ଅଭିନେତ୍ରୀଙ୍କୁ ମାଡ ଅଭିଯୋଗ

By: Ipsita

ନିଜର ବିବାଦୀୟ ବୟାନ ଏବଂ ବୋଲ୍ଡ ପୋଷାକ ପାଇଁ ଚର୍ଚ୍ଚାରେ ରହୁଥିବା ଅଭିନେତ୍ରୀ ଖୁସି ମୁଖାର୍ଜୀଙ୍କୁ ଦୁବାଇର ଏକ ରାସ୍ତାରେ ଜଣେ ବ୍ୟକ୍ତି ଚାପୁଡ଼ା ମାରିଥିବା ଅଭିଯୋଗ ହୋଇଛି। ଘଟଣାର ଏକ ଭିଡିଓ ସେ ନିଜ ଇନଷ୍ଟାଗ୍ରାମରେ ସେୟାର କରିଛନ୍ତି । ଯେଉଁଥିରେ ସେ କାନ୍ଦି କାନ୍ଦି ନିଜର ଦୁଃଖ ପ୍ରକାଶ କରିଛନ୍ତି। ଖୁସିଙ୍କ କହିବା ଅନୁଯାୟୀ, ଦୁବାଇରେ କିଛି ଲୋକ ବିନା କାରଣରେ ତାଙ୍କ ସହ ଶତ୍ରୁତା କରୁଛନ୍ତି । ଏପରିକି ସେଠାକାର ପୋଲିସ ମଧ୍ୟ ତାଙ୍କୁ କୌଣସି ସାହାଯ୍ୟ କରୁନାହିଁ ବୋଲି ସେ ବ୍ୟକ୍ତ କରିଛନ୍ତି । ଭିଡିଓରେ ସେ ରାସ୍ତାରେ ଚାଲିବା ଏକ ଅପରାଧ ପାଲଟିଛି ବୋଲି କହିବା ସହ ବାଇକରେ ଯାଉଥିବା ଜଣେ ବ୍ୟକ୍ତି ତାଙ୍କୁ ମାରିଥିବା ଦାବି କରିଛନ୍ତି। ଯଦିଓ ସେୟାର କରାଯାଇଥିବା ଭିଡିଓର ପୃଷ୍ଠଭୂମି ଦୁବାଇ ବଦଳରେ ଭାରତର ବୋଲି ଲୋକ କମେଣ୍ଟ ଦେଉଛନ୍ତି । ପୂର୍ବରୁ ଦୀପାବଳି ସମୟରେ ମୁମ୍ବାଇର ଏକ ରାସ୍ତାରେ ବାଣ ଦୋକାନୀ ଏବଂ ପୋଲିସ କର୍ମଚାରୀଙ୍କ ସହ ଦୁର୍ବ୍ୟବହାର କରି ଖୁସି ବିବାଦକୁ ଆସିଥିଲେ । ତେଣୁ ଭିଡିଓର ସତ୍ୟତାକୁ ନେଇ ବର୍ତ୍ତମାନସୁଦ୍ଧା କିଛି ଆଧିକାରୀକ ଘୋଷଣା କରାଯାଇନାହିଁ ।