ଆବର୍ଜନାରୁ ଲକ୍ଷାଧିକ ଟଙ୍କା ରୋଜଗାର
ପପ୍ ଷ୍ଟାର୍ ଟେଲର ସ୍ୱିଫ୍ଟ ଏବଂ ଟ୍ରାଭିସ୍ କେଲସେଙ୍କ ବିବାହ ସମୟରେ ନ୍ୟୁୟର୍କର ମ୍ୟାଡିସନ୍ ସ୍କୋୟାର୍ ଗାର୍ଡେନ ବାହାରେ ହଜାର ହଜାର ପ୍ରଶଂସକଙ୍କ ଭିଡ଼ ଏଠାରେ ଜମା ହୋଇଥିଲା । ତେବେ ଏହି ସ୍ଥାନରୁ ବାହାରିଥିବା ଆବର୍ଜନା ବିକ୍ରି କରି ଜଣେ କଳାକାର ପ୍ରାୟ ୧.୨ ଲକ୍ଷ ଟଙ୍କା ରୋଜଗାର କରିଥିବା ସୂଚନା ଦେଇଛନ୍ତି । ନ୍ୟୁୟର୍କର କଳାକାର ଜଷ୍ଟିନ୍ ଗିଗ୍ନେକ୍ ବିବାହ ସମୟରେ ଆଖପାଖରେ ପଡ଼ିଥିବା ବୋତଲ ଠିପି, ସିଗାରେଟ୍ ଖଣ୍ଡ, ପୋଲିସ୍ ଟେପ୍, ଷ୍ଟ୍ରୋ, ପ୍ଲାଷ୍ଟିକ୍ ଚାମଚ, ରିଙ୍ଗ୍ ପପ୍ କ୍ୟାଣ୍ଡି ର୍ୟାପର୍ ଏବଂ ଏକ ସିଙ୍ଗଲ୍ ଏୟାରପଡ୍ ଭଳି ଜିନିଷଗୁଡ଼ିକୁ ଏକାଠି କରିଥିଲେ । ଏହାପରେ ସେ ଏହି ଆବର୍ଜନାକୁ ଛୋଟ ପାରଦର୍ଶୀ ପ୍ଲାଷ୍ଟିକ୍ କ୍ୟୁବ୍ରେ ସିଲ୍ କରି ଏହାକୁ ଏକ କଳାକୃତିର ଆକାର ଦେଇଥିଲେ ଏବଂ ପ୍ରତ୍ୟେକ କ୍ୟୁବ୍ର ମୂଲ୍ୟ ୨୫ ଡଲାର (ପ୍ରାୟ ୨,୪୦୦ ଟଙ୍କା) ରଖିଥିଲେ। ବିଶେଷ କଥା ହେଉଛି, ସେ ଏଭଳି ପ୍ରାୟ ୫୦ଟି କ୍ୟୁବ୍ ବିକ୍ରି କରିଥିଲେ ଯାହା ମାତ୍ର ୨୪ ଘଣ୍ଟା ମଧ୍ୟରେ ଶେଷ ହୋଇଯାଇଥିଲା । ଜଷ୍ଟିନଙ୍କ କହିବାନୁଯାୟୀ, ଟେଲର ସ୍ୱିଫ୍ଟଙ୍କ ପ୍ରଶଂସକମାନେ ଏହି ବିବାହ ସହ ଜଡ଼ିତ ଯେକୌଣସି ସ୍ମରଣୀୟ ଜିନିଷକୁ ନିଜ ପାଖରେ ରଖିବାକୁ ଚାହୁଁଥିଲେ । ତେଣୁ ସେ ଏହି କ୍ୟୁବ୍ ଗୁଡ଼ିକୁ ସେହି ଐତିହାସିକ ମୁହୂର୍ତ୍ତର "ଟାଇମ୍ କ୍ୟାପ୍ସୁଲ୍" ବୋଲି ନାଁ ରଖିବା ସହ ପ୍ରତ୍ୟେକ କ୍ୟୁବ୍ ଉପରେ "ଜଷ୍ଟ ମ୍ୟାରେଡ" ର ଏକ ମୋହର ଲଗାଇଥିଲେ। ଯାହା ବିବାହ ସମୟରେ ବାହାରେ ଲାଗିଥିବା ବଡ଼ ସ୍କ୍ରିନ୍ରେ ମଧ୍ୟ ପ୍ରଦର୍ଶିତ ହେଉଥିଲା ।
