକ୍ରୋମିଟର ବ୍ୟବହାର କରେ । ଗରମ ଏବଂ ଆଦ୍ରତା ମାପିବା ପାଇଁ ବ୍ୟବହୃତ ଉପକରଣଗୁଡ଼ିକ ମଧ୍ୟରେ ଓଦା/ଶୁଖିଲା ବଲ୍ବ ଥର୍ମୋମିଟର, ସ୍ଲିଙ୍ଗ୍ ସାଇକ୍ରୋମିଟର ଏବଂ ଡିଜିଟାଲ୍ ସେନ୍ସର ସାମିଲ ରହିଛି, ଯାହା ହିଟ୍ ଇଣ୍ଡେକ୍ସ ଗଣନା କରିଥାଏ ।

ସେହିପରି ମାନବ ଶରୀର ଉପରେ ଗରମ ଏବଂ ଆଦ୍ରତାର ମିଳିତ ପ୍ରଭାବକୁ ବୁଝିବା ପାଇଁ ବୈଜ୍ଞାନିକମାନେ 'ୱେଟ୍-ବଲ୍ବ ଟେମ୍ପରେଚର' ଡବ୍ଲୁବିଟି ବ୍ୟବହାର କରନ୍ତି । ପୂର୍ବ ଗବେଷଣାରୁ ଜଣାପଡ଼ିଥିଲା ଯେ ମଣିଷ ୩୫ ଡିଗ୍ରୀ ସେଲସିୟସ୍ ଡବ୍ଲୁବିଟି ପର୍ଯ୍ୟନ୍ତ ବଞ୍ଚିପାରିବ, କିନ୍ତୁ ଏକ ସାମ୍ପ୍ରତିକ ଅଧ୍ୟୟନରୁ ଜଣାପଡ଼ିଛି ଯେ ଗରମ ଏବଂ ଆଦ୍ର ପରିସ୍ଥିତିରେ ପ୍ରାୟ ୩୧ ଡିଗ୍ରୀ ସେଲସିୟସ୍ ଡବ୍ଲୁବିଟି ରେ ହିଁ ଶରୀର ନିଜର ଆଭ୍ୟନ୍ତରୀଣ ତାପମାତ୍ରାକୁ ନିୟନ୍ତ୍ରଣ କରିବା କ୍ଷମତା ହରାଇବାକୁ ଲାଗେ । ଯାହା ପୂର୍ବ ଆକଳନ ତୁଳନାରେ ଯଥେଷ୍ଟ କମ୍ ଅଟେ । ଆଦ୍ର ଗରମ ଶୁଷ୍କ ଗରମ ଅପେକ୍ଷା ଅଧିକ ବିପଜ୍ଜନକ ହୋଇପାରେ କାରଣ ଏହା ସହଜରେ ବାରି ହୋଇନଥାଏ ।