ଓଡ଼ିଶାରେ ମଧ୍ୟ ବଢୁଛି ପ୍ରଦୂଷଣ

ଓଡ଼ିଶାର ରାଜଧାନୀ ଭୁବନେଶ୍ବରର ବାୟୁର ମାନ ମଧ୍ୟ ଖୁବ ଖରାପ ହେବାରେ ଲାଗିଛି । ନିକଟରେ ସୂଚନା ଅନୁସାରେ ଭୁବନେଶ୍ବରର ବାୟୁର ମାନ କ୍ରମାଗତ ଭାବେ ଖରାପ ହୋଇଚାଲୁଥିବା ସୂଚନା ମିଳିଛି । ନଭେମ୍ବର ମାସରେ ଏପରି ଅବସ୍ଥାକୁ ପରିବେଶବିଦମାନ ଗମ୍ଭୀରଭାବେ ନେଇଛନ୍ତି । ଓଏସପିସିବିର ଅଧିକାରୀଙ୍କ ମତରେ ଓଡ଼ିଶାରେ ମଧ୍ୟ ଶୀତଦିନେ ଅର୍ଥାତ ଡିସେମ୍ବର ୧୫ ରୁ ଜାନୁଆରୀ ୧୫ ଭିତରେ ବେସି ପ୍ରଦୂଷିତ ହୋଇଥାଏ । ହେଲେ ଚଳିତ ବର୍ଷ ନଭେମ୍ବରରେ ହିଁ ସ୍ଥିତି ଖରାପ ଦେଖିବାକୁ ମିଳିଛି । ତେଣୁ ଏହିବର୍ଷ ପ୍ରଦୂଷଣର ମାତ୍ରା ବଢିଥିବା ନେଇ ସେମାନେ ଆଶଙ୍କା କରିଛନ୍ତି । କେବଳ ଭୁବନେଶ୍ବର ନୁହେଁ କଟକ, ଅନୁଗୁଳ, ବାଲେଶ୍ବର, ତାଲଚେର ଭଳି ସହରରେ ମଧ୍ୟ ବାୟୁର ମାନ କମିଥିବା ଦେଖିବାକୁ ମିଳିଛି । ଏହାର ପ୍ରଭାବ ଲୋକଙ୍କ ସ୍ବାସ୍ଥ୍ୟ ଉପରେ ପଡିପାରେ ବୋଲି ଅଧିକାରୀମାନେ ଆଶଙ୍କା କରିଛନ୍ତି । ତେଣୁ ବର୍ତ୍ତମାନ ବାହାରକୁ ଯିବା ସମୟରେ ମାସ୍କ ପିନ୍ଧିବାକୁ ଅଧିକାରୀମାନେ ସମସ୍ତଙ୍କୁ ପରାମର୍ଶ ଦେଇଛନ୍ତି ।

କୁହୁଡି ଓ ଧୂଆଁଳିଆ ଆସ୍ତରଣ

ଅନେକ ସମୟରେ ଶୀତଦିନେ ଆସିଲେ ସକାଳୁ ଧୂଆଁଳିଆ ଆସ୍ତରଣ ଦେଖିବାକୁ ମିଳିଥାଏ । ଯାହାକୁ ଅନେକ ଲୋକ କୁହୁଡି ବୋଲି ଭୁଲରେ ବୁଝିଥାଆନ୍ତି । ହେଲେ ଏହା ପ୍ରଦୂଷଣ ଜନିତ ଧୂଆଁଳିଆ ଆସ୍ତରଣ ହୋଇଥାଏ । ତେଣୁ କୁହୁଡି ଓ ଏହି ଧୂଆଁଳିଆ ଆସ୍ତରଣ ଭିତରେ ଅନେକ ଫରକ ରହିଛି । ସବୁବେଳେ କୁହୁଡି ସବୁବେଳେ ମାଟିର ଉପର ସ୍ତରରେ ଗଠନ ହୋଇଥାଏ । ଯେତେବେଳେ ବାୟୁମଣ୍ଡଳ ଅଧିକ ଥଣ୍ଡା ହୋଇଥାଏ ସେତେବେଳେ ଜଳୀୟ ବାଷ୍ପ ଛୋଟଛୋଟ ଜଳ ବୁନ୍ଦାରେ ପରିଣତ ହୋଇଥାଆନ୍ତି । ଯେଉଁଗୁଡିକ ଏକ ଆସ୍ତରଣ ତିଆରି କରିଥାଏ ଯାହାକୁ କୁହୁଡି କୁହାଯାଇଥାଏ । ଖରା ପଡିବା ମାତ୍ରେ ଏହି ଜଳୀୟବାଷ୍ପ ଗୁଡିକ ଅନ୍ତର୍ଦ୍ଧାନ ହୋଇଯାଆନ୍ତି । ହେଲେ ଧୂଆଁଳିଆ ଆସ୍ତରଣ ଏହାଠାରୁ ସମ୍ପୂର୍ଣ୍ଣ ଭିନ୍ନ ହୋଇଥାଏ । ଏହା ପ୍ରଦୂଷିତ ବାୟୁ କାରଣରୁ ପ୍ରସ୍ତୁତ ହୋଇଥାଏ । ବାୟୁମଣ୍ଡଳରେ ଥିବା ପ୍ରଦୂଷିତ ଧୂଆଁ ଓ କୁହୁଡି ଉଭୟ ମିଶି ଏହା  ପ୍ରସ୍ତୁତ ହୋଇଥାଏ । ଏହା ସାଧାରଣତଃ ଯାନବାହାନରୁ ବାହାରୁଥିବା ଧୂଆଁ, ଶିଳ୍ପରୁ ବାହାରୁଥିବା ଧୂଆଁ ଓ ସୂର୍ଯ୍ୟ କିରଣ ମଧ୍ୟରେ ହେଉଥିବା ପ୍ରତିକ୍ରିୟାରୁ ଉତ୍ପନ୍ନ ହୋଇଥାଏ । ଏହା ଆମ ଶରୀର ପାଇଁ ଖୁବ କ୍ଷତିକାରକ ହୋଇଥାଏ । ସେହିଭଳି ଏହା ଦିନରେ ଖୁବ ଅଧିକ ସମୟ ଧରି ରହିଥାଏ ।