ଭାରତରେ ମନା

ଭାରତରେ କୁକୁର ରଖୁଥିବା ଲୋକଙ୍କ ସଂଖ୍ୟା ଲକ୍ଷ ଲକ୍ଷ ହୋଇଥିଲେ ହେଁ, ସେମାନଙ୍କ ଆକ୍ରମଣାତ୍ମକ ମନୋଭାବ, ସାଧାରଣ ଜନତାଙ୍କ ସୁରକ୍ଷା ଏବଂ ଜଳବାୟୁ ଅନୁକୂଳତାକୁ ନେଇ ସୃଷ୍ଟି ହୋଇଥିବା ଚିନ୍ତାଜନକ ପରିସ୍ଥିତି ଯୋଗୁଁ ସମସ୍ତ ପ୍ରଜାତିର କୁକୁର ରଖିବା ପାଇଁ ଆଇନଗତ ଅନୁମତି ନାହିଁ । କୁକୁର କାମୁଡ଼ା ଓ ଆକ୍ରମଣର ବଢ଼ୁଥିବା ମାମଲାକୁ ଦୃଷ୍ଟିରେ ରଖି କେନ୍ଦ୍ର ସରକାର ୨୦୨୪ ମସିହାରେ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକୁ ୨୩ଟି "ଭୟଙ୍କର" କୁକୁର ପ୍ରଜାତି ଏବଂ ସେମାନଙ୍କର କ୍ରସ୍‌ବ୍ରିଡ୍‌ର ବିକ୍ରି, ପ୍ରଜନନ (ବ୍ରିଡିଂ) ଏବଂ ଆମଦାନୀ ଉପରେ ପ୍ରତିବନ୍ଧକ ଲଗାଇବାକୁ ପରାମର୍ଶ ଦେଇଥିଲେ । ଏହି ପ୍ରତିବନ୍ଧିତ ତାଲିକାରେ ଅନେକ ବିବାଦୀୟ ପ୍ରଜାତି ସାମିଲ ଅଛନ୍ତି, ଯେପରିକି ନିଜର ଶରୀର ଗଠନ ଓ ଆକ୍ରମଣାତ୍ମକ ବ୍ୟବହାର ପାଇଁ ଚର୍ଚ୍ଚାରେ ଥିବା ପିଟ୍‌ବୁଲ୍ ଟେରିୟର, ମାଂସପେଶୀ ବହୁଳ ରଟୱାଇଲର୍, ଶିକାର ପାଇଁ ବ୍ୟବହୃତ ହେଉଥିବା ଡୋଗୋ ଆର୍ଜେଣ୍ଟିନୋ, ଏବଂ ଅତ୍ୟଧିକ ସୁରକ୍ଷାତ୍ମକ ମନୋଭାବ ସମ୍ପନ୍ନ ଆମେରିକାନ୍ ବୁଲ୍‌ଡଗ୍ ସାମିଲ ଅଛନ୍ତି । ଏହାବ୍ୟତୀତ ଦକ୍ଷିଣ ଆଫ୍ରିକାର ବୃହତ ମାଷ୍ଟିଫ୍ ପ୍ରଜାତିର ବୋଏରବୋଏଲ, ଯାହାକୁ ନିୟନ୍ତ୍ରଣ କରିବା ସାଧାରଣତଃ କଷ୍ଟକର ହୋଇଥାଏ ସେ ମଧ୍ୟ ଏହି ତାଲିକାରେ ସାମିଲ ଅଛି । ସେହିଭଳି ଗଧିଆ ଓ କୁକୁରର ହାଇବ୍ରିଡ୍ 'ଉଲ୍ଫଡଗ୍ସ' ମଧ୍ୟ ଏହି କଟକଣା ପରିସରଭୁକ୍ତ ହୋଇଛନ୍ତି । ସାରା ଦେଶରେ ଏହି ନିୟମର କାର୍ଯ୍ୟକାରିତା ଭିନ୍ନ ଭିନ୍ନ ଅଞ୍ଚଳରେ ଅଲଗା ହୋଇପାରେ, କିନ୍ତୁ ବର୍ତ୍ତମାନ ଏହି ସମସ୍ତ ପ୍ରଜାତି ଭାରତରେ ସବୁଠାରୁ ବିବାଦୀୟ ଏବଂ ନିୟନ୍ତ୍ରିତ କୁକୁର ପ୍ରଜାତି ଭାବେ ଉଭା ହୋଇଛନ୍ତି ।