କ୍ୟାରିୟରରେ ପୂର୍ଣ୍ଣଛେଦ

ତାମିଲ ଚଳଚ୍ଚିତ୍ର ଜଗତର ଜଣେ ଅପ୍ରତିଦ୍ୱନ୍ଦ୍ୱୀ ନାୟକ ଭାବେ ପରିଚିତ ଥାଲାପତି ବିଜୟଙ୍କ ଜୀବନ କାହାଣୀ କୌଣସି ସିନେମାର କାହାଣୀଠାରୁ କମ୍ ନୁହେଁ। ତାଙ୍କର ଶେଷ ଚଳଚ୍ଚିତ୍ର ଭାବେ ‘ଜନ ନାୟକନ’ ବୋଲି ବର୍ତ୍ତମାନ ଆଲୋଚନା ହେଉଛି । ହେଲେ ଏହା ଯଦି ଠିକ ହୁଏ ତେବେ, ଏହା ତାଙ୍କର ଦୀର୍ଘ ତିନି ଦଶନ୍ଧିର ଅଭିନୟ ଜୀବନର ପୂର୍ଣ୍ଣଛେଦ ପକାଇବାକୁ ଯାଉଛି।

 ବିଜୟଙ୍କ ଯାତ୍ରା ଜଣେ ଷ୍ଟାର୍-କିଡ୍ ଭାବେ ଆରମ୍ଭ ହୋଇଥିଲେ ମଧ୍ୟ, ଜଣେ ସୁପରଷ୍ଟାର୍ ହେବା ପାଇଁ ତାଙ୍କୁ ଅନେକ ସଂଘର୍ଷ କରିବାକୁ ପଡ଼ିଥିଲା। ତାଙ୍କର ପ୍ରଥମ କିଛି ଚଳଚ୍ଚିତ୍ର ବ୍ୟବସାୟିକ ଭାବେ ବିଫଳ ହୋଇଥିଲା ଏବଂ ସେତେବେଳେ ସମାଲୋଚକମାନେ ତାଙ୍କର ଚେହେରା ଓ ଅଭିନୟ ଶୈଳୀକୁ ନେଇ କଟୁ ସମାଲୋଚନା କରିଥିଲେ। ମାତ୍ର ବିଜୟ ହାର ମାନି ନଥିଲେ; ସେ ନିଜର ନୃତ୍ୟ, ଶୈଳୀ ଏବଂ ପରିଶ୍ରମ ବଳରେ ନିଜକୁ ଏକ ବଡ଼ ବ୍ରାଣ୍ଡରେ ପରିଣତ କରିଥିଲେ। ‘ପୁଭେ ଉନାକ୍କାଗା’ ଭଳି ହିଟ୍ ଚଳଚ୍ଚିତ୍ର ତାଙ୍କ କ୍ୟାରିୟରକୁ ଏକ ନୂଆ ମୋଡ଼ ଦେଇଥିଲା ଏବଂ ପରବର୍ତ୍ତୀ ସମୟରେ ‘ଘିଲ୍ଲି’, ‘ପୋକ୍କିରି’, ଓ ‘ମେର୍ସଲ’ ଭଳି ବ୍ଲକବଷ୍ଟର ଚଳଚ୍ଚିତ୍ର ଜରିଆରେ ସେ ସାରା ଭାରତରେ ପରିଚିତ ହେଲେ। ବିଜୟଙ୍କ ବ୍ୟକ୍ତିଗତ ଜୀବନ ମଧ୍ୟ ବେଶ୍ ପ୍ରେରଣାଦାୟୀ। ସେ ନିଜର ଜଣେ ବଡ଼ ପ୍ରଶଂସକ ସଙ୍ଗୀତାଙ୍କୁ ବିବାହ କରିଥିଲେ, ଯାହା ସେ ସମୟରେ ବେଶ୍ ଚର୍ଚ୍ଚାର ବିଷୟ ପାଲଟିଥିଲା। ତାଙ୍କର ଶେଷ ଚଳଚ୍ଚିତ୍ର ‘ଜନ ନାୟକନ’ କେବଳ ଏକ ସିନେମା ନୁହେଁ, ବରଂ ତାଙ୍କର ରାଜନୈତିକ ଯାତ୍ରାର ଏକ ପ୍ରବେଶ ପଥ। ବିଜୟ ନିଜର ରାଜନୈତିକ ଦଳ ‘ତାମିଲଗା ଭେଟ୍ରି କାଜାଗାମ’  ମାଧ୍ୟମରେ ଲୋକଙ୍କ ସେବା କରିବାକୁ ଲକ୍ଷ୍ୟ ରଖିଛନ୍ତି। ଅଭିନୟ ଦୁନିଆର ଶୀର୍ଷରେ ଥାଇ ମଧ୍ୟ ସିନେମା ଛାଡ଼ିବା ନିଷ୍ପତ୍ତି ତାଙ୍କ ପ୍ରଶଂସକଙ୍କୁ ମର୍ମାହତ କରିଛି । ସେ ୧୮ ବର୍ଷ ବୟସରେ 'ନାଲାଇୟା ଥୀର୍ପୁ' ଚଳଚ୍ଚିତ୍ର ମାଧ୍ୟମରେ ଅଭିନୟ ଜଗତରେ ପାଦ ଦେଲେ, ସେତେବେଳେ ତାଙ୍କୁ ତାଙ୍କର ଚେହେରା ପାଇଁ ଅନେକ ପରିହାସ କରାଯାଇଥିଲା।  କିନ୍ତୁ ବିଜୟ ସେହି ସମାଲୋଚନାକୁ ନିଜର ବଳ କରିଥିଲେ। ସେ ନିଜର ନୃତ୍ୟ ଏବଂ ଆକ୍ସନ ଉପରେ ଏତେ କଠିନ ପରିଶ୍ରମ କରିଥିଲେ ଯେ, ଆଜି ସେ ଭାରତର ଜଣେ ଶ୍ରେଷ୍ଠ ଡ୍ୟାନ୍ସର ଭାବେ ଗଣିତ ହେଉଛନ୍ତି। ତାଙ୍କର ଏହି ନିଷ୍ଠା ହିଁ ତାଙ୍କୁ 'ଇଳୟା ଥାଲାପତି'ରୁ 'ଥାଲାପତି'ର ଆଖ୍ୟା ଦେଇଛି। ତେବେ ତାଙ୍କର ଅଭିନୟରୁ ଅବସରକୁ ଫ୍ୟାନମାନେ ଗ୍ରହଣ କରିବାକୁ ନାରାଜ । ଏବେ ବି ଅନେକ ଫ୍ୟାନ ତାଙ୍କୁ ଅବସର ନନେବାକୁ ଅନୁରୋଧ କରୁଥିବା ସୋସିଆଲ ମିଡିଆରେ ଦେଖିବାକୁ ମିଳୁଛି ।