ଜାତୀୟ ହସ୍ତତନ୍ତ ଦିବସ

ଭାରତର ସମୃଦ୍ଧ ସାଂସ୍କୃତିକ ଐତିହ୍ୟ, ପରମ୍ପରା ଏବଂ କାରିଗରମାନଙ୍କ ନିପୁଣତାକୁ ସମ୍ମାନ ଜଣାଇବା ପାଇଁ ପ୍ରତିବର୍ଷ ଅଗଷ୍ଟ ୭ ତାରିଖରେ ସାରା ଦେଶରେ 'ଜାତୀୟ ହସ୍ତତନ୍ତ ଦିବସ' ପାଳନ କରାଯାଏ । ଏହି ବିଶେଷ ଦିନର ଇତିହାସ ୧୯୦୫ ମସିହା ଅଗଷ୍ଟ ୭ ତାରିଖର ଐତିହାସିକ 'ସ୍ୱଦେଶୀ ଆନ୍ଦୋଳନ' ସହ ଜଡ଼ିତ । ଯେଉଁଦିନ କୋଲକାତାର ଟାଉନ୍ ହଲ୍‌ରେ ବିଦେଶୀ ବସ୍ତ୍ର ବର୍ଜନ କରି ଦେଶୀୟ ବୁଣାକାର ଓ ହସ୍ତତନ୍ତ ସାମଗ୍ରୀକୁ ଆପଣେଇବା ପାଇଁ ଶପଥ ନିଆଯାଇଥିଲା । ଏହି ସ୍ମରଣୀୟ ଘଟଣାକୁ ଶ୍ରଦ୍ଧାଞ୍ଜଳି ସ୍ୱରୂପ ୨୦୧୫ ମସିହାରେ ଭାରତ ସରକାର ଅଗଷ୍ଟ ୭ କୁ ଆନୁଷ୍ଠାନିକ ଭାବେ ଜାତୀୟ ହସ୍ତତନ୍ତ ଦିବସ ଭାବେ ଘୋଷଣା କରିଥିଲେ । ସାମ୍ପ୍ରତିକ ସମୟରେ ଏହି ଦିବସର ମହତ୍ତ୍ୱ ଅତ୍ୟନ୍ତ ଗୁରୁତ୍ୱପୂର୍ଣ୍ଣ, କାରଣ ହସ୍ତତନ୍ତ କ୍ଷେତ୍ର କେବଳ ଭାରତର ପ୍ରାଚୀନ କଳାକୁ ଜୀବିତ ରଖିନାହିଁ  । କୃଷି ପରେ ଦେଶର ଦ୍ୱିତୀୟ ବୃହତ୍ତମ ଜୀବିକା ସୃଷ୍ଟିକାରୀ କ୍ଷେତ୍ର ଭାବେ ଲକ୍ଷ ଲକ୍ଷ ବୁଣାକାର, ବିଶେଷ କରି ମହିଳାମାନଙ୍କୁ ସ୍ୱାବଲମ୍ବୀ କରିବାରେ ପ୍ରମୁଖ ଭୂମିକା ଗ୍ରହଣ କରିଛି । ଓଡ଼ିଶାର ପ୍ରସିଦ୍ଧ ସମ୍ବଲପୁରୀ, ବନ୍ଧକଳା, ପାଟ ମାଣିଆବନ୍ଧ ଓ ବୋମକାଇ ଶାଢ଼ୀ ଭଳି ହସ୍ତତନ୍ତ କୃତି ଆଜି ବିଶ୍ୱ ଦରବାରରେ ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଛି । ଗ୍ରାମୀଣ ଅର୍ଥନୀତିକୁ ସୁଦୃଢ଼ କରିବା, ସ୍ଥାୟୀ ଫ୍ୟାଶନ୍‌କୁ ପ୍ରୋତ୍ସାହିତ କରିବା ଏବଂ 'ଭୋକାଲ୍ ଫର୍ ଲୋକାଲ୍' ଓ ଆତ୍ମନିର୍ଭର ଭାରତ ଗଠନର ସ୍ୱପ୍ନକୁ ସାକାର କରିବାରେ ଏହି ଦିବସ ଏକ ସାମାଜିକ ଓ ଅର୍ଥନୈତିକ ସଂକଳ୍ପର ବାର୍ତ୍ତା ବହନ କରେ ।