ଭାରତରେ ଗ୍ରୀଷ୍ମ ପ୍ରବାହର କାରଣ

ଏକାଧିକ କାରଣ ଏକାଠି କାମ କରିବା ଯୋଗୁଁ ତାପମାତ୍ରାରେ ଏଭଳି ସାଂଘାତିକ ବୃଦ୍ଧି ଦେଖାଦେଉଛି ।  ମେଘମୁକ୍ତ ସ୍ୱଚ୍ଛ ଆକାଶ ଯୋଗୁଁ ସୂର୍ଯ୍ୟଙ୍କ ସିଧାସଳଖ କିରଣ ଭୂପୃଷ୍ଠକୁ ଅଧିକ ଗରମ କରୁଛି ଏବଂ ଏଥିସହିତ ୟୁରେସିଆ ଓ ହିମାଳୟ ଅଞ୍ଚଳରେ ବରଫ ଆସ୍ତରଣ ହ୍ରାସ ପାଇବା କାରଣରୁ ଗରମ ପ୍ରତିଫଳିତ ହୋଇପାରୁ ନାହିଁ, ଯାହା ତାପମାତ୍ରା ବଢ଼ାଇବାରେ ସହାୟକ ହେଉଛି । ଏହା ବ୍ୟତୀତ, ପ୍ରଶାନ୍ତ ମହାସାଗରର ଗରମ ହେବା, ନିଉଟ୍ରାଲ୍ ଏନ୍‌ସୋ ସ୍ଥିତି ଏବଂ ଶୁଷ୍କ ଉତ୍ତର-ପଶ୍ଚିମ ପବନ ବାୟୁମଣ୍ଡଳରେ ମେଘ ସୃଷ୍ଟି ଓ ବର୍ଷା ହେବାରେ ବାଧା ସୃଷ୍ଟି କରୁଛି, ଯାହାଫଳରେ ପ୍ରଚଣ୍ଡ ଗରମ ସ୍ଥିତି ଉପୁଜୁଛି ।

ଜଳ ଏବଂ ଖାଦ୍ୟ ଉପରେ ପ୍ରଭାବ

ଗ୍ରୀଷ୍ମ ପ୍ରବାହ ଯୋଗୁଁ ବାଷ୍ପୀଭବନ ପ୍ରକ୍ରିୟା ତେଜ୍ ହୋଇଥାଏ ଏବଂ ମାଟିର ଆଦ୍ରତା ସ୍ତର ହ୍ରାସ ପାଇଥାଏ, ଯାହା ଦେଶରେ ମରୁଡ଼ି ସଦୃଶ ପରିସ୍ଥିତି ସୃଷ୍ଟି କରିପାରେ । ଗ୍ରୀଷ୍ମ ପ୍ରବାହ ସମୟରେ କମ୍ ବର୍ଷା ହେବା କାରଣରୁ ଜଳାଭାବ ଦେଖାଦେଇଥାଏ ଏବଂ ମାନବ ବ୍ୟବହାର ପାଇଁ ପାଣିର ଉପଲବ୍ଧତା ସୀମିତ ହୋଇଯାଏ । ଗ୍ରୀଷ୍ମ ପ୍ରବାହ ଜନିତ ଏହି ଜଳାଭାବ କୃଷି ଉତ୍ପାଦନ, ଗୋପାଳନ, କୁକୁଡ଼ା ପାଳନ ଏବଂ ମତ୍ସ୍ୟ ଚାଷକୁ ମଧ୍ୟ ଗମ୍ଭୀର ଭାବେ ପ୍ରଭାବିତ କରିଥାଏ । ଗବେଷଣାରୁ ମିଳିଥିବା ତଥ୍ୟ ଅନୁସାରେ ଗ୍ରୀଷ୍ମ ପ୍ରବାହ ଭାରତର ବିଦ୍ୟୁତ୍ ଏବଂ ଜଳ ଯୋଗାଣ ବ୍ୟବସ୍ଥା ଉପରେ ଚାପ ବଢ଼ାଇବ, ଯାହା ଦେଶର ଭିତ୍ତିଭୂମିକୁ ଦୁର୍ବଳ କରିବ । ବିଶ୍ୱ ତାପନ କାରଣରୁ ଜଳର ଉପଲବ୍ଧତା ଏବଂ ଏହାର ଚାହିଦା ମଧ୍ୟରେ ବ୍ୟବଧାନ ବହୁ ପରିମାଣରେ ବୃଦ୍ଧି ପାଇପାରେ, ଯାହା କେବଳ ଖାଦ୍ୟ ଉତ୍ପାଦନକୁ ବାଧାପ୍ରାପ୍ତ କରିବ ନାହିଁ, ବରଂ ଜନସାଧାରଣଙ୍କ ସ୍ୱାସ୍ଥ୍ୟ ଉପରେ ମଧ୍ୟ ସାଂଘାତିକ ପ୍ରଭାବ ପକାଇବ ।